தமிழ்நாடு சட்டமன்றத் தேர்தல் வரும் 23-ம் தேதி (வியாழக்கிழமை) ஒரே கட்டமாக நடைபெற உள்ள நிலையில், தங்கள் சொந்த ஊர்களுக்குச் சென்று வாக்களிக்க விரும்பும் பொதுமக்களின் வசதிக்காக அரசு போக்குவரத்துக் கழகங்கள் சார்பில் பிரம்மாண்டமான சிறப்பு பேருந்து ஏற்பாடுகள் செய்யப்பட்டுள்ளன.

இதன் ஒரு பகுதியாக, சென்னையில் தங்கி தொழில், வேலைவாய்ப்பு உள்ளிட்ட பல்வேறு துறைகளில் பணியாற்றி வரும் ஆயிரக்கணக்கான மக்கள் தடையின்றி பயணம் செய்யும் வகையில் இன்று (21-ம் தேதி) முதல் மூன்று நாட்களுக்கு சிறப்பு பேருந்துகள் இயக்கப்படுகின்றன.

மொத்தம் 10,663 பேருந்துகள் இயக்கப்படும் இந்த ஏற்பாட்டில், சென்னையிலிருந்து மட்டும் 5,574 சிறப்பு பேருந்துகள் இணைக்கப்பட்டுள்ளன. வழக்கமாக தினசரி இயக்கப்படும் 2,092 பேருந்துகளுடன் கூடுதலாக இன்று 1,404 சிறப்பு பேருந்துகள், நாளை (22-ம் தேதி) 3,570 சிறப்பு பேருந்துகள் மற்றும் 23-ம் தேதி மதியம் 1 மணி வரை 600 சிறப்பு பேருந்துகள் இயக்கப்பட உள்ளன. 

இதையும் படிங்க: நெருங்கும் தமிழக சட்டமன்ற தேர்தல்..!! முதல் நாளில் 573 பேர் வேட்புமனு தாக்கல்..!!

இந்த சிறப்பு பேருந்துகள் கோயம்பேடு, கிளாம்பாக்கம் மற்றும் மாதவரம் ஆகிய மூன்று முக்கிய பேருந்து நிலையங்களிலிருந்து புறப்படும்.கிளாம்பாக்கம் பேருந்து முனையத்திலிருந்து திருச்சி, மதுரை, நெல்லை, கோயம்புத்தூர், சேலம், தஞ்சாவூர், கும்பகோணம், தூத்துக்குடி உள்ளிட்ட தென் மாவட்டங்கள் மற்றும் பிற முக்கிய நகரங்களுக்கான பேருந்துகள் அதிக அளவில் இயக்கப்படுகின்றன.

மாதவரம் மற்றும் கோயம்பேடு நிலையங்களிலிருந்து வட மாவட்டங்கள் மற்றும் பிற பகுதிகளுக்கான சேவைகள் திட்டமிடப்பட்டுள்ளன. நீண்ட தூர விரைவு பேருந்துகள் உள்ளிட்ட அனைத்து வகை பேருந்துகளுக்கும் முன்பதிவு வசதி ஏற்படுத்தப்பட்டுள்ளது. கடந்த சில நாட்களாக நடைபெற்று வந்த முன்பதிவில் இதுவரை ஒரு லட்சத்து 10 ஆயிரம் பேர் பதிவு செய்துள்ளனர்.

இதில் இன்று பயணம் செய்ய 40 ஆயிரம் பேரும், நாளை பயணத்திற்கு 70 ஆயிரம் பேரும் இடம் பதிவு செய்துள்ளனர். பொதுமக்கள் முன்கூட்டியே முன்பதிவு செய்து கொண்டால், கூட்ட நெரிசல் இன்றி சிரமமின்றி பயணம் செய்யலாம் என்று போக்குவரத்துத் துறை அதிகாரிகள் தெரிவித்துள்ளனர். தேர்தல் நாளான 23-ம் தேதி மட்டும் 60 வயதுக்கு மேற்பட்ட முதியோர், பார்வையற்றோர் மற்றும் மாற்றுத்திறனாளிகளுக்கு நகரப் பேருந்துகளில் இலவச பயண வசதியும் அறிவிக்கப்பட்டுள்ளது.

இந்த ஏற்பாடுகள் மூலம் அதிக எண்ணிக்கையிலான வாக்காளர்கள் தங்கள் ஊர்களுக்குச் சென்று ஜனநாயகக் கடமையை ஆற்ற உதவும் என எதிர்பார்க்கப்படுகிறது. பயணிகள் பாதுகாப்புடன் பயணிக்க தேவையான அனைத்து ஏற்பாடுகளும் செய்யப்பட்டுள்ளதாக அதிகாரிகள் உறுதியளித்துள்ளனர்.

இதையும் படிங்க: ஓய்ந்தது அனல் பறக்கும் பிரச்சாரம்! அமைதிக்குத் திரும்பியது தமிழ்நாடு... நாளை மறுநாள் வாக்குப்பதிவு!