டாஸ்மாக் முறைகேட்டில் விஐபிக்கள் பலருக்கும் தொடர்பு உள்ளது என்று பாஜக மூத்த தலைவர் ஹெச். ராஜா தெரிவித்தார்.

மதுரையில் ஜூன் 22ஆம் தேதி முருகன் மாநாடு நடைபெற உள்ளது. இது தொடர்பான பணிகள் குறித்த ஆலோசனைக் கூட்டம்  நடைபெற்றது. இக்கூட்டத்தில் பாஜக மூத்த தலைவர் ஹெச்.ராஜா பங்கேற்றார். பின்னர் அவர்  செய்தியாளர்களைச் சந்தித்தார். அப்போது அவர் கூறுகையில், "டாஸ்மாக் முறைகேடு தொடர்பாக அமலாக்கத் துறை அறிக்கை வெளியானதில் இருந்தே திமுக அரசு பதற்றத்தில் இருந்து வருகிறது. ரித்தீஷ், ஆகாஷ் பாஸ்கரன் ஆகியோர் தலைமறைவாக இருந்து வருகின்றனர்.

முதல்வர் ஸ்டாலின், துணை முதல்வர் உதயநிதி, அமைச்சர் மகேஷ் பொய்யாமொழி குடும்பத்துக்கும் டாஸ்மாக் முறைகேட்டில் தொடர்பு உள்ளது. இது குறித்த தகவல்கள் திமுக அரசுக்கு 4 மாதங்களுக்கு முன்பே தெரிய வந்ததால்தான் முறைகேட்டை மடைமாற்றும் வகையில் திமுக அரசு மும்மொழிக் கொள்கை குறித்து பேசத் தொடங்கியது. டாஸ்மாக் முறைகேட்டில் விஐபிக்களுக்கு உள்ள தொடர்பு குறித்து அமலாக்கத் துறையின் விசாரணைக்குப் பின்பு தெரிய வரும்.

பாகிஸ்தான் கேட்டுக்கொண்டதால்தான் போர் நிறுத்தப்பட்டது. ராகுல் காந்தி நாட்டுக்கு எதிராகப் பேசுவதை மட்டுமே வழக்கமாகக் கொண்டுள்ளார். தமிழகத்தில் 2026ஆம் ஆண்டு சட்டப்பேரவைத் தேர்தலில் திமுக மீண்டும் ஆட்சியைப் பிடிக்கும் என்று திமுகவினர் கனவு காண்கிறார்கள். யார், யாருடன் கூட்டணி வைத்தால் திமுகவுக்கு என்ன வந்தது? கூடா நட்பு கேடாய் முடியும் என்று கூறிய திமுக, காங்கிரஸ் கட்சியுடன் கூட்டணி வைத்திருக்கிறது. இதற்காக திமுக வெட்கப்பட வேண்டும்.

இதையும் படிங்க: டம்மி அப்பாவும், மகனும் சொல்லுவது எல்லாமே பொய்.! விளைவை பார்த்தீர்களா! இபிஎஸ் ஆவேசம்..!

திமுக கூட்டணியில் உள்ள கம்யூனிஸ்ட், விடுதலை சிறுத்தைகள் உள்ளிட்ட கட்சிகளுக்கு சூடு சுரணை எதுவும் இல்லை. அதிமுக - பாஜக கூட்டணி திமுகவுக்குத் தோல்வி பயத்தை ஏற்படுத்தியுள்ளது. விஜய் தனித்து நின்று தேர்தலில் போட்டியிடுவது நல்லதுதான்” என்று ஹெச். ராஜா கூறினார்.

இதையும் படிங்க: சட்டப் போராட்டத்தில் ஒன்றுபடுவோம்..! 8 மாநில முதலமைச்சர்களுக்கு ஸ்டாலின் கடிதம்..!