தமிழக வெற்றிக் கழகத்தின் தலைவரும், தமிழ்நாடு முதலமைச்சருமான விஜய், இன்று மதியம் சென்னை பனையூரில் உள்ள கட்சியின் தலைமை அலுவலகத்திற்கு செல்ல உள்ளதாக தகவல்கள் வெளியாகியுள்ளன.

கடந்த வாரம், பிற கட்சிகளில் இருந்து இணைந்த முன்னாள் அமைச்சர்களை நேரில் சந்தித்து அவர்களுடன் புகைப்படம் எடுத்துக்கொள்ளும் நிகழ்ச்சி நடத்த திட்டமிடப்பட்டிருந்தது. ஆனால், இயக்குநர் பாக்யராஜ் மறைவையொட்டி இரங்கல் தெரிவிக்கும் வகையில் அந்த நிகழ்ச்சிகள் ஒத்திவைக்கப்பட்டன.

அந்த நிகழ்ச்சிகள் அனைத்தையும் இந்த வாரம் நடத்த கட்சித் தலைமை முடிவு செய்துள்ளது. இதன்படி, இன்று காலை மாற்றுக் கட்சிகளைச் சேர்ந்த நிர்வாகிகள் இணையும் விழா, கட்சியின் பொதுச் செயலாளர் மற்றும் உயர்மட்ட நிர்வாகிகள் தலைமையில் நடைபெற்றது.

இதையும் படிங்க: தவம் இருந்தாலும் தவெக-வில் அனிதாவுக்கு இடமில்லை! அமைச்சர் நிர்மல்குமார் அதிரடி!

இதனைத் தொடர்ந்து, இன்று மதியம் சுமார் 3 மணியளவில் முதலமைச்சர் விஜய் பனையூர் தலைமை அலுவலகத்திற்கு வருகிறார். அப்போது, அண்மையில் அதிமுகவில் இருந்து விலகி தமிழக வெற்றிக் கழகத்தில் இணைந்துள்ள முக்கிய முன்னாள் அமைச்சர்களை அவர் நேரில் சந்தித்து வாழ்த்து தெரிவிக்க உள்ளதாக கூறப்படுகிறது.

மேலும், கட்சியின் மாவட்டச் செயலாளர்களின் எண்ணிக்கை 132-இலிருந்து 137 ஆக உயர்த்தப்பட்டுள்ள நிலையில், புதிதாக நியமிக்கப்பட்ட நிர்வாகிகளுக்கு சான்றிதழ்கள் வழங்கும் நிகழ்ச்சியிலும் அவர் பங்கேற்பார் என்று எதிர்பார்க்கப்படுகிறது.

அதேபோல், ஆட்சி பொறுப்பேற்ற பிறகு இரண்டாவது முறையாக பனையூர் கட்சி அலுவலகத்திற்கு வர உள்ள முதலமைச்சர் விஜய், கட்சியின் அடுத்தகட்ட செயல்பாடுகள், அமைப்பு விரிவாக்கம் மற்றும் வரவிருக்கும் உள்ளாட்சித் தேர்தலை முன்னிட்டு மேற்கொள்ள வேண்டிய பணிகள் குறித்து நிர்வாகிகளுக்கு ஆலோசனைகளையும் வழங்க உள்ளதாக தகவல்கள் தெரிவிக்கின்றன.

மேலும் அதிமுகவில் இருந்து ஆவலுடன் தவெகவிற்கு தாவிய முன்னாள் அமைச்சர்களுக்கு பதவி வழங்க விஜய் திட்டமிட்டுள்ளதாகவும், அதிமுகவின் முகமாக திகழ்ந்த பிரமுகர்களுக்கு முக்கிய பதவியை தூக்கிக் கொடுக்கவுள்ளதாகவும் தகவல்கள் வெளியாகியுள்ளன. 

இதையும் படிங்க: தவெக மிரட்டல்... கோடிகளை கொட்டினாலும் மசிய மாட்டேன்! அனிதா ராதாகிருஷ்ணன் பகீர்!