தமிழகச் சட்டமன்றத் தேர்தலுக்கான வேட்புமனுப் பரிசீலனை இன்று நடைபெற்ற நிலையில், எடப்பாடி தொகுதியில் தமிழக வெற்றி கழகம் (TVK) சார்பில் போட்டியிட மனுத்தாக்கல் செய்திருந்த அருண்குமார் மாயமாகியுள்ளதாக எழுந்துள்ள புகார் பெரும் பரபரப்பை ஏற்படுத்தியுள்ளது. அவர் கடத்தப்பட்டிருக்கலாம் எனச் சந்தேகிக்கும் அக்கட்சியின் வழக்கறிஞர் பிரிவு, இது குறித்துத் தமிழகக் காவல்துறை தலைமை இயக்குநரிடம் (DGP) அவசரப் புகார் அளித்துள்ளது.
எடப்பாடி தொகுதியில் அதிமுக பொதுச் செயலாளர் எடப்பாடி கே. பழனிசாமியை எதிர்த்துத் தவெக சார்பில் போட்டியிட வேட்புமனுத் தாக்கல் செய்திருந்தவர் அருண்குமார். இன்று நடைபெற்ற பரிசீலனையில் அவரது மனு ஆவணக் குறைபாடுகளால் நிராகரிக்கப்பட்டது. இந்நிலையில், கடந்த சில மணி நேரங்களாக அருண்குமாரைத் தொடர்பு கொள்ள முடியவில்லை என்றும், அவர் எங்கு இருக்கிறார் என்பது தெரியவில்லை என்றும் தவெக தரப்பில் தெரிவிக்கப்பட்டுள்ளது.
தவெக வழக்கறிஞர் அறிவழகன், இது தொடர்பாகத் தமிழக டி.ஜி.பி மற்றும் சேலம் மாவட்டக் காவல் கண்காணிப்பாளர் (SP) ஆகியோருக்கு அவசரப் புகார் கடிதம் ஒன்றை அனுப்பியுள்ளார். அதில் வேட்பாளர் அருண்குமார் மாயமான விவகாரத்தில் அவர் எங்கு இருக்கிறார் என்பதைக் கண்டுபிடிக்க முடியவில்லை. அவர் திட்டமிட்டு கடத்தப்பட்டிருக்கலாம் அல்லது யாரேனும் அவரைச் சட்டவிரோதக் காவலில் (Illegal Detention) வைத்திருக்கலாம் எனப் பலத்த சந்தேகம் எழுகிறது. காவல்துறை உடனடியாக இது குறித்துத் தீவிர விசாரணை நடத்தி அருண்குமாரை மீட்க வேண்டும் என வலியுறுத்தியுள்ளார்.
இதையும் படிங்க: அன்பும் மனிதநேயமும் வளரட்டும்! ஈஸ்டர் திருநாளில் தவெக தலைவர் விஜய் வாழ்த்து!
ஒரு மாநிலத்தின் முக்கியத் தலைவரை எதிர்த்துப் போட்டியிடவிருந்த வேட்பாளர் மாயமாகியுள்ளதாக எழுந்துள்ள இந்தப் புகார், எடப்பாடி தொகுதியில் தேர்தல் வெப்பத்தை அதிரடியாக உயர்த்தியுள்ளது. வேட்புமனு நிராகரிப்பிற்கும், அவர் மாயமானதற்கும் ஏதேனும் தொடர்பு உள்ளதா என்ற கோணத்திலும் பேச்சுக்கள் கிளம்பியுள்ளன.
தவெக வழக்கறிஞரின் புகாரைத் தொடர்ந்து, சேலம் மாவட்டக் காவல்துறை அருண்குமாரின் செல்போன் சிக்னல்களைக் கொண்டு தேடுதல் வேட்டையைத் தொடங்கியுள்ளது. அவர் கடைசியாக எங்கு இருந்தார், யாரைச் சந்தித்தார் என்பது குறித்து சிசிடிவி காட்சிகளும் ஆய்வு செய்யப்பட்டு வருகின்றன.
தமிழக வெற்றி கழகத் தலைவர் விஜய் அவர்கள் இது குறித்துத் தனது வழக்கறிஞர் குழுவுடன் ஆலோசனை நடத்தி வருவதாகவும், வேட்பாளரின் பாதுகாப்பு உறுதி செய்யப்பட வேண்டும் எனத் தேர்தல் ஆணையத்திடமும் முறையிடத் திட்டமிட்டுள்ளதாகவும் தகவல்கள் தெரிவிக்கின்றன.
இதையும் படிங்க: அதிமுக-தான் எனக்கு ஆதியும் அந்தமும்! ஆனால் புறக்கணிக்கப்பட்டேன்! முன்னாள் சபாநாயகர் ப. தனபால் உருக்கம்!