உதயசூரியன் சின்னத்தில் போட்டியிட்டது துரதிர்ஷ்டவசமா? நிர்பந்தமா? வைகோ, துரை வைகோ பேச்சால் திமுக அப்செட்!

தமிழக அரசியலில் புதிய சர்ச்சையை ஏற்படுத்தும் வகையில், மதிமுக முதன்மை செயலாளர் துரை வைகோ தெரிவித்த கருத்து, திமுக மற்றும் மதிமுக இடையேயான உறவில் புதிய விவாதத்தை கிளப்பியுள்ளது. “துரதிருஷ்டவசமாக உதயசூரியன் சின்னத்தில் போட்டியிட்டுவிட்டோம்” என்ற அவரது கருத்துக்கு திமுக நிர்வாகிகள் மற்றும் தொண்டர்கள் மத்தியில் கடும் எதிர்ப்பு எழுந்துள்ளதாக தகவல்கள் வெளியாகியுள்ளன.

சமீபத்தில் நடைபெற்ற சட்டப்பேரவைத் தேர்தலில் திமுக கூட்டணியில் இடம்பெற்ற மதிமுக, உதயசூரியன் சின்னத்தில் போட்டியிட்டு இரண்டு தொகுதிகளில் வெற்றி பெற்றது. தேர்தலுக்குப் பிறகு அரசியல் சூழல் வேகமாக மாறிய நிலையில், தமிழக வெற்றிக் கழகம் தலைமையிலான ஆட்சிக்கு பல கட்சிகள் ஆதரவு வழங்கின. இதனால், கூட்டணிக் கட்சிகளுக்குள் புதிய அரசியல் கணக்குகள் உருவாகியுள்ளன.

இந்த நிலையில் பேசிய துரை வைகோ, உதயசூரியன் சின்னத்தில் போட்டியிட்டதால் தற்போதைய அரசுக்கு ஆதரவு அளிக்க முடியாத சூழல் ஏற்பட்டதாக கூறினார். மேலும், திமுக கூட்டணியில் மதிமுக தொடருமா அல்லது புதிய அரசியல் பாதையை தேர்வு செய்யுமா என்பது குறித்து கட்சியின் பொதுக்குழு கூட்டத்தில் முடிவு எடுக்கப்படும் என்றும் தெரிவித்தார்.

இதையும் படிங்க: டெல்லியில் ஜூன் 8ல் நடைபெறும் I.N.D.I.A கூட்டணி மாநாடு! ஓகே சொன்னார் விஜய்|? தவெக பங்கேற்க வாய்ப்பு!

இதற்கு முன்னதாக மதிமுக பொதுச்செயலாளர் வைகோவும் கூட்டணியில் தங்கள் கட்சிக்கு குறைந்த தொகுதிகள் மட்டுமே ஒதுக்கப்பட்டதாக வருத்தம் தெரிவித்திருந்தார். மேலும், கட்சித் தொண்டர்களின் மனநிலையும், எதிர்கால அரசியல் நகர்வுகளும் பொதுக்குழுவில் விவாதிக்கப்படும் என கூறியிருந்தார்.

இதற்கிடையில், திமுக வட்டாரங்களில் இருந்து கடுமையான எதிர்வினைகளும் வெளிப்பட்டுள்ளன. உதயசூரியன் சின்னத்தில் போட்டியிட்டதால்தான் மதிமுக இரண்டு இடங்களில் வெற்றி பெற்றது என்றும், திமுக தொண்டர்களின் கடுமையான உழைப்பே அந்த வெற்றிக்கு காரணம் என்றும் சில முன்னாள் அமைச்சர்கள் கருத்து தெரிவித்துள்ளனர். மேலும், தனிச்சின்னத்தில் போட்டியிட்டிருந்தால் மதிமுகவுக்கு வெற்றி கிடைத்திருக்குமா என்ற கேள்வியையும் அவர்கள் எழுப்பியுள்ளனர்.

காங்கிரஸ் கட்சி கூட்டணியை விட்டு வெளியேறியபோது கடுமையாக விமர்சித்த திமுக, தற்போது மதிமுகவின் நிலைப்பாட்டையும் உன்னிப்பாக கவனித்து வருகிறது. வரவிருக்கும் மதிமுக பொதுக்குழு கூட்டத்தில் எடுக்கப்படும் முடிவு, தமிழக அரசியலில் புதிய திருப்பத்தை ஏற்படுத்துமா என்ற எதிர்பார்ப்பு அரசியல் வட்டாரங்களில் அதிகரித்துள்ளது. திமுக-மதிமுக உறவு தொடருமா அல்லது புதிய அரசியல் அத்தியாயம் தொடங்குமா என்பது அடுத்த சில நாட்களில் தெளிவாகும் என அரசியல் பார்வையாளர்கள் கருதுகின்றனர்.

இதையும் படிங்க: I.N.D.I.A கூட்டணியில் இணையலாம் வாங்க!! தவெக விஜய்க்கு காங்கிரஸ் அழைப்பு! ஓரங்கட்டப்பட்ட திமுக!