#BREAKING கே.என்.நேருவுக்கு இறங்கிய இடி… காலையிலேயே ரெய்டு… திருச்சி வீட்டிற்குள் புகுந்த லஞ்ச ஒழிப்புத்துறை…!

தமிழகத்தின் முன்னாள் நகராட்சி நிர்வாகத் துறை அமைச்சர் கே.என். நேரு, அவரது குடும்பத்தினர் மற்றும் தொடர்புடையவர்கள் மீது அரசுப் பணியிடங்களை நிரப்புவதில் லஞ்சம் பெற்றதாக எழுந்துள்ள புகார் தொடர்பாக, லஞ்ச ஒழிப்புத் துறை விசாரணை நடத்தி வருகிறது. கடந்த திமுக ஆட்சிக் காலத்தில் நகராட்சி நிர்வாகம் மற்றும் குடிநீர் வழங்கல் துறையில் 2,538 பணியிடங்களுக்கான நியமனங்களில் முறைகேடு நடந்ததாகவும், இதற்காக ரூ.634 கோடி வரை லஞ்சம் பெறப்பட்டதாகவும் அமலாக்கத் துறை குற்றஞ்சாட்டியுள்ளது. உதவிப் பொறியாளர்கள், இளநிலைப் பொறியாளர்கள் உள்ளிட்ட பல்வேறு பணியிடங்களுக்கு, ஒவ்வொரு பணியிடத்துக்கும் ரூ.25 லட்சம் முதல் ரூ.35 லட்சம் வரை லஞ்சம் பெறப்பட்டதாக அமலாக்கத் துறை தெரிவித்துள்ளது.

அமலாக்கத் துறை ஆதாரங்களை வழங்கியிருந்தும் உரிய நடவடிக்கை எடுக்கப்படவில்லை எனக் கூறி, அதிமுக மாநிலங்களவை உறுப்பினரும் வழக்கறிஞருமான ஐ.எஸ். இன்பதுரை சென்னை உயர்நீதிமன்றத்தில் மனுத் தாக்கல் செய்தார். பணிநியமன முறைகேடு தொடர்பாக வழக்குப் பதிவு செய்து முறையான விசாரணை நடத்த உத்தரவிட வேண்டும் என அவர் கோரினார். இந்த மனுவை விசாரித்த சென்னை உயர்நீதிமன்றம், 2026 பிப்ரவரி 20ஆம் தேதி, அமலாக்கத் துறை அளித்த தகவல்களின் அடிப்படையில் வழக்குப் பதிவு செய்து விரிவான விசாரணை நடத்துமாறு லஞ்ச ஒழிப்புத் துறைக்கு உத்தரவிட்டது.

தமிழகத்தில் ஆட்சி மாற்றம் ஏற்பட்டதைத் தொடர்ந்து, 2026 ஜூன் மாதத்தில் இந்த விவகாரம் தொடர்பாக லஞ்ச ஒழிப்புத் துறை வழக்குப் பதிவு செய்துள்ளதாகத் தமிழக அரசு சென்னை உயர்நீதிமன்றத்தில் தெரிவித்தது. இதற்கிடையில், முந்தைய அரசும் கே.என். நேருவும் உயர்நீதிமன்றத்தின் பிப்ரவரி 20 உத்தரவை மறுஆய்வு செய்யக் கோரி மனுக்களைத் தாக்கல் செய்திருந்தனர். வழக்குப் பதிவு செய்ய உத்தரவிட்ட நடைமுறைக்கு எதிராக, மனுதாரர் தரப்பில் நீதிமன்ற அவமதிப்பு நடவடிக்கையும் கோரப்பட்டிருந்தது. 

இதற்கிடையே, 2026 செப்டம்பர் 5ஆம் தேதி, கே.என். நேருவுக்குச் சொந்தமான மற்றும் அவருடன் தொடர்புடைய இடங்களில் லஞ்ச ஒழிப்புத் துறை அதிகாரிகள் சோதனை நடத்தினர். திருச்சி தில்லைநகரில் உள்ள அவரது இல்லம் உள்ளிட்ட இடங்களிலும், மாநிலத்தின் பிற பகுதிகளில் உள்ள இடங்களிலும் சோதனை மேற்கொள்ளப்பட்டது. திருச்சி மற்றும் பிற இடங்கள் உட்பட 20 இடங்களில் சோதனை நடைபெற்றன. அப்போது ஒப்பந்தப் பணிகளை முன்கூட்டியே குறிப்பிட்ட நிறுவனங்களுக்கு ஒதுக்குவது, ஒப்பந்தத் தொகையில் குறிப்பிட்ட சதவீதத்தை முறைகேடாகப் பெறுவது உள்ளிட்ட குற்றச்சாட்டுகள் விசாரிக்கப்பட்டன.

இதனையடுத்து இன்று திமுக முன்னாள் அமைச்சர் கே.என்.நேருவின் திருச்சி தில்லை நகர் இல்லத்தில் லஞ்ச ஒழிப்புத்துறையினர் சோதனை நடத்தி வருகின்றனர். அதிகாலை முதலே வந்த லஞ்ச ஒழிப்புத்துறையினர் சோதனை நடத்தி வருகின்றனர். கே.என்.நேருவின் சகோதரரான ரவிச்சந்திரனின் சென்னை ஆர்.ஏ.புரம் இல்லத்திலும் லஞ்ச ஒழிப்புத்துறையினரின் சோதனையானது நடைபெற்று வருகிறது. நகராட்சி நிர்வாகத்துறையில் பணி நியமனங்களுக்காக ரூ.634 கோடி லஞ்சம் பெற்றதாக கே.என்.நேரு மீதான புகார் தொடர்பாக சோதனை நடத்தப்படுவதாக தகவல் வெளியாகியுள்ளது.