கர்நாடகாவில் உள்ள கொல்லூர் மூகாம்பிகை கோவிலுக்கு கடந்த வாரம் தரிசனம் சென்றார் தமிழக வெற்றிக் கழக தலைவர் விஜய். கோவிலில் இருந்து திரும்பும் போது அவரே காரை ஓட்டினார். காருக்குள் இருந்த ஒருவர் அந்தக் காட்சியை வீடியோ எடுத்து, “அண்ணன் எவ்வளவு ஸ்டைலாக கார் ஓட்டுகிறார்” என்ற பெயரில் சமூக வலைதளங்களில் பகிர்ந்தார். முதலில் ரசிகர்கள் மற்றும் கட்சியினர் மத்தியில் பெரும் வரவேற்பைப் பெற்ற இந்த வீடியோ, பின்னர் பெரும் சர்ச்சையை கிளப்பியது.

வீடியோவில் விஜய் சீட் பெல்ட் அணியாமல் கார் ஓட்டியது மற்றும் அவருக்கு அருகில் இருந்த பிளாஸ்டிக் டம்ளர் ஆகியவை பெரும் விமர்சனத்துக்கு உள்ளானது. போக்குவரத்து விதிமுறைகளை மீறியதாக எதிர்க்கட்சியினர் கேள்வி எழுப்பினர். இதனால் தவெக தரப்பில் இருந்து உடனடியாக நடவடிக்கை எடுக்கப்பட்டது. “இந்த வீடியோவை யாரும் பயன்படுத்த வேண்டாம்” என கட்சியினருக்கு வாய்மொழி உத்தரவு பிறப்பிக்கப்பட்டதாக தெரிகிறது.

இதைத் தொடர்ந்து, விஜய் கார் ஓட்டும் வீடியோவை பகிர்ந்த பல தவெக நிர்வாகிகள் மற்றும் ரசிகர்கள் தங்கள் சமூக வலைதள பக்கங்களில் இருந்து அந்த வீடியோவை அவசர அவசரமாக நீக்கி வருகின்றனர். மேலும், எதிர்க்கட்சியினர் பகிர்ந்த வீடியோக்களையும் அகற்றுவதற்காக ஒரு தனிப்பட்ட விளம்பர நிறுவனம் மூலம் காப்புரிமை உரிமை கோரி புகார் அளிக்கப்பட்டு வருவதாகவும் தகவல் வெளியாகியுள்ளது.

இதையும் படிங்க: 1.6 கிலோ வெள்ளி வாள்! எம்.ஜி.ஆர் பாணியில் விஜய் காணிக்கை! கொல்லூர் ஸ்ரீ மூகாம்பிகை கோயிலில் வழிபாடு பின்னணி!

இந்த நடவடிக்கைக்கு எதிர்க்கட்சியினர் கடும் விமர்சனம் செய்து வருகின்றனர். “முதல்வரின் காருக்குள் இருந்து வீடியோ எடுத்தது யார்? அதை வெளியிட்டது யார்? என்ன இருக்கிறது அந்த வீடியோவில் என்று மறைக்க இவ்வளவு முயற்சி ஏன்?” என்று கேள்விகளை எழுப்புகின்றனர். 

இந்த சம்பவம் தவெகவுக்குள் சிறிய அசௌகரியத்தை ஏற்படுத்தியுள்ளது. கட்சி தொடங்கிய புதிதில் இப்படியான சின்ன சின்ன விஷயங்கள் பெரும் சர்ச்சையாக மாறுவது தலைமைக்கு சவாலாக அமைந்துள்ளது. விஜயின் ரசிகர்கள் மத்தியில் அவரது ஸ்டைலான படம் என்று பாராட்டப்பட்ட வீடியோ, இப்போது எதிர்க்கட்சியினருக்கு ஆயுதமாக மாறியுள்ளது.

அரசியல் விமர்சகர்கள் கூறுகையில், “பொது இடங்களில் பிரபலங்கள் கார் ஓட்டும் போது சீட் பெல்ட் அணிவது அவசியம். இது ரசிகர்களுக்கும் பொதுமக்களுக்கும் முன்மாதிரியாக இருக்க வேண்டும்” என்கின்றனர். இந்த சர்ச்சை தவெகவின் சமூக வலைதள செயல்பாடுகளில் இனி மிகுந்த கவனத்துடன் இருக்க வேண்டிய அவசியத்தை சுட்டிக்காட்டுகிறது.

இதையும் படிங்க: தவெகவுக்கு போகாதீங்க! திமுகவுக்கு வாங்க! அதிருப்தி அதிமுக நிர்வாகிகளிடம் மு.க.ஸ்டாலின் பேச்சு!