தாராபுரம் சட்டப்பேரவைத் தொகுதி இடைத்தேர்தலுக்கான பிரசாரம் இன்று மாலை 6 மணியுடன் நிறைவடைய உள்ள நிலையில், தமிழக முதல்வரும், தமிழக வெற்றிக் கழகத் தலைவருமான விஜய் இன்று மீண்டும் தாராபுரத்தில் சாலை வழியாக வாக்கு சேகரிக்கிறார். தவெக வேட்பாளர் சத்யபாமாவுக்கு ஆதரவாக நடைபெறும் இந்த இறுதிக்கட்ட பிரசாரம், தொகுதி முழுவதும் கவனம் பெற்றுள்ளது.
தாராபுரம் தொகுதியில் விஜய் சுமார் 114 கி.மீ. பயணம் செய்து பல்வேறு பகுதிகளில் பொதுமக்களை சந்திக்க திட்டமிடப்பட்டுள்ளது. சுமார் 30 இடங்களில் அவர் சாலை வழியாக சென்று வாக்கு சேகரிக்க உள்ளதாக தகவல் வெளியாகியுள்ளது.
இந்த பயணம் மாருதி நகர் பகுதியில் தொடங்குகிறது. பின்னர் உடுமலைப்பேட்டை சாலை சந்திப்பு, காவல் நிலைய சந்திப்பு, ஐந்து சாலை சந்திப்பு, மீனாட்சிபுரம், குளத்துப்பாளையம், கரையூர், மூலனூர், வஞ்சியம்மன் கோயில் உள்ளிட்ட பகுதிகள் வழியாக பிரசாரம் நடைபெறுகிறது.
இதையும் படிங்க: சத்யபாமாவுக்காக மீண்டும் களத்தில் விஜய்! இன்று தாராபுரத்தில் நடக்கப்போவது என்ன? முதல்வரின் மெகா ரூட்!
தவெக வெளியிட்டுள்ள தகவலின்படி, இன்று மதியம் சுமார் 1 மணியளவில் மாருதி நகரில் இருந்து விஜய்யின் வாகனப் பிரசாரம் தொடங்குகிறது. தொகுதியில் உள்ள முக்கிய சாலைகள் மற்றும் மக்கள் வசிக்கும் பகுதிகள் வழியாக பயணித்து, பொதுமக்களிடம் சத்யபாமாவுக்கு ஆதரவு கோர திட்டமிடப்பட்டுள்ளது.
இடைத்தேர்தல் பிரசாரம் இறுதிக்கட்டத்தை எட்டியுள்ள நிலையில், விஜய்யின் இந்த சாலைப் பிரசாரம் அரசியல் கட்சிகளிடையே கவனத்தை ஈர்த்துள்ளது. அக்டோபர் 6-ம் தேதி நடைபெற உள்ள வாக்குப்பதிவுக்கு முன்பாக தாராபுரம் தொகுதியில் தனது கட்சியின் வேட்பாளருக்கு ஆதரவை திரட்டுவதற்கான முக்கிய நிகழ்வாக இந்த பயணம் பார்க்கப்படுகிறது.
இதனிடையே, விஜய்யின் வாகனப் பிரசாரத்தை முன்னிட்டு பாதுகாப்பு மற்றும் போக்குவரத்து ஏற்பாடுகள் தீவிரப்படுத்தப்பட்டுள்ளன. சாலையின் இருபுறங்களிலும் தடுப்புகள் அமைக்கப்பட்டு, மக்கள் கூட்டத்தை கட்டுப்படுத்த நடவடிக்கைகள் மேற்கொள்ளப்பட்டுள்ளன. விடுமுறை நாளான இன்று அதிகளவில் பொதுமக்கள் திரள்வார்கள் என எதிர்பார்க்கப்படுவதால் போலீஸார் கூடுதல் பாதுகாப்பு பணியில் ஈடுபடுத்தப்பட்டுள்ளனர்.
மேலும், பிரசாரத்தில் பங்கேற்கும் பொதுமக்களுக்கு குடிநீர் மற்றும் மருத்துவ வசதிகள் உள்ளிட்ட அடிப்படை ஏற்பாடுகள் செய்யப்பட்டுள்ளதாக தவெக தெரிவித்துள்ளது. கர்ப்பிணிகள், சிறுவர், சிறுமியர், பள்ளி மாணவர்கள், மூத்த குடிமக்கள் மற்றும் உடல்நலம் பாதிக்கப்பட்டவர்கள் உள்ளிட்டோர் நேரடியாக பங்கேற்க வேண்டாம் என்றும் கட்சி தரப்பில் கேட்டுக்கொள்ளப்பட்டுள்ளது. அவர்கள் தொலைக்காட்சி மற்றும் சமூக வலைதள நேரலை மூலம் நிகழ்ச்சியை பார்க்கலாம் என்றும் தெரிவிக்கப்பட்டுள்ளது.
மாலை 6 மணியுடன் பிரசாரம் நிறைவடைவதால், தாராபுரத்தில் விஜய்யின் இந்த நீண்ட சாலைப் பயணம் இடைத்தேர்தல் களத்தின் இறுதி அரசியல் நிகழ்வுகளில் ஒன்றாக அமைகிறது.
இதையும் படிங்க: தவெக கூட்டணியில் பாமக! விசிக வைத்த ‘செக்’! திருமாவளவன் தரப்பின் அதிரடி நிலைப்பாடு!