இந்தியத் துணை ஜனாதிபதியாகப் பொறுப்பேற்ற பிறகு முதன்முறையாக நாளை (ஜனவரி 2) சென்னை வரும் தமிழகத்தைச் சேர்ந்த சி.பி. ராதாகிருஷ்ணனுக்குப் பிரம்மாண்டமான வரவேற்பு மற்றும் பாராட்டு விழாக்களுக்கு ஏற்பாடு செய்யப்பட்டுள்ளது.

முன்னாள் துணை ஜனாதிபதி ஜகதீப் தன்கர் ராஜினாமா செய்ததைத் தொடர்ந்து, தேசிய ஜனநாயகக் கூட்டணி சார்பில் போட்டியிட்டு வெற்றி பெற்ற சி.பி. ராதாகிருஷ்ணன் நாளை பல்வேறு நிகழ்ச்சிகளில் பங்கேற்கிறார். காலையில் எம்.ஜி.ஆர். மருத்துவப் பல்கலைக்கழகப் பட்டமளிப்பு விழாவிலும், மாலையில் கலைவாணர் அரங்கில் நடைபெறும் பாராட்டு விழாவிலும் அவர் கலந்து கொள்கிறார். துணை ஜனாதிபதியின் வருகையை முன்னிட்டுச் சென்னையில் அவர் செல்லும் பாதைகள் மற்றும் விழா நடைபெறும் இடங்களைச் சுற்றியுள்ள பகுதிகளில் ட்ரோன்கள் மற்றும் ஆளில்லா விமானங்கள் பறக்கத் தடை விதிக்கப்பட்டுள்ளதுடன், பலத்த போலீஸ் பாதுகாப்பும் போடப்பட்டுள்ளது.

துணை ஜனாதிபதி சி.பி. ராதாகிருஷ்ணன் நாளை வெள்ளிக்கிழமை ஒருநாள் பயணமாகச் சென்னைக்கு வருகை தருகிறார். இதற்காகச் சென்னை விமான நிலையத்தில் அவருக்கு பாஜக மற்றும் குடியிருப்பு நலச் சங்கங்கள் சார்பில் உற்சாக வரவேற்பு அளிக்கப்பட உள்ளது. நாளை காலை கிண்டியில் உள்ள எம்.ஜி.ஆர். மருத்துவப் பல்கலைக்கழகத்தில் நடைபெறும் பட்டமளிப்பு விழாவில் பங்கேற்கும் அவர், மாணவ, மாணவிகளுக்குப் பட்டங்களை வழங்கி உரையாற்றுகிறார். இதனைத் தொடர்ந்து, மாலை 5 மணி அளவில் சேப்பாக்கம் கலைவாணர் அரங்கில் ‘எம்.ஜி.ஆர் அறக்கட்டளை’ சார்பில் அவருக்குப் பிரம்மாண்ட பாராட்டு விழா நடைபெறுகிறது.

இதையும் படிங்க: புதுவை மண்ணோடு எனக்கு தொப்புள்கொடி உறவு..!! டெல்லியில் உங்கள் குரலாக ஒலிப்பேன் - குடியரசு துணை தலைவர் நெகிழ்ச்சி!

முன்னாள் அமைச்சர் ஹண்டே தலைமையில் நடைபெறும் இந்தப் பாராட்டு விழாவில், எம்.ஜி.ஆர் பல்கலைக்கழக வேந்தர் ஏ.சி. சண்முகம் முன்னிலை வகிக்கிறார். இவ்விழாவில் மத்திய இணை அமைச்சர் எல். முருகன், இசைஞானி இளையராஜா உள்ளிட்ட முக்கியப் பிரமுகர்கள் பங்கேற்றுத் துணை ஜனாதிபதியைக் கௌரவிக்க உள்ளனர். ஏற்கனவே இருமுறை திட்டமிடப்பட்டுப் பல்வேறு காரணங்களால் தள்ளிப்போன இந்தப் பாராட்டு விழா, நாளை இறுதியாக நடைபெற உள்ளதால் ஏற்பாடுகள் மிகத் தீவிரமாகச் செய்யப்பட்டுள்ளன. கடந்த அக்டோபரில் கோவைக்கும், சமீபத்தில் புதுச்சேரி மற்றும் ராமேஸ்வரத்திற்கும் பயணம் மேற்கொண்ட துணை ஜனாதிபதி, தற்போது சென்னைக்கு வருவது அரசியல் வட்டாரத்தில் முக்கியத்துவம் பெற்றுள்ளது.

பாதுகாப்பு ஏற்பாடுகளின் ஒரு பகுதியாக, துணை ஜனாதிபதி பயணம் செய்யும் வழித்தடங்களில் ட்ரோன்கள் பறக்கக் காவல்துறை முழுமையாகத் தடை விதித்துள்ளது. மீறுபவர்கள் மீது கடும் சட்ட நடவடிக்கை எடுக்கப்படும் எனச் சென்னை மாநகரக் காவல் ஆணையர் எச்சரிக்கை விடுத்துள்ளார். கலைவாணர் அரங்கம் மற்றும் அவர் தங்கும் இடங்களைச் சுற்றிலும் ஐந்தடுக்குக் காவல் பாதுகாப்பு போடப்பட்டுள்ளது. அண்மைக்காலமாகப் பல்வேறு மக்கள் நலத் திட்டங்களைத் தொடங்கி வைத்து வரும் துணை ஜனாதிபதி, புதுச்சேரியில் ஸ்மார்ட் சிட்டி திட்டத்தின் கீழ் கட்டப்பட்ட குடியிருப்புகளைப் பயனாளிகளுக்கு வழங்கியது குறிப்பிடத்தக்கது.

இதையும் படிங்க: துணை குடியரசுத் தலைவர் பங்கேற்பு! டிச. 29-ல் புதுச்சேரி பல்கலைக்கழகப் பட்டமளிப்பு விழா: முக்கிய அறிவிப்பு வெளியீடு!