மும்பை இந்தியன்ஸை வீழ்த்தி சென்னை அபார வெற்றி! சஞ்சு சாம்சனின் சதம் மற்றும் பந்துவீச்சில் அசத்திய சிஎஸ்கே!

ஐபிஎல் 2026 தொடரின் மிகவும் எதிர்பார்க்கப்பட்ட சென்னை சூப்பர் கிங்ஸ் (CSK) மற்றும் மும்பை இந்தியன்ஸ் (MI) அணிகளுக்கு இடையிலான ஆட்டத்தில் சென்னை அணி 103 ரன்கள் வித்தியாசத்தில் அபார வெற்றி பெற்றது. மும்பை வான்கடே மைதானத்தில் நடைபெற்ற இந்தப் போட்டியில், சென்னை அணி நிர்ணயித்த இமாலய இலக்கை எட்ட முடியாமல் மும்பை அணி திணறித் தோல்வியைத் தழுவியது.

டாஸ் வென்ற மும்பை அணி முதலில் பந்துவீச்சைத் தேர்வு செய்தது. சென்னை அணியின் விக்கெட் கீப்பர் பேட்டர் சஞ்சு சாம்சன், தொடக்க வீரராகக் களமிறங்கி இறுதிவரை ஆட்டமிழக்காமல் 101 ரன்கள் குவித்தார்.
இன்னிங்ஸின் கடைசி பந்தில் தனது சதத்தைப் பூர்த்தி செய்த சஞ்சு, சென்னை அணி 20 ஓவர்கள் முடிவில் 207/6 ரன்கள் குவிக்க முக்கியக் காரணமாக இருந்தார்.

ரசிகர்கள் ஆவலோடு எதிர்பார்த்த எம்.எஸ். தோனி மற்றும் ரோஹித் சர்மா ஆகிய இருவருமே உடல் தகுதி (Fitness issues) காரணமாக இன்றைய போட்டியில் விளையாடவில்லை. இது போட்டியில் ஒரு சிறிய தொய்வை ஏற்படுத்தியிருந்தாலும், சஞ்சுவின் ஆட்டம் அதனை ஈடுகட்டியது.

இதையும் படிங்க: கடைசி ஓவரில் கைநழுவிய வெற்றி! 10 ரன்கள் வித்தியாசத்தில் சென்னை சூப்பர் கிங்ஸ் தோல்வி!

208 ரன்கள் என்ற கடினமான இலக்கை நோக்கிப் பயணித்த மும்பை அணிக்கு ஆரம்பமே அதிர்ச்சியாக அமைந்தது. சென்னை அணியின் பந்துவீச்சாளர் அகீல் ஹொசைன் ஆரம்பத்திலேயே இரண்டு முக்கிய விக்கெட்டுகளை வீழ்த்தி மும்பையை மிரட்டினார்.

முகேஷ் குமார்  மற்றுமொரு விக்கெட்டை வீழ்த்த, மும்பை அணி பவர்-பிளே ஓவர்களிலேயே தடுமாறியது. நட்சத்திர வீரர்களான சூர்யகுமார் யாதவ் மற்றும் திலக் வர்மா ஆகியோரால் அணியை மீட்பதற்கான அதிரடியை வெளிப்படுத்த முடியவில்லை.

முந்தைய போட்டிகளில் சற்று தடுமாறி வந்த சென்னை அணி, இந்த அதிரடி வெற்றியின் மூலம் மீண்டும் தனது வெற்றிப் பாதைக்குத் திரும்பியுள்ளது. மறுபுறம், குஜராத் அணிக்கு எதிராகக் கண்ட வெற்றி வேகத்தைத் தக்கவைக்க முடியாமல் மும்பை அணி மீண்டும் சறுக்கலைச் சந்தித்துள்ளது. வான்கடே மைதானத்தில் சென்னை வீரர்களின் இந்த அபார வெற்றி ரசிகர்களை உற்சாகத்தில் ஆழ்த்தியுள்ளது.

இதையும் படிங்க: CSK அணிக்கு முக்கிய பின்னடைவு..!! IPL தொடரிலிருந்து விலகும் கலீல் அகமது..!! காரணம் இதுதானாம்..!!