டெல்லியை வீழ்த்திய சென்னை 8 விக்கெட்டுகள் வித்தியாசத்தில் சிஎஸ்கே அபார வெற்றி!

ஐபிஎல் 2026 தொடரின் இன்றைய விறுவிறுப்பான லீக் போட்டியில், டெல்லி கேபிடல்ஸ் அணியை எதிர்கொண்ட சென்னை சூப்பர் கிங்ஸ் அணி 8 விக்கெட்டுகள் வித்தியாசத்தில் அபார வெற்றி பெற்றுள்ளது. பேட்டிங் மற்றும் பந்துவீச்சு என இரண்டிலும் சம பலத்துடன் செயல்பட்ட சென்னை வீரர்கள், டெல்லி அணியின் சவாலை முறியடித்து இந்த வெற்றியை ஈட்டியுள்ளனர்.

டெல்லியில் நடைபெற்ற இந்தப் போட்டியில் முதலில் ஆடிய டெல்லி கேபிடல்ஸ் அணி, ஒரு கட்டத்தில் 69 ரன்களுக்கு 5 விக்கெட்டுகளை இழந்து திணறியது. நடுவரிசை வீரர்கள் சொற்ப ரன்களில் ஆட்டமிழந்த நிலையில், சமீர் ரிஸ்வி (40*) மற்றும் டிரிஸ்டன் ஸ்டப்ஸ் (38) ஜோடி ஆறாவது விக்கெட்டுக்கு 65 ரன்கள் சேர்த்து அணியைக் மீட்டனர். இறுதியில் டெல்லி அணி 20 ஓவர்கள் முடிவில் 7 விக்கெட்டுகள் இழப்பிற்கு 155 ரன்கள் எடுத்தது. சிஎஸ்கே தரப்பில் நூர் அகமது இரண்டு விக்கெட்டுகளை வீழ்த்தினார்.

இதையும் படிங்க: ஐபிஎல் 2026: அதிரடி காட்டிய மும்பை இந்தியன்ஸ்..!! மண்ணை கவ்விய லக்னோ சூப்பர் ஜெயண்ட்ஸ்..!!

156 ரன்கள் என்ற இலக்கை நோக்கி விளையாடிய சென்னை அணிக்கு, சஞ்சு சாம்சன் அபாரமான ஆட்டத்தை வெளிப்படுத்தினார். அவர் 52 பந்துகளில் 7 பவுண்டரிகள் மற்றும் 6 சிக்ஸர்களுடன் 87 ரன்கள் எடுத்து ஆட்டமிழக்காமல் அணியை வெற்றிக்கு அழைத்துச் சென்றார். அவருக்கு உறுதுணையாக கார்த்திக் சர்மா 41 ரன்கள் பங்களித்தார். டி.நடராஜன் மற்றும் லுங்கி நிகிடி ஓவர்களில் சிக்ஸர் மற்றும் பவுண்டரிகளைப் பறக்கவிட்டு, 17.3 ஓவர்களிலேயே சென்னை அணி இலக்கை எட்டியது.

தமிழகச் சட்டமன்றத் தேர்தல் முடிவுகளில் தமிழக வெற்றிக் கழகத்தின் வெற்றி ஒருபுறம் கொண்டாடப்பட்டு வரும் வேளையில், விளையாட்டுத் திடலில் சென்னை சூப்பர் கிங்ஸ் அணியின் இந்த வெற்றி சிஎஸ்கே ரசிகர்களுக்கு இரட்டிப்பு மகிழ்ச்சியை அளித்துள்ளது. இந்த வெற்றியின் மூலம் சென்னை அணியின் நிகர ரன் ரேட் (NRR) கணிசமாக உயர்ந்துள்ளது.

இதையும் படிங்க: சிஎஸ்கே அதிரடி வெற்றி! மும்பையை வீழ்த்தி ருதுராஜ் கெய்க்வாட் படை அபார சாதனை!