அபிஷேக் ஷர்மா அதிரடி சதம்! டெல்லியை 47 ரன்கள் வித்தியாசத்தில் வீழ்த்தி ஹைதராபாத் ஹாட்ரிக் வெற்றி!

ஐபிஎல் 2026 தொடரின் 31-வது லீக் போட்டியில், டெல்லி கேப்பிடல்ஸ் (DC) அணியை 47 ரன்கள் வித்தியாசத்தில் வீழ்த்தி சன்ரைசர்ஸ் ஹைதராபாத் (SRH) அணி அபார வெற்றி பெற்றது. தனது சொந்த மண்ணான ராஜீவ் காந்தி சர்வதேச மைதானத்தில் நடைபெற்ற இந்தப் போட்டியில், அபிஷேக் ஷர்மாவின் ருத்ரதாண்டவம் ஹைதராபாத் அணிக்குத் தொடர்ச்சியான 3-வது வெற்றியைத் தேடித்தந்தது.

டாஸ் வென்ற டெல்லி கேப்பிடல்ஸ் அணி முதலில் பந்துவீச்சைத் தேர்வு செய்தது. ஆனால், ஹைதராபாத் தொடக்க வீரர் அபிஷேக் ஷர்மா டெல்லி பந்துவீச்சாளர்களைத் திணறடித்தார். வெறும் 68 பந்துகளில் 135 ரன்கள் குவித்து (அவுட் இல்லை) அபிஷேக் மிரட்டினார். இதில் 10 பவுண்டரிகள் மற்றும் 10 சிக்ஸர்கள் அடங்கும். தனது 2-வது ஐபிஎல் சதத்தை 47 பந்துகளிலேயே எட்டிப் பிடித்தார் அபிஷேக். இதன் மூலம் விராட் கோலியின் டி20 சத சாதனையை அவர் சமன் செய்துள்ளார். ஹைதராபாத் அணி 20 ஓவர்கள் முடிவில் 2 விக்கெட் இழப்பிற்கு 242 ரன்கள் என்ற மெகா இலக்கை நிர்ணயித்தது. இறுதி நேரத்தில் கிளாசன் 13 பந்துகளில் 37* ரன்கள் சேர்த்தார்.

243 ரன்கள் என்ற கடினமான இலக்கை நோக்கி ஆடிய டெல்லி அணிக்கு, ஹைதராபாத் பந்துவீச்சாளர்கள் கடும் நெருக்கடி கொடுத்தனர்: ஈஷன் மலிங்கா தனது சிறப்பான பந்துவீச்சால் (4/32) நிதீஷ் ராணா (57) மற்றும் டேவிட் மில்லர் ஆகிய முக்கிய விக்கெட்டுகளைச் சாய்த்தார். கடைசி ஓவரில் 3 விக்கெட்டுகளை வீழ்த்தி (3/12) டெல்லி அணியின் தோல்வியை உறுதி செய்தார் ஹர்ஷ் துபே.

இதையும் படிங்க: ஐபிஎல் 2026: திலக் வர்மாவின் அதிரடி சதம்! குஜராத்தை 99 ரன்கள் வித்தியாசத்தில் வீழ்த்தியது மும்பை!

டெல்லி தரப்பில் நிதீஷ் ராணா 57 ரன்களும், கே.எல். ராகுல் 37 ரன்களும் எடுத்துப் போராடினர். ஒரு கட்டத்தில் 107/1 என வலுவாக இருந்த டெல்லி அணி, மலிங்காவின் பந்துவீச்சால் நிலைகுலைந்தது. இறுதியில் டெல்லி அணி 20 ஓவர்களில் 9 விக்கெட் இழப்பிற்கு 195 ரன்கள் மட்டுமே எடுத்துத் தோல்வியைத் தழுவியது.

இந்த வெற்றியின் மூலம் சன்ரைசர்ஸ் ஹைதராபாத் அணி புள்ளிப்பட்டியலில் 3-வது இடத்திற்கு முன்னேறியுள்ளது. 7 போட்டிகளில் ஆடிய டெல்லி அணிக்கு இது 4-வது தோல்வியாகும்.

இதையும் படிங்க: கடைசி ஓவரில் கைநழுவிய வெற்றி! 10 ரன்கள் வித்தியாசத்தில் சென்னை சூப்பர் கிங்ஸ் தோல்வி!