கேரள சட்டமன்றத் தேர்தல் 2026-ன் வாக்குப்பதிவு நிறைவடைந்துள்ள நிலையில், அம்மாநிலத்தின் அரசியல் வரலாற்றில் வழக்கமாக நடைபெறும் 'மாறி மாறி ஆட்சி அமைக்கும்' நடைமுறை மீண்டும் திரும்பப்போவதை எக்ஸிட் போல் முடிவுகள் சுட்டிக்காட்டுகின்றன. கடந்த 2021-ல் தொடர்ச்சியாக இரண்டாவது முறை வெற்றி பெற்று வரலாறு படைத்த முதலமைச்சர் பினராயி விஜயன் தலைமையிலான இடதுசாரி முன்னணியின் (LDF) சாம்ராஜ்யம் இந்த முறை பலத்த சறுக்கலைச் சந்திக்கும் எனத் தெரிகிறது. 

மாறாக, காங்கிரஸ் தலைமையிலான ஐக்கிய ஜனநாயக முன்னணி (UDF) கணிசமான இடங்களைப் பிடித்து ஆட்சியைத் தன்வசப்படுத்தும் என முன்னணி நிறுவனங்கள் கணித்துள்ளன. 140 தொகுதிகள் கொண்ட கேரளச் சட்டமன்றத்தில் ஆட்சி அமைக்க 71 இடங்கள் தேவை என்ற நிலையில், பெரும்பாலான கணிப்புகள் காங்கிரஸ் கூட்டணிக்கு 70 முதல் 90 இடங்கள் வரை கிடைக்க வாய்ப்புள்ளதாகத் தெரிவித்துள்ளன.

குறிப்பாக, Axis My India நிறுவனம் காங்கிரஸ் கூட்டணிக்கு 78 முதல் 90 இடங்களை வழங்கி, அவர்கள் பெரும்பான்மையுடன் ஆட்சி அமைப்பார்கள் எனக் கணித்துள்ளது. இடதுசாரிகளுக்கு 49 முதல் 62 இடங்கள் மட்டுமே கிடைக்கும் என அந்த நிறுவனம் தெரிவித்துள்ளது. அதேபோல், P-MARQ நிறுவனம் காங்கிரஸ் கூட்டணிக்கு 71 முதல் 79 இடங்களையும், இடதுசாரிகளுக்கு 62 முதல் 69 இடங்களையும் வழங்கியுள்ளது. Matrize நிறுவனத்தின் கணிப்புப்படி காங்கிரஸ் கூட்டணி 70 முதல் 75 இடங்களைப் பெற்று ஆட்சியைப் பிடிக்க வாய்ப்புள்ளது. வேலையில்லாத் திண்டாட்டம் மற்றும் அரசுக்கு எதிரான சில அதிருப்தி அலைகள் காங்கிரஸ் கூட்டணிக்குச் சாதகமாக மாறியுள்ளதாக அரசியல் ஆய்வாளர்கள் கருதுகின்றனர். இது கேரள அரசியலில் மீண்டும் ஒரு புதிய மாற்றத்திற்கான தொடக்கமாகப் பார்க்கப்படுகிறது.

இதையும் படிங்க: கேரளாவின் திரிச்சூர் பூரம் பட்டாசு குடோனில் பயங்கர வெடி விபத்து! 13 பேர் உயிரிழப்பு!

பாஜக தலைமையிலான என்டிஏ கூட்டணியைப் பொறுத்தவரை, கேரளாவில் தனது கால்தடத்தைப் பதிக்கத் தீவிர முயற்சி மேற்கொண்ட போதிலும், இந்தத் தேர்தலிலும் பெரிய அளவில் இடங்களைக் கைப்பற்ற முடியாது என்றே எக்ஸிட் போல் முடிவுகள் கூறுகின்றன. Matrize நிறுவனம் பாஜகவிற்கு 3 முதல் 5 இடங்கள் வரை கிடைக்க வாய்ப்புள்ளதாகத் தெரிவித்துள்ளது. 

பிற நிறுவனங்கள் 1 முதல் 4 இடங்கள் வரை மட்டுமே பாஜகவிற்கு வழங்கியுள்ளன. வாக்கு எண்ணிக்கை நடைபெறவுள்ள மே 4-ஆம் தேதி, பத்தாண்டுகளுக்குப் பிறகு காங்கிரஸ் மீண்டும் அரியணை ஏறுமா அல்லது இடதுசாரிகள் கணிப்புகளைப் பொய்யாக்குவார்களா என்பது தெரிந்துவிடும். தற்போதைய சூழலில், கேரள மக்கள் மீண்டும் காங்கிரஸ் பக்கமே சாய்ந்துள்ளதாக இந்தத் தேர்தலுக்குப் பிந்தைய கருத்துக்கணிப்புகள் ஒருமித்த கருத்தை முன்வைக்கின்றன.

இதையும் படிங்க: வால்பாறை மலைப்பாதையில் கோர விபத்து! சுற்றுலா வேன் கவிழ்ந்து 7 பேர் உயிரிழப்பு!