தமிழ் சினிமாவின் காமெடி உலகில் தனி இடம் பிடித்துள்ளார் நடிகர் யோகி பாபு. அவரது தனித்துவமான உடல் மொழி, நேரடியான நகைச்சுவை மற்றும் எளிமையான நடிப்பு ஆகியவை ரசிகர்களின் மனதை வென்றுள்ளன. காமெடி கதாபாத்திரங்கள் மட்டுமின்றி, இப்போது கதாநாயகனாகவும் பல படங்களில் நடித்து வருகிறார். குடும்ப ரசிகர்கள் உட்பட அனைவரிடமும் நல்ல வரவேற்பைப் பெற்றுள்ள அவர், தற்போது மிகவும் பிஸியான நடிகர்களில் ஒருவராக திகழ்கிறார்.

இந்நிலையில், யோகி பாபு முக்கிய கதாபாத்திரத்தில் நடித்துள்ள புதிய திரைப்படம் ‘கெணத்த காணோம்’ இன்று (மார்ச் 13) திரையரங்குகளில் வெளியாகியுள்ளது. கிராம வாழ்க்கையை மையமாகக் கொண்ட இந்த நகைச்சுவை நிறைந்த படம், அங்குள்ள சுவாரஸ்யமான சம்பவங்கள், மனிதர்களின் இயல்பான உறவுகள் மற்றும் சில சமூக அம்சங்களை வேடிக்கையாக வெளிப்படுத்தும் வகையில் உருவாக்கப்பட்டுள்ளது.

யோகி பாபுவின் இயல்பான காமெடி நடிப்பு இந்தப் படத்திலும் ரசிகர்களை சிரிக்க வைக்கும் என எதிர்பார்க்கப்படுகிறது. படத்தின் வெளியீட்டை முன்னிட்டு, பல திரையரங்குகளில் சிறப்பு காட்சிகள் ஏற்பாடு செய்யப்பட்டிருந்தன. அவற்றில் ஒன்றில் கலந்து கொள்ள மூத்த நடிகர் சிவகுமார் திரையரங்கிற்கு வந்திருந்தார். அப்போது, ரசிகர்கள் மற்றும் ஊடகங்களின் கவனம் முழுவதும் இருவர் மீதும் திரும்பியது. 

இதையும் படிங்க: மறைந்த இயக்குநர் மகளுக்கு உதவித்தொகை..! அரங்கையே கண்கலங்க வைத்த நடிகர் யோகிபாபு..!

யோகி பாபு சிவகுமாரின் காதோரம் ஏதோ ஒன்றை மெல்லிய குரலில் கூறியதாக தகவல்கள் தெரிவிக்கின்றன. அதைக் கேட்ட சிவகுமார் சற்று கடுப்பான முகபாவனையுடன், "செருப்பு பிஞ்சிரும்..." என்று திட்டியவாறு, யோகி பாபுவின் கன்னத்தில் செல்லமாகத் தட்டியதாக அங்கிருந்தவர்கள் கூறுகின்றனர். இந்த தருணம் சிலரால் வீடியோவாகப் பதிவு செய்யப்பட்டு, சமூக வலைதளங்களில் வேகமாகப் பரவியது. இதைப் பார்த்த ரசிகர்கள், "யோகி பாபு என்ன சொல்லியிருப்பார்?", "சிவகுமார் ஏன் டென்ஷனானார்?" என்ற கேள்விகளை எழுப்பி வருகின்றனர்.

https://www.threads.com/@galattadotcom/post/DVz7VvNCRDu?xmt=AQF0YPCt25nohALlzJarkYhhJrtqJmdxZpy6A5oFqKnAbg

சிலர் இதை வெறும் வேடிக்கையான, சிரிப்பூட்டும் நிகழ்வாகவே பார்க்கின்றனர். சிவகுமார் தனது கருத்துகளை எப்போதும் வெளிப்படையாகவும் நேரடியாகவும் தெரிவிப்பவர் என்பது அனைவரும் அறிந்த உண்மை. பிடிக்காத விஷயம் என்றால் யாராக இருந்தாலும் முகத்துக்கு நேராகச் சொல்லிவிடுவார். சில ஆண்டுகளுக்கு முன், ஒரு ரசிகர் அனுமதியின்றி செல்ஃபி எடுக்க முயன்றபோது, கோபமடைந்து அவரது செல்போனை உடைத்த சம்பவம் இன்னும் சமூக வலைதளங்களில் பேசப்படுவதே அதற்கு சான்று.

நடிகராக மட்டுமல்லாது, எழுத்தாளர், ஓவியர், சிறப்புரையாளர் என பன்முகத் திறமை கொண்டவர் சிவகுமார். பள்ளி, கல்லூரி நிகழ்ச்சிகளில் கலந்து கொண்டு மாணவர்களுக்கு வாழ்க்கைப் பாடங்கள், ஒழுக்கம், முயற்சி மற்றும் கலை பற்றிய அனுபவங்களைப் பகிர்வது அவரது வழக்கம். அவரது பேச்சு பல இளைஞர்களுக்கு உத்வேகமாக உள்ளது.இருப்பினும், இன்றைய சம்பவம் ரசிகர்களிடையே சுவாரஸ்யமான விவாதத்தை ஏற்படுத்தியுள்ளது.

அது வெறும் நகைச்சுவை தருணமா அல்லது வேறு ஏதேனும் காரணமா என்பதற்கு அதிகாரப்பூர்வ விளக்கம் எதுவும் வெளியாகவில்லை. எதுவாக இருந்தாலும், யோகி பாபு – சிவகுமார் இடையேயான இந்த சந்திப்பு, ‘கெணத்த காணோம்’ பட வெளியீட்டு கொண்டாட்டத்துக்கு மேலும் சுவை சேர்த்துள்ளது.

இதையும் படிங்க: தாவணி பாவாடையில் இருந்து மாடர்ன் ட்ரெஸில் சிங்கப்பெண்ணே ஆனந்தி..! குழந்தைத்தனமான கியூட் கிளிக்ஸ்..!