தமிழ் சினிமாவின் வரலாற்றில் தனி சகாப்தத்தை உருவாக்கிய இயக்குநர் இமயம் பாரதிராஜா காலமான செய்தி, தமிழகம் முழுவதும் பெரும் சோகத்தை ஏற்படுத்தியுள்ளது. கிராமத்து மக்களின் வாழ்க்கையை வெள்ளித்திரையில் உயிரோட்டமாக பதிவு செய்து, தமிழ் திரைப்பட மொழியையே மாற்றியமைத்த அந்த மாபெரும் கலைஞரின் மறைவு, திரையுலகை மட்டுமல்லாமல் பொதுமக்களையும் ஆழ்ந்த துயரத்தில் ஆழ்த்தியுள்ளது.

84 வயதான பாரதிராஜா, கடந்த சில மாதங்களாக உடல்நலக் குறைவால் அவதிப்பட்டு வந்தார். குறிப்பாக கடந்த ஆண்டு மார்ச் மாதம் அவரது மகனும் நடிகருமான மனோஜ் திடீரென உயிரிழந்த சம்பவம், அவரை மனரீதியாக கடுமையாக பாதித்ததாக கூறப்படுகிறது. மகனை இழந்த துயரிலிருந்து முழுமையாக மீள முடியாத நிலையில், அவரது உடல்நிலையும் தொடர்ந்து பாதிக்கப்பட்டது.

அதனைத் தொடர்ந்து சென்னை நீலாங்கரையில் உள்ள அவரது இல்லத்தில் மருத்துவர்கள் கண்காணிப்பில் சிகிச்சை அளிக்கப்பட்டு வந்தது. வயது முதிர்வு மற்றும் உடல்நலக் கோளாறுகள் காரணமாக தொடர்ந்து சிகிச்சை பெற்று வந்த அவர், இன்று அதிகாலை சிகிச்சைப் பலனின்றி காலமானார். அவரது மறைவு செய்தி வெளியான சில நிமிடங்களிலேயே திரையுலகினர், அரசியல் தலைவர்கள் மற்றும் ரசிகர்கள் மத்தியில் அதிர்ச்சியை ஏற்படுத்தியது.

இதையும் படிங்க: அரசியலுக்கு வந்துடுங்க ப்ளீஸ்..!! கருணாநிதி, ஜெயலலிதா அழைத்தும் வராத பாரதிராஜா.. என்ன காரணம் தெரியுமா..!

1977-ஆம் ஆண்டு வெளியான ‘16 வயதினிலே’ திரைப்படத்தின் மூலம் இயக்குநராக அறிமுகமான பாரதிராஜா, தனது முதல் படத்திலேயே தமிழ் சினிமாவின் பார்வையை மாற்றியவர் என்ற பெருமையை பெற்றார். அதற்கு முன்பு பெரும்பாலான திரைப்படங்கள் ஸ்டூடியோவுக்குள் உருவாக்கப்பட்ட நிலையில், உண்மையான கிராமங்களையும் இயற்கை சூழல்களையும் நேரடியாக திரையில் பதிவு செய்தார். இதன் மூலம் தமிழ் சினிமாவை நகர மையக் கதைகளிலிருந்து கிராமிய வாழ்வியல் நோக்கி திருப்பிய முக்கிய படைப்பாளியாக அவர் அறியப்பட்டார்.

‘கிழக்கே போகும் ரயில்’, ‘அலைகள் ஓய்வதில்லை’, ‘முதல் மரியாதை’, ‘வேதம் புதிது’, ‘கருத்தம்மா’, ‘கடலோரக் கவிதைகள்’ உள்ளிட்ட அவரது பல படைப்புகள் இன்று வரை தமிழ் திரைப்பட வரலாற்றில் முக்கிய இடத்தைப் பிடித்துள்ளன. காதல், உறவுகள், சாதி, சமூக அநீதி, பெண்களின் நிலை, கிராமத்து வாழ்க்கை ஆகியவற்றை இயல்பாகவும் உணர்வுபூர்வமாகவும் பதிவு செய்தவர் என்ற பெயரை அவர் பெற்றிருந்தார்.

அவரது மறைவையொட்டி சென்னை நீலாங்கரையில் உள்ள இல்லத்தில் பொதுமக்கள் அஞ்சலிக்காக உடல் வைக்கப்பட்டுள்ளது. காலை முதலே ஆயிரக்கணக்கான ரசிகர்கள் அங்கு குவிந்து அஞ்சலி செலுத்தி வருகின்றனர். திரையுலகின் முன்னணி நடிகர்கள், இயக்குநர்கள், தயாரிப்பாளர்கள், தொழில்நுட்பக் கலைஞர்கள் மற்றும் அரசியல் தலைவர்களும் தொடர்ந்து வந்து இறுதி மரியாதை செலுத்தி வருகின்றனர்.

இந்த நிலையில், பாரதிராஜாவின் உடலுக்கு முழு அரசு மரியாதை வழங்கப்படும் என்று தமிழக முதலமைச்சர் விஜய் அறிவித்துள்ளார். தமிழ் சினிமாவிற்கு அவர் ஆற்றிய பங்களிப்பை கருத்தில் கொண்டு, அரசின் சார்பில் முழுமையான மரியாதையுடன் இறுதி அஞ்சலி செலுத்த ஏற்பாடுகள் செய்யப்பட்டுள்ளதாக அதிகாரிகள் தெரிவித்துள்ளனர். இதற்கிடையில், பாரதிராஜாவின் இறுதிச்சடங்கு குறித்த முக்கிய தகவலையும் கவிஞர் வைரமுத்து வெளியிட்டுள்ளார். செய்தியாளர்களிடம் பேசிய அவர், பாரதிராஜாவின் மறைவு ஒரு தனிநபரின் இழப்பு மட்டுமல்ல; தமிழ் கலாச்சாரத்தின் ஒரு காலகட்டத்தின் முடிவு என்றும் குறிப்பிட்டார்.

உருக்கமாக பேசிய வைரமுத்து, “பாரதிராஜாவின் புகழ் ஓங்கும். கலைத்துறை மட்டுமல்ல, பொதுமக்களும் அவருக்காக இரங்கல் தெரிவிக்கிறார்கள். ஏனென்றால் ஒவ்வொரு தனிமனித வாழ்வையும் தனது கலைப் படைப்புகளால் பாதித்த பெருங்கலைஞன் அவர். அவரது பெயர் வாழ்க. அவரது புகழ் நிலைக்கட்டும்” என்று கூறினார். மேலும், “மரணம் என்பது அவரது பௌதிக உடலுக்குத்தான். அவரது கலைக்கு அல்ல. அவர் உருவாக்கிய கலைப் படைப்புகள் காலம் கடந்தும் பேசப்படும். அவர் மறைந்துவிட்டார் என்று சொல்ல முடியாது. அவரது திரைப்படங்கள் இருக்கும் வரை அவர் வாழ்ந்துகொண்டே இருப்பார்” என்று வைரமுத்து தெரிவித்தார்.

இந்த வார்த்தைகள் அங்கு கூடியிருந்த பலரையும் நெகிழ்ச்சியில் ஆழ்த்தின. சமூக வலைதளங்களிலும் வைரமுத்துவின் இந்த கருத்துகள் அதிகமாக பகிரப்பட்டு வருகின்றன. அதேபோல், பாரதிராஜாவின் இறுதி விருப்பத்தையும் அவரது குடும்பத்தினர் நிறைவேற்ற உள்ளனர். பிறந்த மண்ணின் மீது எப்போதும் அளவற்ற பாசம் கொண்டிருந்த பாரதிராஜா, தனது சொந்த ஊருடன் இறுதி வரை நெருங்கிய தொடர்பை வைத்திருந்தார். அதனால் அவரது உடல் சொந்த மண்ணிலேயே நல்லடக்கம் செய்யப்பட உள்ளது.

இதுகுறித்து வைரமுத்து கூறுகையில், தேனி மாவட்டம் வத்தலக்குண்டு அருகே கொடைக்கானல் பிரிவுப் பகுதியில் உள்ள காட்ரோட்டில் அமைந்துள்ள பாரதிராஜாவின் பண்ணை வீட்டில் நாளை பிற்பகல் 3 மணியளவில் அவரது உடல் நல்லடக்கம் செய்யப்படும் என்று தெரிவித்தார். சென்னை நீலாங்கரை இல்லத்தில் இன்று இரவு 9 மணி வரை பொதுமக்கள் அஞ்சலிக்காக அவரது உடல் வைக்கப்படும். அதன் பின்னர், அரசு மரியாதையுடன் அவரது உடல் சென்னை நகரிலிருந்து தேனி மாவட்டத்திற்கு எடுத்துச் செல்லப்படும்.

வழிநெடுகிலும் பொதுமக்கள் அஞ்சலி செலுத்தும் வகையில் ஏற்பாடுகள் செய்யப்படலாம் என்றும் தகவல்கள் வெளியாகியுள்ளன. தமிழ் சினிமாவை உலக அரங்கில் தனித்துவமாக அடையாளப்படுத்திய பாரதிராஜா, ஒரு இயக்குநராக மட்டுமல்லாமல், ஒரு காலத்தின் குரலாகவும் இருந்தார். கிராமத்து மண்ணின் மணம், மனித உணர்வுகளின் ஆழம், சமூகத்தின் உண்மையான முகம் ஆகியவற்றை தனது கேமரா வழியாக உலகிற்கு காட்டிய அவர், இன்று உடலால் நம்மிடையே இல்லாவிட்டாலும், அவரது கலைப் படைப்புகள் தலைமுறைகளை கடந்தும் வாழும்.

அந்த வகையில், நாளை அவரது சொந்த மண்ணில் நடைபெறவுள்ள இறுதி பயணம், ஒரு மனிதரின் விடைபெறல் மட்டுமல்ல; தமிழ் சினிமாவின் ஒரு பொற்காலத்தை உருவாக்கிய மாபெரும் கலைஞருக்கு தமிழகம் செலுத்தும் இறுதி வணக்கமாகவும் அமைய உள்ளது.

இதையும் படிங்க: உலகை விட்டு மறைந்த பாசத்திற்குரிய பாரதிராஜா..!! தமிழக அரசுக்கு ஸ்பெஷல் ரெக்வஸ்ட் வைத்த இயக்குநர் ஆர்.கே.செல்வமணி..!