கன்னடத் திரைப்பட உலகை தேசிய அளவில் கவனத்திற்கு கொண்டு வந்த காந்தாரா படத்தின் மூலம் பெரும் வரவேற்பைப் பெற்ற நடிகைகளான ருக்மணி வசந்த் மற்றும் சப்தமி கவுடா, சமீபத்தில் வெளியிட்டுள்ள கூட்டு அறிக்கை திரைப்படத் துறையில் பரபரப்பை ஏற்படுத்தியுள்ளது. பொதுநிகழ்ச்சிகள், சினிமா விழாக்கள் மற்றும் புரமோஷன் நிகழ்வுகளில் சில புகைப்படக்காரர்கள் பெண்கள் மீது தவறான கோணங்களில் கேமரா திருப்புவதாக அவர்கள் வெளிப்படையாக குற்றம் சாட்டியுள்ளனர்.

திரைப்பட உலகில் பிரபலங்களின் ஒவ்வொரு அசைவும் கேமரா கண்காணிப்பில் இருக்கும் நிலையில், அந்தக் கண்காணிப்பு எல்லைகளை மீறும்போது அது கலைஞர்களின் தனிமனித மரியாதையை பாதிக்கக்கூடும் என்பதைக் குறிப்பிடும் வகையில் இந்த பதிவுகள் வெளியாகியுள்ளன. குறிப்பாக பெண் நடிகைகள் கலந்து கொள்ளும் நிகழ்ச்சிகளில் தேவையற்ற ‘ஜூம்-இன்’ காட்சிகள் மற்றும் பொருத்தமற்ற கோணங்களில் எடுக்கப்படும் புகைப்படங்கள் சமூக வலைதளங்களில் வைரலாகும் சம்பவங்கள் அதிகரித்து வருவதாக அவர்கள் சுட்டிக்காட்டியுள்ளனர்.

இன்ஸ்டாகிராம் பக்கத்தில் வெளியிட்டுள்ள பதிவில், “திரைப்படத் துறையில் உள்ள பெண்களாக, தொடர்ச்சியான இந்த பிரச்சினையை எதிர்கொள்வதில் நாங்கள் ஒன்றுபட்டுள்ளோம். பொது நிகழ்வுகளில் பெண் நடிகைகளின் வீடியோக்கள் மற்றும் புகைப்படங்கள் மீண்டும் மீண்டும் தவறான கோணங்களில் படம் பிடிக்கப்பட்டு பரப்பப்படுகின்றன. தேவையற்ற ஜூம்-இன்கள் எங்கள் திறமையையும் கலைப்பணியையும் விட எங்கள் உடலை மையமாகக் கொண்டுள்ளன. சிலரால் மேற்கொள்ளப்படும் இந்த நடத்தை அவமரியாதைக்குரியது மற்றும் முற்றிலும் ஏற்றுக்கொள்ள முடியாதது,” என்று அவர்கள் தெரிவித்துள்ளார்.

இதையும் படிங்க: சின்னத்திரையில் என்ட்ரி கொடுக்கும் நடிகை அம்பிகா..! டிஆர்பி-யில் எகிறிய சீரியல்.. எது தெரியுமா..?

மேலும், “நாங்கள் எங்கள் கைவினைக்கும், எங்கள் சினிமாவிற்கும் இங்கே இருக்கிறோம். வேண்டுமென்றே செய்யப்படும் ஜூம்-இன்கள் மற்றும் பொருத்தமற்ற கோணங்களை நாம் தெளிவாகக் கண்டிக்கிறோம். இவை கண்ணியத்தின் வெளிப்படையான மீறல்கள்; அவற்றை இயல்பாக்கவோ அல்லது பொறுத்துக்கொள்ளவோ முடியாது. நிகழ்வுகளை பதிவு செய்பவர்கள் தொழில்முறை நெறிமுறைகள், அடிப்படை மரியாதை மற்றும் கண்ணியத்தை கடைபிடிக்க வேண்டும் என்று நாங்கள் எதிர்பார்க்கிறோம்.

இந்த எல்லையை நிர்ணயிப்பதில் நாங்கள் ஒன்றுபட்டுள்ளோம். இதுபோன்ற அனுபவத்தை சந்தித்த ஒவ்வொரு பெண்ணுடனும் நாங்கள் ஒற்றுமையுடன் நிற்கிறோம். மரியாதை கோருவதில் ஒருவருக்கொருவர் தொடர்ந்து ஆதரவளிப்போம்,” என வலியுறுத்தியுள்ளனர். இந்த பதிவு வெளியானதும், பல்வேறு திரை பிரபலங்களும் ரசிகர்களும் கருத்து தெரிவித்து ஆதரவு அளித்துள்ளனர். 

திரைப்பட விழாக்களில் ‘ரெட் கார்பெட்’ நிகழ்ச்சிகள் பெரும்பாலும் கவர்ச்சிகரமான உடை அணிவகுப்புகளால் கவனம் பெறுகின்றன. ஆனால் அதனைத் தவறாக பயன்படுத்தும் சிலர், கலைஞர்களின் சம்மதமின்றி உடலின் குறிப்பிட்ட பகுதிகளை மையப்படுத்தும் வகையில் படம் எடுப்பது குறித்து பல ஆண்டுகளாகவே குற்றச்சாட்டுகள் எழுந்து வருகின்றன. இதுபோன்ற செயல்கள் பெண்களின் தொழில்முறை அடையாளத்தை மறைத்து, அவர்களின் திறமைக்கு பதிலாக உடல் தோற்றத்தை முன்னிறுத்துகின்றன என்ற விமர்சனமும் நிலவுகிறது.

சினிமா விமர்சகர்கள் கூறுவதாவது, டிஜிட்டல் காலத்தில் ஒவ்வொரு புகைப்படமும் சில நொடிகளில் ஆயிரக்கணக்கான பார்வைகளைப் பெறும் சூழல் உருவாகியுள்ளது. அந்த வேகத்தில் பரவும் காட்சிகள், சம்பந்தப்பட்டவர்களின் மனநிலையையும், பொது பார்வையையும் பாதிக்கக்கூடும். எனவே, ஊடகங்கள் மற்றும் புகைப்படக்காரர்கள் தொழில்முறை ஒழுக்க நெறிகளை கடைபிடிப்பது அவசியம் என அவர்கள் வலியுறுத்துகின்றனர்.

பெண் நடிகைகள் தங்கள் அனுபவங்களை திறம்பட பகிர்ந்து கொள்ளத் தொடங்கியிருப்பது மாற்றத்திற்கான ஒரு முக்கிய அறிகுறியாக பார்க்கப்படுகிறது. கடந்த சில ஆண்டுகளில் பல மொழித் திரைப்படத் துறைகளிலும் இதே போன்ற பிரச்சினைகள் குறித்து குரல் எழுப்பப்பட்டுள்ளன. அந்த வரிசையில் ருக்மணி வசந்த் மற்றும் சப்தமி கவுடாவின் கூட்டு அறிக்கை, தென்னிந்திய திரைப்பட உலகில் பெண்கள் ஒன்றிணைந்து கண்ணியத்திற்காக குரல் கொடுக்கும் முயற்சியாகப் பார்க்கப்படுகிறது.

சமூக ஆர்வலர்கள் கூறுவதாவது, இது தனிப்பட்ட சம்பவமாக மட்டும் பார்க்கப்படக்கூடாது; பெண்கள் பொதுவெளியில் எதிர்கொள்ளும் பார்வை அரசியலின் ஒரு பகுதியாக இதை அணுக வேண்டும். கலைஞர்கள் பொதுமக்கள் முன் தோன்றுவது அவர்களின் தொழிலின் ஒரு பகுதியாக இருந்தாலும், அதனால் அவர்களின் தனிமனித உரிமைகள் தானாகவே குறையாது என்பதே இக்கருத்தின் மையப்புள்ளி.

மொத்தத்தில், ‘காந்தாரா’ படத்தின் மூலம் தேசிய அளவில் கவனம் பெற்ற இந்த இரு நடிகைகளின் தைரியமான நிலைப்பாடு, திரைப்படத் துறையில் பெண்களின் கண்ணியத்தைக் குறித்து ஒரு முக்கியமான விவாதத்தைத் தூண்டியுள்ளது. எதிர்காலத்தில் நிகழ்வுகளை பதிவு செய்யும் அனைவரும் தொழில்முறை நெறிமுறைகளை கடைபிடித்து, கலைஞர்களின் திறமைக்கு உரிய மரியாதையை வழங்குவார்களா என்பது தற்போது எழுந்துள்ள கேள்வியாக உள்ளது. இந்த விவாதம் ஒரு மாற்றத்தின் தொடக்கமாக அமையுமா என்பதை காலமே தீர்மானிக்க வேண்டும்.

இதையும் படிங்க: கல்யாணம் ஓவர்.. ஹனிமூன் ஸ்டார்ட்..! ஆனாலும் வெளிவர இருக்கும் 6 படங்கள்.. தியேட்டர்ல ராஷ்மிகாவின் மவுசு குறையலப்பா..!