டெமோக்ரட்டிக் ரிபப்ளிக் ஆஃப் காங்கோவின் கிழக்குப் பகுதிகளில் எபோலா வைரஸ் பரவல் தீவிரமடைந்துள்ளது. இதனால் பொது சுகாதார அமைச்சர் சாமுவேல் ரோஜர் கம்பா இன்று அதிர்ச்சியளிக்கும் தகவல்களை வெளியிட்டார். பாதிக்கப்பட்ட பகுதிகளில் இதுவரை 131 பேர் வரை உயிரிழந்துள்ளதாகவும், 513 பேருக்கு சந்தேகத்திற்குரிய தொற்று உறுதி செய்யப்பட்டுள்ளதாகவும் அவர் தெரிவித்தார்.

இந்த மரணங்கள் சந்தேக அடிப்படையிலானவை என்றும், உண்மையான காரணத்தை உறுதிப்படுத்த விசாரணைகள் முழு வீச்சில் நடைபெற்று வருவதாகவும் அமைச்சர் குறிப்பிட்டார். எபோலா, உலகின் மிகக் கொடிய வைரஸ் நோய்களில் ஒன்றாகக் கருதப்படுகிறது. இது தொற்று ஏற்பட்டவர்களின் உட்புற உறுப்புகளில் கடுமையான இரத்தப்போக்கை ஏற்படுத்தி, உறுப்பு செயலிழப்பு மற்றும் இறுதியில் மரணத்தை விளைவிக்கும் திறன் கொண்டது. 

உடல் திரவங்கள் மூலமாகவும், நெருங்கிய தொடர்பு மூலமாகவும் இது எளிதில் பரவும் தன்மை வாய்ந்தது.காங்கோவின் அண்டை நாடுகளான உகாண்டா மற்றும் தெற்கு சூடான் உள்ளிட்ட பகுதிகளுக்கும் இந்த வைரஸ் பரவும் அபாயம் இருப்பதாக சுகாதார வல்லுநர்கள் அஞ்சுகின்றனர். எல்லைப் பகுதிகளில் கண்காணிப்பு அதிகரிக்கப்பட்டுள்ளது. 

இதையும் படிங்க: மதுக்கடைகளுக்கு செக்.! செம்ம ஸ்பீடு... ஒரே வாரத்தில் 513 டாஸ்மாக்கை மூடிய விஜய் அரசு..!

இந்த நிலையில், உலக சுகாதார அமைப்பின் (WHO) தலைவர் டாக்டர் டெட்ரோஸ் அதானோம் கெப்ரேயசஸ் (Antonio Tedros) எக்ஸ் (முன்பு ட்விட்டர்) தளத்தில் முக்கிய அறிவிப்பை வெளியிட்டுள்ளார். “எபோலா வைரஸ் பரவல் காரணமாக உலக சுகாதார அவசரநிலை பிரகடனம் செய்யப்படுகிறது” என்று அவர் தெரிவித்தார். இந்த முறை பாதிப்புக்கு பண்டிபக்யோ (Bundibugyo) வைரஸ் காரணமாக அடையாளம் காணப்பட்டுள்ளது. 

இந்த வைரசுக்கு தற்போது எந்தவித நோய் தடுப்பு மருந்துகளோ அல்லது தடுப்பூசிகளோ கிடைக்கவில்லை என்பது கவலையளிக்கும் விஷயம். எனினும், காங்கோவில் மருத்துவ பரிசோதனைகள் தீவிரமாக மேற்கொள்ளப்பட்டு வருகின்றன. சர்வதேச சுகாதார நிபுணர்கள் குழு இப்பகுதிக்கு விரைந்து சென்று உதவி செய்யும் பணிகளில் ஈடுபட்டுள்ளது. எபோலா வரலாற்றில் முன்பும் காங்கோ உள்ளிட்ட ஆப்பிரிக்க நாடுகளில் பல முறை பெரும் பாதிப்பை ஏற்படுத்தியுள்ளது. 

2014-2016 காலகட்டத்தில் மேற்கு ஆப்பிரிக்காவில் ஏற்பட்ட எபோலா தொற்று சுமார் 11,000க்கும் மேற்பட்ட உயிரிழப்புகளை ஏற்படுத்தியது என்பது குறிப்பிடத்தக்கது. தற்போதைய பரவலை கட்டுப்படுத்த உடனடி நடவடிக்கைகள் தேவை என்று உலக சுகாதார அமைப்பு வலியுறுத்தியுள்ளது.

மக்கள் நெருக்கடியான பகுதிகளில் கூட்டமாக கூடுவதை தவிர்க்கவும், சுகாதார விதிமுறைகளை கண்டிப்பாக பின்பற்றவும், சந்தேகத்திற்குரிய அறிகுறிகள் தென்பட்டால் உடனடியாக மருத்துவ உதவி பெறவும் உள்ளூர் நிர்வாகம் அறிவுறுத்தியுள்ளது. இந்த நிலைமை மேலும் மோசமடையாமல் தடுக்க சர்வதேச சமூகத்தின் ஒருங்கிணைந்த முயற்சி அவசியம் என்பதை வல்லுநர்கள் சுட்டிக்காட்டுகின்றனர்.

இதையும் படிங்க: தமிழக அரசின் டெல்லி பிரதிநிதி யார்?! யாரை நியமிக்கப் போகிறார் முதல்வர் விஜய்?!