இந்தியாவின் பொருளாதார வளர்ச்சியை அடுத்த இரண்டு ஆண்டுகளில் மேலும் வேகப்படுத்தும் வகையில் வங்கித் துறையில் புதிய சீர்திருத்தங்கள் மேற்கொள்ளப்பட உள்ளதாக மத்திய நிதியமைச்சர் நிர்மலா சீதாராமன் தெரிவித்துள்ளார். வளர்ச்சி அடைந்த இந்தியாவை உருவாக்குவதில் வங்கிகளின் பங்களிப்பை ஆய்வு செய்ய விரைவில் உயர்மட்டக் குழு அமைக்கப்படும் என்றும் அவர் அறிவித்துள்ளார்.

டெல்லியில் நடைபெற்ற பொதுத்துறை வங்கிகளின் மாநாட்டில் நிதியமைச்சர் நிர்மலா சீதாராமன் பங்கேற்று பேசினார். அப்போது, இந்தியாவை வளர்ச்சி அடைந்த நாடாக மாற்றுவதற்கான அடுத்தகட்ட நடவடிக்கைகள் குறித்து ஆலோசிக்க இதைவிட பொருத்தமான காலம் இருக்க முடியாது என்று அவர் குறிப்பிட்டார்.

இந்திய வங்கித் துறையில் வாராக்கடன்கள் தற்போது குறைந்த அளவில் இருப்பது, அடுத்தகட்ட சீர்திருத்தங்களை மேற்கொள்ள சாதகமான சூழலை உருவாக்கியுள்ளதாக நிதியமைச்சர் தெரிவித்தார். வங்கிகளின் நிதிநிலை மேம்பட்டு வரும் நிலையில், அதன் பலனை நாட்டின் ஒட்டுமொத்த பொருளாதார வளர்ச்சிக்கு பயன்படுத்த வேண்டிய அவசியம் ஏற்பட்டுள்ளதாகவும் அவர் வலியுறுத்தினார்.

இதையும் படிங்க: AI-ஐ கற்றுக்கொள்ளுங்கள்! தொழில் தொடங்க இது சரியான நேரம்... இளைஞர்களுக்கு நிர்மலா சீதாராமன் அட்வைஸ்!

வளர்ச்சி அடைந்த இந்தியாவை உருவாக்குவதில் வங்கித் துறையின் பங்கு என்னவாக இருக்க வேண்டும் என்பது குறித்து ஆராய்வதற்காக மத்திய அரசு விரைவில் உயர்மட்டக் குழுவை அமைக்க உள்ளதாக அவர் கூறினார்.

பொதுத்துறை வங்கிகளின் மாநாட்டில் இரண்டு நாட்கள் நடைபெறும் ஆலோசனைகளில் முன்வைக்கப்படும் முக்கிய கருத்துகள் மற்றும் பரிந்துரைகளையும் இந்தக் குழு பரிசீலிக்கும் என தெரிவிக்கப்பட்டுள்ளது.

அடுத்த இரண்டு ஆண்டுகளில் இந்தியாவின் பொருளாதார வளர்ச்சியை வேகப்படுத்துவதற்கு தேவையான சீர்திருத்தங்களை அடையாளம் காண்பதே இந்த நடவடிக்கையின் முக்கிய நோக்கமாக இருக்கும் என எதிர்பார்க்கப்படுகிறது. குறிப்பாக வங்கித் துறையின் செயல்திறன், கடன் வழங்கும் நடைமுறைகள் மற்றும் பொருளாதாரத்தின் பல்வேறு துறைகளுக்கான நிதி ஆதரவு உள்ளிட்ட அம்சங்களில் புதிய அணுகுமுறைகள் உருவாக வாய்ப்புள்ளது.

இந்த உயர்மட்டக் குழு வழங்கும் பரிந்துரைகள், எதிர்காலத்தில் இந்திய வங்கித் துறையின் செயல்பாடுகளுக்கு முக்கிய வழிகாட்டியாக இருக்கும் என்றும் நிர்மலா சீதாராமன் தெரிவித்தார். பொருளாதார வளர்ச்சியை மேலும் மேம்படுத்தும் வகையில் சீர்திருத்தங்களை தொடர்ந்து மேற்கொள்ள வேண்டியது அவசியம் என்றும் அவர் குறிப்பிட்டார்.

வங்கித் துறையில் மேற்கொள்ளப்படும் மாற்றங்கள் தொழில் நிறுவனங்கள் மற்றும் பொதுமக்களுக்கு கடன் கிடைக்கும் விதத்திலும், முதலீடு மற்றும் வேலைவாய்ப்பு வளர்ச்சியிலும் தாக்கத்தை ஏற்படுத்தக்கூடும் என்பதால், மத்திய அரசின் அடுத்தகட்ட நடவடிக்கைகள் மீது கவனம் திரும்பியுள்ளது.

இதையும் படிங்க: இந்தியாவின் எத்தனால் பயன்பாட்டில் புதிய சாதனை! 800 கோடி லிட்டரை தாண்டியது வினியோகம்!