உலகெங்கும் நீரிழிவு நோய் வேகமாகப் பரவி வருகிறது. சமீபத்திய மதிப்பீடுகளின்படி, சுமார் 58.9 கோடி பெரியவர்கள் இந்த நோயால் பாதிக்கப்பட்டுள்ளனர். இது வெறும் இரத்தச் சர்க்கரை அளவை உயர்த்துவதோடு நில்லாமல், கண்கள், சிறுநீரகம், இதயம், நரம்புகள் எனப் பல உறுப்புகளையும் பாதிக்கிறது. அவற்றில் மிகவும் கவலைக்கிடமான சிக்கல் கால்களில் ஏற்படும் புண்கள் ஆகும். ஆண்டுதோறும் உலகளவில் கோடிக்கணக்கானோர் இத்தகைய புண்களால் பாதிக்கப்படுகின்றனர். சரியான நேரத்தில் கவனம் செலுத்தாவிட்டால் இவை தொற்று, அறுவை சிகிச்சை அல்லது உறுப்பு அகற்றும் நிலைக்குக் கூட செல்லலாம்.

நீண்ட காலம் இரத்தச் சர்க்கரை அதிகமாக இருப்பதால் நரம்புகள் சேதமடைகின்றன. இதனால் கால்களில் உணர்வு குறைகிறது அல்லது முழுமையாக இழக்கப்படுகிறது. சிறிய காயம், கல் குத்துதல், காலணியின் உராய்வு அல்லது சிறிய தீக்காயம் ஏற்பட்டாலும் வலி தெரியாமல் போகலாம். அதே சமயம் ரத்த நாளங்களும் பாதிக்கப்படுவதால் இரத்த ஓட்டம் குறைகிறது. இதன் விளைவாகக் காயங்கள் ஆறுவதற்கு நீண்ட நேரம் எடுக்கின்றன. உயர் சர்க்கரை அளவு நோய் எதிர்ப்பு சக்தியையும் பலவீனப்படுத்துவதால் தொற்று ஏற்படும் அபாயம் அதிகரிக்கிறது. பலருக்கு வாழ்நாளில் ஒரு முறையாவது இத்தகைய புண் உருவாக வாய்ப்புள்ளது என்று ஆய்வுகள் தெரிவிக்கின்றன.

இந்தப் புண்கள் பொதுவாக பாதத்தின் அடிப்பகுதி, விரல்களுக்கு இடையே, குதிகால் மற்றும் விரல் நுனிகளில் தோன்றும். ஆரம்பத்தில் சிறிய சிவப்புத் தழும்பு அல்லது கொப்புளமாகத் தோன்றும். கவனிக்காமல் விட்டால் ஆழமான புண்ணாக மாறும். சீழ் வெளியேறுதல், துர்நாற்றம், வீக்கம், தோல் நிறம் மாறுதல், காய்ச்சல் போன்ற அறிகுறிகள் தென்பட்டால் உடனடியாக மருத்துவரை அணுக வேண்டும்.

இதையும் படிங்க: பப்பாளி: இயற்கையின் சத்து நிறைந்த உடல் நலப் பாதுகாவலன்..!! ஆரோக்கியத்தின் ரகசியம் இதுதானாம்..!!

தடுப்பு நடவடிக்கைகள் மிகவும் எளிமையானவை. தினமும் கால்களை வெதுவெதுப்பான நீரில் கழுவி நன்றாக உலர்த்த வேண்டும். விரல்களுக்கு இடையேயும் ஈரப்பதம் இல்லாமல் பார்த்துக்கொள்ள வேண்டும். கண்ணாடி அல்லது குடும்ப உறுப்பினர் உதவியுடன் பாதங்களைத் தினமும் பரிசோதிக்க வேண்டும். வெடிப்பு, சிவத்தல், வீக்கம், கொப்புளம் உள்ளதா என்பதைக் கவனிக்க வேண்டும். வெறும் காலில் நடப்பதை முற்றிலும் தவிர்க்க வேண்டும். மென்மையான, சரியான அளவுள்ள காலணிகளை அணிய வேண்டும். நகங்களை நேராக வெட்டி, கூர்மையான முனைகளைத் தவிர்க்க வேண்டும். சிறிய காயங்களையும் அலட்சியப்படுத்தக் கூடாது.

ரத்தச் சர்க்கரை அளவை மருத்துவரின் ஆலோசனைப்படி கட்டுப்பாட்டில் வைத்திருப்பது அடிப்படை. சத்தான உணவு, தினசரி நடைப்பயிற்சி, போதுமான தண்ணீர் அருந்துதல், புகை மற்றும் மதுவைத் தவிர்ப்பது ஆகியவை புண் ஏற்படும் அபாயத்தைக் குறைக்கின்றன. குறிப்பிட்ட கால இடைவெளியில் மருத்துவரைச் சந்தித்து கால்களைப் பரிசோதிக்க வேண்டும்.

புண் ஏற்பட்டால், அதைச் சுத்தமாக வைத்திருத்தல், தேவையான மருந்துகள், இறந்த திசுக்களை அகற்றுதல், அழுத்தத்தைக் குறைக்கும் கட்டுகள் போன்ற சிகிச்சைகள் வழங்கப்படுகின்றன. தீவிரமான சந்தர்ப்பங்களில் மருத்துவமனை சிகிச்சை தேவைப்படலாம். பல துறை நிபுணர்கள் இணைந்து செயல்படும் போது முடிவுகள் சிறப்பாக இருக்கும்.

சரியான விழிப்புணர்வும் தினசரி கவனிப்பும் இருந்தால் பெரும்பாலான புண்களைத் தடுக்க முடியும். ரத்தச் சர்க்கரையைக் கட்டுப்படுத்தி, கால்களைப் பராமரித்து, சிறிய காயங்களையும் உடனடியாகச் சிகிச்சை செய்தால் நீரிழிவு நோயாளிகள் தீவிர சிக்கல்களிலிருந்து தப்பி, சிறப்பான வாழ்க்கைத் தரத்தைப் பேண முடியும்.
 

இதையும் படிங்க: முன்சர்க்கரை நோய்: ஆரம்பத்திலேயே கவனித்தால் ஆரோக்கியம் உங்கள் கையில்!