நடிகர் விஜய் நடிப்பில் உருவாகியுள்ள ‘ஜனநாயகன்’ படம் தணிக்கை சான்று பெற முடியாமல் சிக்கலில் சிக்கியிருந்த நிலை, தற்போது விரைவில் தீர்வு காணப்படும் என தவெக வட்டாரங்கள் உற்சாகமாக தெரிவித்துள்ளன. இது விஜய் ரசிகர்களை ஆர்ப்பரிக்க வைத்துள்ளது.

‘இது என் கடைசி படம்’ என்று அறிவித்து விஜய் நடித்த இப்படம் கடந்த செப்டம்பரிலேயே முழுமையாக தயாரானது. பொங்கலுக்கு வெளியாக இருந்தது. ஆனால் தணிக்கை குழு உறுப்பினர் ஒருவர், “ஆட்சேபனைக்குரிய காட்சிகள் நிறைய உள்ளன” என்று தலைவரிடம் புகார் அளித்ததால் தணிக்கை சான்று மறுக்கப்பட்டது. பின்னர் மறு ஆய்வு குழுவுக்கு அனுப்பப்பட்டது.

இதை எதிர்த்து படக்குழு சென்னை உயர்நீதிமன்றத்தில் வழக்கு தொடுத்தது. தனி நீதிபதி சாதகமான தீர்ப்பு அளித்தார். ஆனால் தணிக்கை வாரியம் இரு நீதிபதிகள் அமர்வில் மேல்முறையீடு செய்தது. அவர்கள் தனி நீதிபதி தீர்ப்பை ரத்து செய்து, வழக்கை மீண்டும் அதே நீதிபதியிடம் திருப்பி அனுப்பினர். இதனால் பட வெளியீடு கேள்விக்குறியானது.

இதையும் படிங்க: நான் கிங் மேக்கரா? போராடி ஜெயிப்பேன்! கரூர் முதல் ஜனநாயகன் வரை விஜய் Open Talk!

இந்த சூழலில், “பிரச்னை அரசியல் பின்புலம் கொண்டது. மத்திய உள்துறை அமைச்சர் அமித் ஷாவை அணுகுங்கள்” என்ற ஆலோசனை விஜய் தரப்புக்கு கிடைத்தது. விஜய்க்கு நெருக்கமான ஆலோசகரும் நண்பருமான விஷ்ணு ரெட்டி, டில்லியில் தனக்கு தெரிந்த மூத்த பாஜக தலைவர் மூலம் அமித் ஷாவை சந்திக்க ஏற்பாடு செய்தார்.

சில நாட்களுக்கு முன் டில்லி சென்ற விஷ்ணு ரெட்டி, அமித் ஷாவை சந்தித்து பேசினார். அப்போது “ஜனநாயகன் படத்துக்கு தடை நீக்க உதவுங்கள். தேவைப்பட்டால் காங்கிரஸை தள்ளிவைக்க தவெக தயார்” என்று விஜய் தரப்பு சார்பில் தெரிவிக்கப்பட்டதாக கூறப்படுகிறது. 

இதை ஏற்றுக்கொண்ட அமித் ஷா, “சில நாட்கள் உங்கள் நடவடிக்கைகளை கண்காணிப்போம். பிறகு நல்ல முடிவு எடுக்கப்படும்” என்று கூறி அனுப்பியதாக தகவல்கள் வெளியாகியுள்ளன.

தவெக வட்டாரங்கள் கூறுகையில், திமுக கூட்டணியில் உள்ள காங்கிரஸ் தலைவர்கள் தவெகவுடன் கூட்டணி விரும்புவதாகவும், ராகுல் நண்பர் பிரவீன் சக்கரவர்த்தி விஜயை சந்தித்ததாகவும் தெரிவித்தனர். இது பாஜக தலைமைக்கு பிடிக்கவில்லை. அதனாலேயே ஜனநாயகன் படத்துக்கு தடை ஏற்பட்டதாகவும், இப்போது காங்கிரஸை தள்ளிவைத்து பிரச்னை தீர்க்க முயல்வதாகவும் கூறினர்.

விரைவில் ஜனநாயகன் படத்துக்கு பச்சைக்கொடி கிடைக்கும் என்ற நம்பிக்கையில் ரசிகர்கள் உற்சாகத்தில் உள்ளனர். இதன்மூலம் தமிழக அரசியலில் பெரிய திருப்பங்கள் நிகழலாம் என்றும் தவெக வட்டாரம் சஸ்பென்ஸ் வைத்துள்ளது.

இதையும் படிங்க: விஜய் ரசிகர்களுக்கு ஒர் நற்செய்தி! ஜனநாயகன் முடிவு என்ன? ஜன., 27ல் ரிசல்ட் தெரியும்!!