இந்தியாவில் பாலியல் வன்கொடுமைக்கு எதிராக காவல்துறை பல முனைப்பு நடவடிக்கைகளை மேற்கொண்டு வருகிறது. தேசிய குற்ற ஆவணப் பணியகத்தின் (NCRB) 2021 அறிக்கையின்படி, பெண்களுக்கு எதிரான குற்றங்கள் 87% அதிகரித்துள்ளன, இதில் பாலியல் வன்கொடுமை முக்கிய பங்கு வகிக்கிறது. இதை எதிர்கொள்ள, காவல்துறை பல மாற்றங்களை செயல்படுத்தி வருகிறது.

முதலாவதாக, புகார் பதிவு செய்வதை எளிதாக்குவதற்காக ஆன்லைன் முறைகள் அறிமுகப்படுத்தப்பட்டுள்ளன. மத்திய அரசு, பெண்கள் இணையம் வழியாக புகார் அளிக்கும் வசதியை 2017 முதல் வழங்கி வருகிறது, குறிப்பாக அரசு அலுவலகங்களில் பாலியல் தொந்தரவு தொடர்பாக. மேலும், பெண்களுக்கு பாதுகாப்பு வழங்க தெலங்கானாவில் SHE குழுக்கள் போன்ற சிறப்பு காவல் பிரிவுகள் உருவாக்கப்பட்டுள்ளன.

இதையும் படிங்க: குஜராத் பாலம் இடிந்து விபத்து.. பலி எண்ணிக்கை 13 ஆக உயர்வு..!

கேரள காவல்துறையின் ‘பி-ஹன்ட்’ ஆபரேஷன், குழந்தைகளின் ஆபாச உள்ளடக்கங்களை பகிர்பவர்களை கைது செய்ய 326 இடங்களில் சோதனை நடத்தி 41 பேரை கைது செய்தது. குழந்தைகளை பாலியல் குற்றங்களிலிருந்து பாதுகாக்க POCSO சட்டம் 2012-இன் கீழ் கடுமையான தண்டனைகள் வழங்கப்படுகின்றன. பெண்கள் மற்றும் குழந்தைகளுக்கு எதிரான வன்முறையை கட்டுப்படுத்த, விசாரணைகளை 90 நாட்களுக்குள் முடிக்கவும், பாதிக்கப்பட்டவர்களுக்கு இழப்பீடு வழங்கவும் உயர்நீதிமன்றங்கள் உத்தரவிட்டுள்ளன. இப்படி பாலியல் வன்கொடுமைக்கு எதிராக காவல்துறை சார்பில் பல நடவடிக்கைகள் எடுக்கப்பட்டு வருகின்றன. 

இந்நிலையில் குஜராத் மாநிலம் அகமதாபாத்தில் போக்குவரத்து காவல்துறையின் ஆதரவுடன் வெளியிடப்பட்ட சில போஸ்டர்கள் பெரும் சர்ச்சையை கிளப்பியுள்ளன. இந்த போஸ்டர்களில், நள்ளிரவு நேரங்களில் நடைபெறும் பார்ட்டிகளில் பங்கேற்காதீர்கள், நீங்கள் பாலியல் வன்கொடுமை அல்லது கூட்டு பாலியல் வன்கொடுமை செய்யப்படலாம். இருட்டான ஆள்டமாட்டமற்ற பகுதிகளுக்கு பெண் நண்பர்களை ஆண் நண்பர்கள் அழைத்து செல்ல வேண்டாம். அங்கு உங்கள் பெண் நண்பர்கள் பாலியல் வன்கொடுமை அல்லது கூட்டு பாலியல் வன்கொடுமை செய்யப்பட்டால் என்ன ஆகும்? இவ்வாறு தெரிவிக்கப்பட்டிருந்தது. இந்த போஸ்டர் பொதுமக்களிடையே கடும் கோபத்தையும் விமர்சனத்தையும் தூண்டியுள்ளது.

இந்த போஸ்டர் பெண்களின் சுதந்திரத்தை கட்டுப்படுத்துவதாகவும், பாலியல் வன்கொடுமைக்கு பெண்களையே பொறுப்பாக்குவதாகவும் விமர்சிக்கப்பட்டுள்ளது. சமூக ஊடகங்களில் இந்த போஸ்டர்கள் குறித்து பலர் தங்கள் எதிர்ப்பை பதிவு செய்துள்ளனர். "பெண்களை வீட்டில் முடக்குவது தீர்வல்ல; குற்றவாளிகளுக்கு கடுமையான தண்டனை உறுதி செய்யப்பட வேண்டும்," என்று பலர் வாதிட்டுள்ளனர். இந்த சர்ச்சைக்கு பிறகு, பொதுமக்களின் கடும் எதிர்ப்பு காரணமாக இந்த போஸ்டர்கள் அகற்றப்பட்டுள்ளன. இருப்பினும், இந்த சம்பவம் பெண்களின் பாதுகாப்பு மற்றும் சமூகத்தில் அவர்களின் உரிமைகள் குறித்து மீண்டும் விவாதத்தை தூண்டியுள்ளது. 

குஜராத் காவல்துறை இதற்கு முறையான விளக்கம் அளிக்க வேண்டும் என்று பலர் கோரிக்கை விடுத்துள்ளனர். பெண்களுக்கு எதிரான குற்றங்களை தடுக்க, காவல்துறையின் அணுகுமுறை மாற வேண்டும் என்றும், பொது இடங்களில் பெண்களின் பாதுகாப்பை உறுதி செய்ய வலுவான நடவடிக்கைகள் எடுக்கப்பட வேண்டும் என்றும் சமூக ஆர்வலர்கள் வலியுறுத்துகின்றனர். இந்த சம்பவம், பெண்களின் உரிமைகள் மற்றும் பாதுகாப்பு குறித்து மேலும் விழிப்புணர்வை ஏற்படுத்தியுள்ளது.
 

இதையும் படிங்க: இடிந்து விழுந்த பாலம்.. அந்தரத்தில் தொங்கிய லாரி.. குஜராத்தில் பரபரப்பு சம்பவம்..!