அதிமுகவின் முன்னாள் தலைவர் ஜெ. ஜெயலலிதாவின் மறைவுக்குப் பிறகு, கட்சியில் தலைமைப் பதவி தொடர்பாக பல்வேறு உட்பூசல்கள் எழுந்தன. 2017-ஆம் ஆண்டு வி.கே. சசிகலா தற்காலிகப் பொதுச்செயலாளராக நியமிக்கப்பட்டபோது, ஓ. பன்னீர்செல்வம் தலைமையில் ஒரு பிரிவு கலகம் செய்தது.
இதனைத் தொடர்ந்து, எடப்பாடி பழனிசாமி முதலமைச்சராகப் பொறுப்பேற்று, கட்சியின் முக்கியத் தலைவராக உருவெடுத்தார். 2021-ஆம் ஆண்டு சட்டமன்றத் தேர்தலில் அதிமுக தோல்வியடைந்த பிறகு, கட்சியை ஒருங்கிணைக்கும் முயற்சியாக இபிஎஸ் மற்றும் ஓபிஎஸ் இணைந்து ஒருங்கிணைப்பாளர் மற்றும் இணை ஒருங்கிணைப்பாளராக செயல்பட்டனர்.
ஆனால், இந்த இரட்டைத் தலைமை முறை கட்சிக்குள் பிளவைத் தீவிரப்படுத்தியது.2022-ஆம் ஆண்டு ஜூலை 11-ஆம் தேதி சென்னை வானகரத்தில் உள்ள ஸ்ரீவாரு வெங்கடாசலபதி மாளிகையில் நடைபெற்ற அதிமுக பொதுக்குழுக் கூட்டத்தில், இரட்டைத் தலைமை முறை ஒழிக்கப்பட்டு, எடப்பாடி பழனிசாமி இடைக்காலப் பொதுச்செயலாளராக ஒருமனதாகத் தேர்ந்தெடுக்கப்பட்டார்.
இதையும் படிங்க: விடியா திமுக அரசு! கோவையில் வரும் 5 ஆம் தேதி மாபெரும் ஆர்ப்பாட்டம்... அதிமுக அதிகாரப்பூர்வ அறிவிப்பு!
ஓ. பன்னீர்செல்வம் தரப்பு, 2022-ஆம் ஆண்டு ஜூலை 11-ஆம் தேதி பொதுக்குழுக் கூட்டத்தில் நிறைவேற்றப்பட்ட தீர்மானங்களை எதிர்த்து சென்னை உயர்நீதிமன்றத்தில் மனு தாக்கல் செய்தது. இந்த மனுவில், இபிஎஸ்-ன் இடைக்காலப் பொதுச்செயலாளர் நியமனம் செல்லாது என்றும், பொதுக்குழு தீர்மானங்கள் கட்சி விதிகளுக்கு மாறாக உள்ளதாகவும் வாதிடப்பட்டது.
இதற்கு எதிராக, இபிஎஸ் தரப்பு, இந்த வழக்குகளை நிராகரிக்கக் கோரி சென்னை உயர்நீதிமன்றத்தில் மனு தாக்கல் செய்தார். மேலும், இந்த உட்கட்சி விவகாரங்களில் தேர்தல் ஆணையம் தலையிடுவதற்கு அதிகாரம் இல்லை என்றும், வழக்கைத் தொடர்ந்தவர்கள் கட்சி உறுப்பினர்களாக இல்லை என்றும் இபிஎஸ் தரப்பு வாதிட்டது.
எனினும், 2025-ஆம் ஆண்டு பிப்ரவரி மாதம், சென்னை உயர்நீதிமன்றம் இபிஎஸ் தாக்கல் செய்த மனுவைத் தள்ளுபடி செய்து, தேர்தல் ஆணையம் இந்த விவகாரத்தில் விசாரணை நடத்த அனுமதி அளித்தது.
மேலும், ஓபிஎஸ் தரப்பு மற்றும் பிற மனுதாரர்கள், குறிப்பாக திண்டுக்கல்லைச் சேர்ந்த சூரியமூர்த்தி, இரட்டை இலை சின்னத்தை முடக்கக் கோரி மனு அளித்தனர். இதனைத் தொடர்ந்து, தேர்தல் ஆணையம் இபிஎஸ்-க்கு நோட்டீஸ் அனுப்பி, இந்த மனுக்கள் மீது விசாரணை நடத்த உத்தரவிடப்பட்டது. இந்த விசாரணைக்கு எதிர்ப்பு தெரிவித்து இபிஎஸ் தாக்கல் செய்த மனு உயர்நீதிமன்றத்தில் தள்ளுபடி செய்யப்பட்டுள்ளது. கட்சி விதிப்படி, அடிப்படை உறுப்பினர்களால் பொதுச்சயலாளர் தேர்வு செய்யப்பட வேண்டும் என தெரிவித்துள்ளது.
இதையும் படிங்க: சோசியல் மீடியாவில் சரசரவென சரியும் எடப்பாடி பழனிசாமி மவுசு... ராமநாதபுரம் முக்குலத்தோர் ரவுசு...!