காவிரியில் தண்ணீர் திறந்து விடப்பட்டு 40 நாட்களைக் கடந்த நிலையிலும், கும்பகோணம் அருகே உள்ள பந்தநல்லூர் உள்ளிட்ட கடைமடைப் பகுதிகளுக்கு இதுவரை பாசன நீர் வந்து சேராததால், சுமார் 20 ஆயிரம் ஏக்கர் பரப்பளவிலான நெற்பயிர்கள் கருகும் அபாயத்தில் இருப்பதாக விவசாயிகள் மிகுந்த வேதனை தெரிவித்துள்ளனர்.

தஞ்சாவூர் மாவட்ட எல்லைப் பகுதிகளான பந்தநல்லூர், நெய்குப்பை உள்ளிட்ட பத்துக்கும் மேற்பட்ட கிராமங்களைச் சேர்ந்த விவசாயிகள் முற்றிலும் காவிரி ஆற்றுத் தண்ணீரை மட்டுமே நம்பி நடவு மற்றும் சாகுபடிப் பணிகளை மேற்கொண்டனர். உழவுப் பணி தொடங்கி நடவுப் பணி வரை ஏக்கருக்கு சுமார் ரூ.40,000 வரை விவசாயிகள் கடன் வாங்கியும் நகைகளை அடமானம் வைத்தும் செலவு செய்துள்ளனர். ஆனால், மேட்டூர் அணையிலிருந்து காவிரியில் தண்ணீர் திறந்து 40 நாட்களுக்கு மேலாகியும், கடைமடைப் பகுதியான இப்பகுதி கிராமங்களுக்கு ஒரு சொட்டு நீர் கூட வந்து சேரவில்லை.

இதனால் பாசனத்திற்குப் போதிய தண்ணீர் இன்றி, பச்சைப்பசேலென வளர வேண்டிய நெற்பயிர்கள் கண்முன்னே கருகத் தொடங்கியுள்ளன. ஒருபுறம் ஆற்று நீர் வரத்து இல்லாத சூழலில், மறுபுறம் டெல்டா மாவட்டங்களில் வடகிழக்குப் பருவமழையும் இன்னும் தொடங்கவில்லை. இதனுடன் நிலத்தடி நீர்மட்டமும் அதலபாதாளத்திற்குச் சென்றுவிட்டதால், ஆழ்குழாய் கிணற்றுப் பாசனத்தை நம்பியிருக்கும் விவசாயிகளும் பயிர்களைக் காப்பாற்ற முடியாமல் தவித்து வருகின்றனர்.

இதையும் படிங்க: காவிரியில் வினாடிக்கு 3,000 கன அடி நீர் திறக்க பரிந்துரை! காவிரி நீர் ஒழுங்காற்று குழு உத்தரவு!

ஏற்கனவே தொடக்க வேளாண்மை கூட்டுறவு சங்கங்களில் பயிர்க்கடன் பெற்று விவசாயம் செய்த பல விவசாயிகளுக்குக் கடன் முழுமையாகத் தள்ளுபடி செய்யப்படாத நிலையில், புதிய பயிர்க்கடன்களையும் பெற முடியாமல் நிதி நெருக்கடியில் அவர்கள் சிக்கியுள்ளனர்.

எனவே, வேளாண்மைத் துறை, உணவுத் துறை, கூட்டுறவுத் துறை மற்றும் நீர்வளத் துறை அதிகாரிகளும் மாவட்ட நிர்வாகமும் உடனடியாகப் பந்தநல்லூர் உள்ளிட்ட கடைமடைப் பகுதிகளுக்கு நேரில் சென்று கள ஆய்வு நடத்த வேண்டும் என்றும், தண்ணீரின்றி பயிர்கள் கருகி வாழ்வாதாரத்தை இழந்து நிற்கும் விவசாயிகளுக்கு ஏக்கருக்கு ரூ.40,000 உரிய நிவாரணம் வழங்கிட தமிழக அரசு போர்க்கால அடிப்படையில் நடவடிக்கை எடுக்க வேண்டும் என்றும் டெல்டா விவசாயிகள் கண்ணீருடன் கோரிக்கை விடுத்துள்ளனர்.

இதையும் படிங்க: காவிரியில் உரிய நீரை திறக்க உத்தரவிடுக! உச்ச நீதிமன்றத்தில் தமிழ்நாடு அரசு அவசர மனு!