சென்னை: தமிழக வெற்றிக் கழகம் (தவெக) தலைவர் நடிகர் விஜய் தமிழ்நாட்டின் முதலமைச்சராக பதவியேற்றுள்ள நிலையில், பல்வேறு அரசியல் கட்சித் தலைவர்கள் அவருக்கு வாழ்த்து தெரிவித்து வருகின்றனர். அந்த வகையில், பிரதமர் நரேந்திர மோடி முதலமைச்சர் விஜய்க்கு வாழ்த்து அளித்துள்ளார்.

பிரதமர் மோடி தனது வாழ்த்து செய்தியில், “தமிழ்நாடு முதலமைச்சராக பதவியேற்றுள்ள சி.ஜோசப் விஜய்க்கு எனது வாழ்த்துகள். அவரது பதவிக்காலம் மக்கள் நலனுக்கான சிறப்பான காலமாக அமைய வாழ்த்துகிறேன். மக்களின் வாழ்க்கைத் தரத்தை மேம்படுத்தவும், தமிழ்நாட்டின் வளர்ச்சிக்கும் மத்திய அரசு தமிழ்நாடு அரசுடன் இணைந்து தொடர்ந்து பணியாற்றும்” என்று தெரிவித்துள்ளார்.

சென்னை நேரு உள்விளையாட்டு அரங்கில் இன்று காலை நடைபெற்ற பதவியேற்பு விழாவில் விஜய் முதலமைச்சராக பிரமாணம் செய்து கொண்டார். தொடர்ந்து 9 அமைச்சர்களும் பதவியேற்றனர்.

இதையும் படிங்க: கோட்டையில் முதலமைச்சராக கால் பதித்த விஜய்!! தலைமை செயலகத்தில் இனி ஜனநாயகனின் சர்க்கார்!!

பதவியேற்ற உடனேயே மூன்று முக்கிய மக்கள் நலன் சார்ந்த கோப்புகளில் முதலமைச்சர் விஜய் கையெழுத்திட்டார். அதன் பின்னர் தலைமைச் செயலகத்துக்கு சென்ற அவர், அங்கு காவல்துறை அணிவகுப்பு மரியாதையை ஏற்றுக்கொண்டார்.

தேர்தலில் 108 தொகுதிகளில் வெற்றி பெற்ற தவெக, காங்கிரஸ், இடதுசாரிகள், விசிக மற்றும் ஐயூஎம்எல் உள்ளிட்ட கட்சிகளின் ஆதரவுடன் ஆட்சி அமைத்துள்ளது. நடிகராக புகழ் பெற்ற விஜய் அரசியலில் நுழைந்து முதல் தேர்தலிலேயே முதலமைச்சர் பதவிக்கு உயர்ந்துள்ளது தமிழக அரசியல் வரலாற்றில் முக்கிய திருப்புமுனையாக கருதப்படுகிறது.

பிரதமரின் வாழ்த்து செய்தி அரசியல் வட்டாரத்தில் வரவேற்பைப் பெற்றுள்ளது. மத்திய-மாநில உறவுகள் சுமுகமாக இருக்கும் என எதிர்பார்ப்பு எழுந்துள்ளது. முதலமைச்சர் விஜய் தலைமையிலான புதிய அரசு மக்கள் பிரச்சினைகளுக்கு உடனடி தீர்வு காணும் என மக்கள் மத்தியில் பெரும் நம்பிக்கை நிலவுகிறது.

தமிழகம் முழுவதும் இன்று கொண்டாட்ட சூழல் காணப்படுகிறது. பல்வேறு அரசியல் தலைவர்களின் வாழ்த்துகள் விஜய்க்கு கிடைத்து வரும் நிலையில், புதிய அரசு தமிழ்நாட்டின் அனைத்துத் தரப்பு மக்களின் நலனுக்கும் உறுதியாக செயல்படும் என எதிர்பார்க்கப்படுகிறது.

இதையும் படிங்க: தமிழ்தாய் வாழ்த்தை முந்திய வந்தே மாதரம் பாடல்!! முதலமைச்சர் விஜய் பதவியேற்பு! இதுவரை இல்லாத புதுமை!