தமிழக அரசியல் களத்தில் விக்கெட் வீழ்ச்சிகள் தொடரும் வேளையில், அஇஅதிமுகவின் அரியலூர் மாவட்ட அவைத்தலைவரும் முன்னாள் சட்டமன்ற உறுப்பினருமான ராமஜெயலிங்கம், எடப்பாடி பழனிச்சாமியின் தலைமை மீதான அதிருப்தியால் இன்று அதிரடியாகத் தமிழக வெற்றிக் கழகத்தில் (தவெக) தன்னை இணைத்துக் கொண்டார்.

சென்னை தலைமைச் செயலகத்தில் உள்ள தவெக அரசின் வருவாய்த்துறை அமைச்சர் கே.ஏ.செங்கோட்டையனின் அலுவலக அறைக்கு இன்று நேரில் வந்த அரியலூர் மாவட்ட அதிமுகவின் தூண்கள், தங்களை அதிகாரப்பூர்வமாகத் தவெக பாசறையில் இணைத்துக் கொண்டனர். கடந்த 2016-ஆம் ஆண்டு நடைபெற்ற சட்டமன்றத் தேர்தலில் அதிமுக சார்பில் போட்டியிட்டுச் சட்டமன்ற உறுப்பினராகப் (MLA) பொறுப்பு வகித்தவர் ராமஜெயலிங்கம். இவருடன் இணைந்து அதிமுக மாநில இளைஞர் அணி துணைச் செயலாளர் சிவசுப்பரமணியன், மாவட்ட மருத்துவ அணி இணைச் செயலாளர் நவீன் கிருஷ்ணராஜா உள்ளிட்ட முக்கிய நிர்வாகிகள் பலரும் தவெக-வில் ஐக்கியமாகினர்.

அமைச்சர் செங்கோட்டையனைச் சந்தித்துத் தவெக-வில் இணைந்த பின்னர் செய்தியாளர்களுக்குப் பேட்டியளித்த முன்னாள் எம்.எல்.ஏ. ராமஜெயலிங்கம், "அதிமுக பொதுச்செயலாளர் எடப்பாடி பழனிச்சாமியின் தற்போதைய அரசியல் செயல்பாடுகள் மற்றும் அணுகுமுறைகள் எங்களுக்குச் சற்றும் பிடிக்கவில்லை. தொண்டர்களின் உணர்வுகளுக்கு அங்கு மதிப்பில்லை. இதனால் தான், தமிழ்நாட்டிற்குப் புதிய உத்வேகத்தைத் தந்து வரும் முதலமைச்சர் விஜய் அவர்களின் தவெக-வில் இணையும் முடிவை எடுத்தோம். இன்று அமைச்சர் செங்கோட்டையன் அண்ணனைச் சந்தித்து எங்களை முறைப்படி தவெக-வில் இணைத்துக் கொண்டோம்" என்று அதிரடியாகத் தெரிவித்தார். புதிய தவெக அரசு அமைந்து சில வாரங்களே ஆன நிலையில், அதிமுகவின் முக்கிய மாவட்ட நிர்வாகிகள் அடுத்தடுத்து விஜய் கட்சிக்குத் தாவி வருவது எடப்பாடி பழனிச்சாமி தலைமையிலான அஇஅதிமுகவிற்குப் பெரும் பின்னடைவாகப் பார்க்கப்படுகிறது.

இதையும் படிங்க: துரோகி சத்தியபாமா! தவெக-வில் இணைந்த தாராபுரம் எம்.எல்.ஏ-வுக்கு எதிராக அ.தி.மு.க தொண்டர்கள் ஒட்டிய பரபரப்பு போஸ்டர்!

இதையும் படிங்க: அடுத்த TARGET..! தொழிற்சங்கத்தை பலப்படுத்தும் தவெக..! எகிறும் எதிர்ப்பார்ப்பு..!!