ரூ.100 கோடி மோசடி வழக்கு! கைது செய்யக்கூடாது என உத்தரவிட முடியாது! அன்பில் மகேஸ் வழக்கில் ஐகோர்ட் அதிரடி!

சென்னை: தனியார் பள்ளிகளுக்கு அங்கீகாரம் மற்றும் பல்வேறு அரசு அனுமதிகளை பெற்றுத் தருவதாகக் கூறி ரூ.100 கோடிக்கு மேல் பணம் வசூலித்து மோசடி செய்ததாக தொடரப்பட்ட வழக்கில், முன்னாள் அமைச்சர் அன்பில் மகேஸ் பொய்யாமொழி தாக்கல் செய்த மனுவில் இடைக்கால நிவாரணம் வழங்க சென்னை உயர்நீதிமன்றம் மறுத்துள்ளது.

தனியார் பள்ளிகளுக்கு நிரந்தர அங்கீகாரம், DTCP, CMDA உள்ளிட்ட அனுமதிகளை பெற்றுத் தருவதாகக் கூறி பணம் வசூலித்ததாக பள்ளி நிர்வாகிகள் சிலர் புகார் அளித்திருந்தனர். அதன் அடிப்படையில் சென்னை மத்திய குற்றப்பிரிவு போலீசார் வழக்குப்பதிவு செய்து விசாரணை நடத்தி வருகின்றனர். இந்த வழக்கில் அன்பில் மகேஸ் உள்ளிட்ட பலரின் பெயர்கள் சேர்க்கப்பட்டுள்ளன.

வழக்கு தொடர்பாக அன்பில் மகேஸ் வீடு, அலுவலகங்கள் மற்றும் உறவினர்களுடன் தொடர்புடைய இடங்கள் உள்ளிட்ட 9 இடங்களில் போலீசார் சோதனை நடத்தியதாகவும், அவரிடம் விசாரணைக்காக சம்மன் வழங்கப்பட்டதாகவும் தகவல்கள் வெளியாகின.

இதையும் படிங்க: 18 செல்போன்கள், 3 லேப்டாப்கள்… கொத்தாய் சிக்கிய டிஜிட்டல் ஆவணங்கள்… அன்பில் மகேஷுக்கு நாளை காத்திருக்கும் அதிர்ச்சி…!

இந்த நிலையில், தன் மீது பதிவு செய்யப்பட்ட வழக்கை ரத்து செய்யக் கோரி அன்பில் மகேஸ் சென்னை உயர்நீதிமன்றத்தில் மனுத் தாக்கல் செய்தார். இந்த மனு நீதிபதி வி. லட்சுமி நாராயணன் முன்பு விசாரணைக்கு வந்தது.

அன்பில் மகேஸ் தரப்பில் ஆஜரான மூத்த வழக்கறிஞர் வில்சன், விசாரணைக்கு முழுமையாக ஒத்துழைத்து வருவதால் இடைக்கால நிவாரணம் வழங்க வேண்டும் என கோரிக்கை வைத்தார்.

இதற்கு எதிர்ப்பு தெரிவித்த அரசு தரப்பு வழக்கறிஞர், தனியார் பள்ளிகளுக்கு அனுமதி பெற்றுத் தருவதாகக் கூறி தனியாக அலுவலகம் அமைத்து பணம் வசூலித்ததாக குற்றச்சாட்டு உள்ளதாகவும், தற்போது விசாரணை தொடர்ந்து நடைபெற்று வருவதாகவும் தெரிவித்தார்.

இருதரப்பு வாதங்களையும் கேட்ட நீதிபதி, வழக்கை ரத்து செய்யக் கோரிய மனுவில் தற்போது இடைக்காலமாக கைது செய்யக்கூடாது என்ற உத்தரவை பிறப்பிப்பது தொடர்பாக கேள்வி எழுப்பினார். இதனால் அன்பில் மகேஸ் தரப்பின் இடைக்கால நிவாரண கோரிக்கையை ஏற்க முடியாது என நீதிபதி தெரிவித்தார்.

அதே நேரத்தில், கைது அச்சம் இருந்தால் சட்டப்படி முன்ஜாமீன் மனு தாக்கல் செய்யலாம் என நீதிபதி குறிப்பிட்டார்.

மேலும், அன்பில் மகேஸ் தாக்கல் செய்த மனுவுக்கு காவல்துறை பதிலளிக்க உத்தரவிட்ட நீதிபதி, வழக்கின் அடுத்தகட்ட விசாரணையை அடுத்த வாரத்திற்கு ஒத்திவைத்தார்.

இதனால் ரூ.100 கோடிக்கு மேல் பணம் வசூலித்ததாக கூறப்படும் இந்த வழக்கில், தற்போது விசாரணை தொடர்ந்து நடைபெற உள்ள நிலையில், அடுத்த விசாரணை மீது அரசியல் மற்றும் சட்ட வட்டாரங்களில் கவனம் திரும்பியுள்ளது.

இதையும் படிங்க: கொடநாடு வாசல்ல வாட்ச்மேன் மாதிரி நின்னவரு! இன்னைக்கு திமுகவையே எதிர்க்கிறாரு? விஜயை விமர்சித்த அன்பில் மகேஷ்!