அமெரிக்கா-கனடா இடையேயான வர்த்தகப் பேச்சுவார்த்தைகள் முடங்கியுள்ள நிலையில், அமெரிக்க அதிபர் டொனால்டு டிரம்பின் அணுகுமுறைக்கு கனடா பிரதமர் மார்க் கார்னி கடும் எதிர்ப்பு தெரிவித்துள்ளார். மீம்ஸ்கள் வெளியிடுவதையும், மறைமுகமாக விமர்சிப்பதையும் நிறுத்த வேண்டும் என்று டிரம்ப் நிர்வாகத்திடம் அவர் பகிரங்கமாக கேட்டுக்கொண்டுள்ளார்.

அமெரிக்கா கனடா மீது 50 சதவீத வரி விதித்திருப்பது இரு நாடுகளுக்கும் இடையேயான வர்த்தக உறவில் பெரும் பதற்றத்தை ஏற்படுத்தியுள்ளது. இதனுடன், ஏரிக்கு பெயர் மாற்றம் தொடர்பான விவகாரம் மற்றும் பெண் ராணுவப் பயிற்சி அதிகாரிகளை பென்டகன் கேலி செய்ததாக கூறப்படும் சம்பவங்களும் சர்ச்சையை அதிகரித்துள்ளன. இந்த சூழலில் இரு நாடுகளுக்கும் இடையேயான பேச்சுவார்த்தைகளும் பாதிக்கப்பட்டுள்ளன.

இந்த விவகாரம் குறித்து பேசிய மார்க் கார்னி, அமெரிக்கா வர்த்தகப் பேச்சுவார்த்தைகளில் தீவிர கவனம் செலுத்தினால், இரு நாடுகளுக்கும் இடையேயான பேச்சை மீண்டும் தொடங்குவதற்கான வாய்ப்பு இருப்பதாக தெரிவித்தார். அதேநேரத்தில், கனடாவின் தொழில்துறைகள் படிப்படியாக சுருங்கி அழியும் வகையிலான நிபந்தனைகளை ஏற்றுக்கொள்ள தங்கள் நாடு தயாராக இல்லை என்றும் அவர் திட்டவட்டமாக கூறினார்.

இதையும் படிங்க: கனடாவிலிருந்து எதுவுமே வேண்டாம்! இனி சலுகை இல்லை! அதிபர் டிரம்ப் வெளியிட்ட அதிரடி எச்சரிக்கை!

மேலும், அமெரிக்கா மீம்ஸ்களை உருவாக்குவதையும், மறைமுகமாக தாக்குவதையும் நிறுத்த வேண்டும் என்று கார்னி வலியுறுத்தினார். மற்றவர்களை குறை கூறுவதையும், தங்களை வலிமையானவர்களாக காட்டிக்கொள்ளும் வகையில் கடுமையான அணுகுமுறையை கடைப்பிடிப்பதையும் கைவிட வேண்டும் என்றும் அவர் தெரிவித்தார்.

கனடா தனது தொழில்துறைகளின் நலன்களை பாதுகாப்பதில் உறுதியாக இருப்பதாக கூறிய கார்னி, அமெரிக்காவுடன் மோதலை அதிகரிப்பது தங்கள் நோக்கம் அல்ல என்றும் தெரிவித்துள்ளார். அதேவேளையில், கனடாவுக்கு பாதிப்பை ஏற்படுத்தும் எந்த நிபந்தனையையும் ஏற்றுக்கொள்ள முடியாது என்ற நிலைப்பாட்டையும் அவர் வெளிப்படுத்தியுள்ளார்.

இதனால் ஏற்கனவே பதற்றத்தில் உள்ள அமெரிக்கா-கனடா உறவில் மீண்டும் அரசியல் மற்றும் வர்த்தக சர்ச்சை தீவிரமடைந்துள்ளது. இரு நாடுகளுக்கும் இடையேயான வர்த்தக பேச்சுவார்த்தைகள் மீண்டும் தொடங்குமா அல்லது வரி விவகாரம் மேலும் மோசமடையுமா என்பது சர்வதேச அளவில் கவனம் பெற்றுள்ளது.

இதையும் படிங்க: இந்தியாவுக்கு வரப்போகும் கனடா முதலீடு? நிதி நிறுவனங்களுக்கு நிர்மலா சீதாராமன் பெரிய ஆஃபர்!