ஆப்பிரிக்க நாடான காங்கோ ஜனநாயகக் குடியரசில் நடந்த விமான விபத்தில் 2 மூத்த ராணுவ அதிகாரிகள் உட்பட 14 பேர் உயிரிழந்த சம்பவம் அதிர்ச்சியை ஏற்படுத்தியுள்ளது. காங்கோ ராணுவம் வெளியிட்ட தகவலின்படி, விமானத்தில் இருந்த அனைவரும் இந்த விபத்தில் உயிரிழந்துள்ளனர். விபத்துக்கான காரணத்தை கண்டறிய அதிகாரிகள் விசாரணையை தொடங்கியுள்ளனர்.
காங்கோ ஜனநாயகக் குடியரசின் தென்மேற்கு பகுதியில் உள்ள கிக்விட் நகரில் இருந்து தலைநகர் கின்ஷாசாவை நோக்கி விமானம் சென்று கொண்டிருந்தது. வெள்ளிக்கிழமை இந்த விமானத்தில் திடீரென தொழில்நுட்பக் கோளாறு ஏற்பட்டதாக உள்ளூர் அதிகாரிகள் தெரிவித்துள்ளனர். இதையடுத்து கெங்கே பகுதியில் விமானத்தை தரையிறக்க முயற்சி மேற்கொள்ளப்பட்டதாகவும், ஆனால் அந்த முயற்சி விபரீதமாக முடிந்ததாகவும் தகவல்கள் வெளியாகியுள்ளன.
விபத்தில் உயிரிழந்தவர்களில் லெப்டினன்ட் ஜெனரல் முடோம்போ கட்டலாயி தியெண்டே மற்றும் லெப்டினன்ட் ஜெனரல் பகுமி லிகுலியா ஆகிய இரு மூத்த ராணுவ அதிகாரிகளும் இடம்பெற்றுள்ளனர். இதில் தியெண்டே அந்நாட்டின் ராணுவ நீதிமன்றத்தின் தலைவராகவும், லிகுலியா ஆயுதப்படைகளின் தலைமை தணிக்கை அதிகாரியாகவும் பணியாற்றி வந்ததாக தெரிவிக்கப்பட்டுள்ளது.
இதையும் படிங்க: அமெரிக்காவின் கலிபோர்னியாவில் பயங்கர விமான விபத்து! 2 பேர் பலி; 2 பேர் படுகாயம்!
விமானத்தில் இரு மூத்த அதிகாரிகளுடன் அவர்களது அதிகாரப்பூர்வ குழுவைச் சேர்ந்தவர்கள் மற்றும் விமானப் பணியாளர்களும் இருந்ததாக காங்கோ ராணுவ செய்தித் தொடர்பாளர் மேஜர் ஜெனரல் எஃபோமி எகெங்கே தெரிவித்துள்ளார். விபத்தில் உயிரிழந்தவர்களில் சிலரின் உடல்கள் தீயில் மோசமாக பாதிக்கப்பட்டதாகவும் அதிகாரிகள் தெரிவித்துள்ளனர்.
விமானம் கெங்கே பகுதியில் விபத்துக்குள்ளானதற்கான துல்லியமான காரணம் இதுவரை உறுதி செய்யப்படவில்லை. தொழில்நுட்ப கோளாறு ஏற்பட்டதாக ஆரம்பகட்ட தகவல்கள் கூறினாலும், விபத்துக்கான முழுமையான காரணத்தை அதிகாரப்பூர்வ விசாரணை முடிவுகளே தெளிவுபடுத்தும் என தெரிவிக்கப்பட்டுள்ளது. விபத்து நடந்த இடத்தில் மீட்பு மற்றும் விசாரணைப் பணிகள் தொடர்ந்து நடைபெற்று வருகின்றன.
இதற்கிடையே, காங்கோவின் கிழக்குப் பகுதிகளில் கிளர்ச்சிக் குழுக்களுடனான மோதல்கள் தொடர்ந்து வரும் சூழலில் இந்த விமான விபத்து ஏற்பட்டுள்ளது. குறிப்பாக எம்23 உள்ளிட்ட ஆயுதக் குழுக்களுடன் காங்கோ ராணுவம் நீண்டகாலமாக மோதலில் ஈடுபட்டு வருகிறது. இந்த பின்னணியில் மூத்த ராணுவ அதிகாரிகள் உயிரிழந்த சம்பவம் அந்நாட்டில் கூடுதல் கவனத்தை பெற்றுள்ளது.
இதையும் படிங்க: கான்பூரை உலுக்கிய விமான விபத்து! பயிற்சி விமானம் வயலில் விழுந்ததில் 2 பைலட்டுகள் பலி!