நேபாள முன்னாள் பிரதமர் ஜலநாத் கானலின் மனைவி ராஜ்யலட்சுமி சித்ரகார் கலவரத்தில் தீயில் சிக்கி பரிதாபமாக உயிரிழந்த சம்பவம் நேபாளத்தில் அதிர்ச்சியை ஏற்படுத்தியுள்ளது. நேபாள தலைநகர் காத்மாண்டுவில் நடந்த கலவரத்தின் போது, போராட்டக்காரர்கள் ஜலநாத் கானலின் வீட்டிற்கு தீ வைத்தனர். இதில் அவரது மனைவி ராஜ்யலட்சுமி சித்ரகார் வீட்டிற்குள் அடைக்கப்பட்டு, தீயில் சிக்கி கடுமையான காயங்களுக்கு உள்ளானார். உடனடியாக கீர்த்திபூர் பர்ன் மருத்துவமனைக்கு கொண்டு செல்லப்பட்ட அவர், தீவிர சிகிச்சை பலனின்றி உயிரிழந்தார். 

நேபாளத்தில் சமூக ஊடகங்களுக்கு அரசு விதித்த தடையைத் தொடர்ந்து, Gen Z தலைமையிலான போராட்டங்கள் செப்டம்பர் 8 முதல் வன்முறையாக மாறின. ஊழல் மற்றும் உறவினர்களுக்கு சலுகை வழங்குவதாக எழுந்த குற்றச்சாட்டுகளால் ஆத்திரமடைந்த போராட்டக்காரர்கள், பிரதமர், ஜனாதிபதி மற்றும் நாடாளுமன்ற கட்டடங்களுக்கு தீ வைத்தனர். 

இதையும் படிங்க: கலவரமான நேபாளம்.. கொந்தளிக்கும் இளைஞர்கள்.. பிரதமரை தொடர்ந்து குடியரசுத் தலைவரும் ராஜினாமா..!!

இந்தக் கலவரத்தில் ஜலநாத் கானலின் வீடும் தாக்கப்பட்டது. இதற்கு முன்னதாக, பிரதமர் கே.பி. சர்மா ஒலி மற்றும் ஜனாதிபதி ராம் சந்திர பவுடல் ஆகியோர் பதவி விலகியிருந்தனர், இது நேபாளத்தில் அரசியல் கொந்தளிப்பை மேலும் தீவிரப்படுத்தியது. இந்த வன்முறையில் குறைந்தது 22 பேர் உயிரிழந்ததாகவும், நூற்றுக்கணக்கானோர் காயமடைந்ததாகவும் தகவல்கள் தெரிவிக்கின்றன. 

நேபாள அரசு, கலவரத்தைக் கட்டுப்படுத்த ஊரடங்கு உத்தரவு பிறப்பித்துள்ளது. இந்த சம்பவம் நேபாளத்தில் அரசியல் நிலைத்தன்மையின்மை மற்றும் பொருளாதார நெருக்கடியை எதிர்கொள்ளும் மக்களின் கோபத்தை பிரதிபலிக்கிறது. முன்னாள் மன்னர் ஞானேந்திர ஷாவின் ஆதரவாளர்கள் மன்னராட்சியை மீட்டெடுக்க வலியுறுத்தி நடத்திய போராட்டங்களும் இந்த வன்முறையை தூண்டியுள்ளன.

இதையும் படிங்க: நேபாளத்தில் தொடரும் வன்முறை.. இந்தியர்களுக்கு உதவி எண்கள் அறிவிப்பு..!!