வங்கதேச ராணுவத்தின் பயிற்சி நடவடிக்கையில் எதிர்பாராத விபத்து ஏற்பட்டுள்ளது. சட்டோகிராம் பகுதியில் அமைந்துள்ள ஹதாசாரி துப்பாக்கிச் சூடு பயிற்சி மையத்தில் நேற்று நடைபெற்ற பயிற்சியின் போது, சீனாவின் Type 59 தொடர் பீரங்கி ஒன்று திடீரென வெடித்துச் சிதறியது. இதனால் இரு ராணுவ வீரர்கள் சம்பவ இடத்திலேயே உயிரிழந்தனர். மேலும் ஒரு ராணுவ அதிகாரி பலத்த காயங்களுடன் மருத்துவமனையில் அனுமதிக்கப்பட்டுள்ளார்.

பயிற்சியில் ஈடுபட்டிருந்த வீரர்கள் பீரங்கியிலிருந்து துப்பாக்கிச் சூடு நடத்திக் கொண்டிருந்தபோது இந்த அசம்பாவிதம் நிகழ்ந்தது. வெடிப்பு ஏற்பட்ட உடன் பீரங்கிக்குள் இருந்த இரு வீரர்களும் உடனடியாக உயிரிழந்தனர். படுகாயமடைந்த அதிகாரி உயிருக்கு ஆபத்தான நிலையில் ஹெலிகாப்டர் மூலம் தலைநகர் டாக்காவில் உள்ள கூட்டு ராணுவ மருத்துவமனைக்கு கொண்டு செல்லப்பட்டார். அங்கு அவருக்கு தீவிர சிகிச்சை அளிக்கப்பட்டு வருகிறது. மருத்துவர்கள் அவரது நிலையை கண்காணித்து வருகின்றனர்.

இந்த விபத்து குறித்து வங்கதேச ராணுவம் உடனடியாக விரிவான விசாரணையைத் தொடங்கியுள்ளது. தொழில்நுட்பக் கோளாறா, பயிற்சி முறையில் ஏற்பட்ட பிழையா அல்லது வெடிமருந்து தொடர்பான குறைபாடா என்பதை விசாரணைக்குப் பிறகே தீர்மானிக்க முடியும் என ராணுவ அதிகாரிகள் தெரிவித்துள்ளனர். விபத்துக்குள்ளான பீரங்கி சீனாவில் வடிவமைக்கப்பட்ட பழமையான Type 59 முதன்மைப் போர் டேங்க் ஆகும். 

இதையும் படிங்க: வங்கதேசம் திரும்பியதும் அடுத்த அதிரடி! மீண்டும் இந்தியா வந்து மோடியை சந்திப்பேன்: ஷேக் ஹசீனா!

வங்கதேச ராணுவம் இதனை பல ஆண்டுகளாகப் பயன்படுத்தி வருகிறது. பெரும்பாலான இத்தகைய வாகனங்கள் சீன உதவியுடன் Type 59G Durjoy என்ற மேம்படுத்தப்பட்ட பதிப்பாக மாற்றப்பட்டுள்ளன. இதில் துப்பாக்கித் திறனும் கவசப் பாதுகாப்பும் அதிகரிக்கப்பட்டிருந்தாலும், அடிப்படை கட்டமைப்பு பழைய தொழில்நுட்பத்தை அடிப்படையாகக் கொண்டிருப்பதால் பாதுகாப்பு குறித்த கேள்விகள் எழுந்துள்ளன.

https://x.com/ShadowIND_IN/status/2097611763437252952?ref_src=twsrc%5Etfw%7Ctwcamp%5Etweetembed%7Ctwterm%5E2097611763437252952%7Ctwgr%5Ebe6241d61491a5f8b1b94508dbedbab06710bd57%7Ctwcon%5Es1_c10&ref_url=https%3A%2F%2Fwww.maalaimalar.com%2Fnews%2Fworld%2Fchinese-made-cannon-explodes-during-military-exercise-in-bangladesh-2-soldiers-killed

இத்தகைய விபத்துகள் ராணுவப் பயிற்சிகளில் அரிதாகவே நிகழ்ந்தாலும், பழமையான ஆயுத அமைப்புகளைப் பயன்படுத்துவதால் ஏற்படும் அபாயங்களை மீண்டும் நினைவுபடுத்தியுள்ளது. ராணுவம் இந்த சம்பவத்தை மிகுந்த முக்கியத்துவத்துடன் அணுகி வருகிறது. பாதிக்கப்பட்ட வீரர்களின் குடும்பத்தினருக்கு ஆறுதல் தெரிவிக்கப்பட்டுள்ளதுடன், தேவையான உதவிகளும் வழங்கப்படும் என அறிவிக்கப்பட்டுள்ளது. விசாரணை முடிவுகள் வெளியாகும் வரை மேலும் விவரங்கள் தெரியவில்லை.
 

இதையும் படிங்க: போதைப்பொருள் பயன்படுத்தியதை தட்டிக்கேட்டதால் ஆத்திரம்? வங்கதேசத்தில் இந்து ஆசிரியர் குடும்பமே கொலை; 2 பேர் கைது!