நாடு முழுவதும் புதுப்பிக்கத்தக்க எரிசக்தி உற்பத்தியை அதிகரிக்கும் வகையில், ரூ.1.86 லட்சம் கோடி மதிப்பிலான ‘கிரீன் காரிடார் – 3’ திட்டத்திற்கு மத்திய அமைச்சரவை ஒப்புதல் அளித்துள்ளது. 

சூரியசக்தி மற்றும் காற்றாலை மின்சாரம் அதிகளவில் உற்பத்தியாகும் மாநிலங்களில் தமிழகம் முக்கிய இடத்தில் உள்ள நிலையில், இந்தத் திட்டத்தின் கீழ் தமிழகத்தில் மேற்கொள்ள வேண்டிய பணிகளை இறுதி செய்வதில் மின் வாரியம் தாமதித்து வருவதாக தகவல் வெளியாகியுள்ளது.

சூரியசக்தி, காற்றாலை உள்ளிட்ட புதுப்பிக்கத்தக்க மின் நிலையங்களில் உற்பத்தியாகும் மின்சாரத்தை, தேவையான பகுதிகளுக்கு கொண்டு செல்வதற்காக நாட்டின் பல்வேறு பகுதிகளில் பசுமை மின் வழித்தடங்கள் உருவாக்கப்பட்டு வருகின்றன. இதற்காக மத்திய அரசு மாநிலங்களுக்கு நிதியுதவி வழங்கி வருகிறது.

இதையும் படிங்க: தீபாவளிக்கு முன் அரிசி விலை ரூ.100ஐ தாண்டும்? ஆந்திரா, தெலுங்கானா நெல் மூட்டைகளுக்கு வந்த புதிய சிக்கல்!

தமிழகத்தில் ஏற்கனவே முதல் கட்ட பசுமை மின் வழித்தடத் திட்டத்தின் கீழ், திண்டுக்கல் உள்ளிட்ட பகுதிகளில் உயர் மின்னழுத்த துணை மின் நிலையங்கள் மற்றும் மின் வழித்தடங்கள் அமைக்கப்பட்டுள்ளன. இரண்டாம் கட்டத்தின் கீழ் திருநெல்வேலி, திருப்பூர், கன்னியாகுமரி உள்ளிட்ட மாவட்டங்களிலும் இதற்கான பணிகள் மேற்கொள்ளப்பட்டு வருகின்றன.

இந்நிலையில், மூன்றாம் கட்ட திட்டத்தில் மாநிலங்களுக்கு இடையிலான மின் வழித்தடங்களை உருவாக்க ரூ.1.36 லட்சம் கோடியும், பேட்டரி சேமிப்பு கட்டமைப்புகளுக்காக ரூ.50 ஆயிரம் கோடியும் ஒதுக்கப்பட்டுள்ளது. இதில் மத்திய அரசின் நிதியுதவி ரூ.54,082 கோடியாக இருக்கும் என தெரிவிக்கப்பட்டுள்ளது.

இந்த திட்டத்தின் கீழ் தங்களது மாநிலங்களில் மேற்கொள்ளப்பட உள்ள பணிகள் குறித்த விரிவான அறிக்கையை மின் வாரியங்கள் சமர்ப்பிக்க வேண்டும் என மத்திய அரசு ஏற்கனவே அறிவுறுத்தியிருந்தது. ஆனால், தமிழகத்தில் எந்தெந்த பகுதிகளில் பணிகளை மேற்கொள்வது என்பது தொடர்பான இறுதி முடிவில் தாமதம் ஏற்பட்டுள்ளதாக கூறப்படுகிறது.

மின் வாரிய அதிகாரிகள் தரப்பில், தஞ்சாவூர், கடலூர், கன்னியாகுமரி, விழுப்புரம் உள்ளிட்ட மாவட்டங்களில் மின் வழித்தடப் பணிகளுக்கு திட்டமிடப்பட்டுள்ளதாக தெரிவிக்கப்பட்டுள்ளது. அதேசமயம், மின் வாரியம் கடும் நிதி நெருக்கடியை சந்தித்து வருவதால், புதிய மின் வழித்தடப் பணிகளுக்கு தேவையான நிதியை ஏற்பாடு செய்வதில் சிக்கல் இருப்பதாகவும் கூறப்படுகிறது.

இதனால், மத்திய அரசின் நிதியுதவியை அதிகபட்சமாக பெறுவதற்காக தமிழகத்திற்கான திட்டப் பணிகளை விரைந்து இறுதி செய்து, நிதி ஒதுக்கீட்டுக்கு விண்ணப்பிக்க வேண்டும் என மின் வாரியம் அரசிடம் வலியுறுத்தியுள்ளதாக தகவல் வெளியாகியுள்ளது.

இதையும் படிங்க: புதிய தலைமைச் செயலகத்துக்கு எதிரான வழக்கு தள்ளுபடி! திடீர் திருப்பம்! ஐகோர்ட்டில் பரபரப்பு தீர்ப்பு!