மலேசியாவில் பிரதமர் அன்வர் இப்ராஹிம் தலைமையிலான கூட்டணி அரசு, பிரதமர் பதவிக்கு 10 ஆண்டு (அல்லது இரு முறை) வரம்பு விதிக்கும் வரலாற்று சிறப்புமிக்க அரசியலமைப்பு திருத்த மசோதாவை பாராளுமன்றத்தில் தாக்கல் செய்துள்ளது. இது ஜனநாயக செயல் கட்சி (DAP) வலியுறுத்தியதன் அடிப்படையில் நடைபெற்றுள்ளது.

2022-ல் முதல் முறையாக பிரதமரான அன்வர் இப்ராஹிம் தலைமையில் உள்ள கூட்டணி அரசில் DAP மிக முக்கிய பங்கு வகிக்கிறது. அக்கட்சிக்கு 40 எம்பிக்கள் உள்ளனர் – ஆளும் கூட்டணியில் அதிக எம்பிக்கள் கொண்ட கட்சி. தற்போது பாராளுமன்றத்தில் பெரும்பான்மை ஆதரவு இருக்கும் வரை ஒருவர் எவ்வளவு காலம் வேண்டுமானாலும் பிரதமராக நீடிக்கலாம். ஆனால் இதை 10 ஆண்டுகளாக வரம்பிட வேண்டும் என DAP தொடர்ந்து வலியுறுத்தி வந்தது.

இதை ஏற்றுக்கொண்ட அரசு, 'Constitution (Amendment) Bill 2026' என்ற மசோதாவை பிப்ரவரி 23-ஆம் தேதி டெவான் ராக்யத்தில் (கீழ்சபை) முதல் வாசிப்புக்கு தாக்கல் செய்தது. சட்ட அமைச்சர் அசலினா ஓத்மான் சைத் இதை அறிமுகப்படுத்தினார். மசோதா அடுத்த வாரம் இரண்டாவது வாசிப்புக்கு வரும் என எதிர்பார்க்கப்படுகிறது.

இதையும் படிங்க: நண்பன் கூப்பிட்டதால போறேன்! மலேசியா புறப்பட்டார் மோடி! எதிர்பார்ப்பை எகிற வைக்கும் 2 விஷயங்கள்!!

மசோதாவின் முக்கிய அம்சங்கள்:

• பிரதமர் பதவியை தொடர்ச்சியாகவோ அல்லது இடைவெளியுடனோ மொத்தம் 10 ஆண்டுகளுக்கு மேல் வகிக்க முடியாது.
• 10 ஆண்டுகள் முடிந்ததும் பிரதமரும் அமைச்சரவையும் பதவி விலக வேண்டும்.
• இது அன்வர் இப்ராஹிமுக்கு முதலில் பொருந்தும் – அவர் தன்னை முதலில் இதற்கு உட்படுத்துவதாக அறிவித்துள்ளார்.
• முன்னாள் பிரதமர்கள் (எ.கா. மகாதீர் 22 ஆண்டுகள்) ஏற்கனவே 10 ஆண்டுகளுக்கு மேல் பணியாற்றியிருந்தால் மீண்டும் பதவி ஏற்க முடியாது.

மலேசிய பாராளுமன்றத்தில் மொத்தம் 222 எம்பிக்கள் உள்ளனர். அரசியலமைப்பு திருத்தத்துக்கு மூன்றில் இரண்டு பங்கு (148 எம்பிக்கள்) ஆதரவு தேவை. அன்வர் அரசுக்கு சுயேட்சைகள் உட்பட 153 எம்பிக்களின் ஆதரவு உள்ளதால், மசோதா நிறைவேற வாய்ப்பு அதிகம்.

இது மலேசியாவின் ஜனநாயகத்தை வலுப்படுத்தும் முக்கிய சீர்திருத்தமாக பார்க்கப்படுகிறது. DAP-இன் நீண்டகால கோரிக்கையை நிறைவேற்றுவதன் மூலம் அன்வர் தனது சீர்திருத்த பிம்பத்தை மேலும் வலுப்படுத்தியுள்ளார். 2027 பொதுத் தேர்தலுக்கு முன் இது அரசுக்கு ஆதரவை திரட்ட உதவும் என எதிர்பார்க்கப்படுகிறது. மலேசிய அரசியலில் புதிய அத்தியாயம் தொடங்கியுள்ளது!
 

இதையும் படிங்க: நல்லகண்ணுவுக்கு தீவிர சிகிச்சை... G.H.-ல் குவியும் கம்யூனிஸ்டுகள்..!