தலைநகர் டெல்லியின் செங்கோட்டை (ரெட் ஃபோர்ட்) அருகே நவம்பர் 10 (திங்கள்கிழமை) மாலை நடந்த கார் குண்டுவெடிப்பு சம்பவம் நாட்டையே அதிரச் செய்துள்ளது. சிக்னல் அருகே நின்ற காரில் வெடிபொருட்கள் நிரப்பப்பட்டு வெடித்துச் சிதறியதில் குறைந்தது 12 பேர் உயிரிழந்தனர். இன்று (நவம்பர் 13) மேலும் ஒருவர் உயிரிழந்ததால் உயிரிழப்பு 13ஆக அதிகரித்துள்ளது. மேலும் 20க்கும் மேற்பட்டோர் படுகாயமடைந்து அரசு மருத்துவமனைகளில் சிகிச்சை பெற்று வருகின்றனர். 

இந்த சம்பவத்தை மத்திய அரசு “பயங்கரவாத செயல்” (terror incident) என்று அதிகாரப்பூர்வமாக அறிவித்துள்ளது. தேசிய விசாரணை அமைப்பு (என்ஐஏ) தனி அதிகாரிகள் குழுவை அமைத்து விரிவான விசாரணை நடத்தி வருகிறது.
இந்த கோர சம்பவத்துக்கு உலக நாடுகள் கடும் கண்டனம் தெரிவித்து வருகின்றன. இதில் அமெரிக்க வெளியுறவுத்துறை அமைச்சர் மார்கோ ரூபியோ இந்த தாக்குதலை “பயங்கரவாத தாக்குதல்” (terror attack) என்று தெளிவாகக் குறிப்பிட்டுள்ளார். 

கனடாவின் ஒன்டாரியோவில் நடைபெற்ற ஜி7 வெளியுறவு அமைச்சர்கள் கூட்டத்தின் புறநடைவில் நிருபர்களிடம் பேசிய ரூபியோ, இந்தியாவின் விசாரணைக்கு பாராட்டு தெரிவித்தார். அவர் கூறியதாவது: “டெல்லியில் நடந்த குண்டுவெடிப்பு ‘பயங்கரவாத தாக்குதல்’ என்று தெளிவாகத் தெரிகிறது. இந்தியர்களைப் பாராட்ட வேண்டும். ஏனெனில் இந்த விசாரணையை எவ்வாறு மேற்கொள்ள வேண்டும் என்பதில் மிகவும் எச்சரிக்கையாகவும் கைதேர்ந்தவர்களாகவும் இருக்கின்றனர். 

இதையும் படிங்க: நமது ஆன்மாக்களை அசைக்க முடியாது! பயங்கரவாத தாக்குதலுக்கு இஸ்ரேல் கண்டனம்!! இந்தியாவுக்கு பாராட்டு!

விசாரணை தொடர்ந்து நடைபெற்று வருகிறது. இது ஒரு பயங்கரவாத தாக்குதல்தான். வெடிபொருட்கள் நிரப்பப்பட்ட ஒரு கார் வெடித்துச் சிதறி பலர் இறந்துள்ளனர். இந்திய அமைப்புகள் விசாரணையை சரியாகச் செய்கின்றன. அவர்களிடம் உண்மையான ஆதாரங்கள் இருக்கும் என்று நினைக்கிறேன். விரைவில் அதை வெளியிடுவார்கள்.”

மேலும் ரூபியோ, “இந்திய வெளியுறவுத்துறை அமைச்சர் ஜெய்சங்கரிடம் இதுகுறித்துப் பேசினேன். நாங்கள் இந்தியாவுக்கு உதவ முன்வந்தோம். ஆனால் இந்த விசாரணை தொடர்பாக இந்தியர்களுக்கு யாருடைய உதவியும் தேவையில்லை. இதனை எதிர்கொள்ளும் திறமை அவர்களுக்கு இருக்கிறது. அவர்கள் மிகவும் திறமையானவர்கள். நமது உதவி தேவையில்லை. அவர்கள் நல்ல வேலையைச் செய்கின்றனர்” என்று கூறினார். இந்த சந்திப்பின்போது, டெல்லி குண்டுவெடிப்பில் உயிரிழந்தவர்களுக்கு ரூபியோ இரங்கல் தெரிவித்ததாக ஜெய்சங்கர் தனது சமூகவலைதளத்தில் குறிப்பிட்டுள்ளார்.

இந்தியாவின் விசாரணை, ஜெய்ஷ்-இ-முகமது (ஜெஎம்) பயங்கரவாத அமைப்புடன் தொடர்புடைய “வெள்ளை காலரே” (white-collar) தீவிரவாத நெட்வொர்க்கை அம்பலப்படுத்தியுள்ளது. விசாரணையில், டாக்டர் உமர் உன் நபி (டாக்டர் உமர் மொஹம்மது) தற்கொலை குண்டுதாரி என டிஎன்ஏ சோதனை உறுதி செய்துள்ளது. ஹரியானாவின் ஃபரிடாபாத்தில் 2,921 கிலோ வெடிபொருட்கள் பறிமுதல் செய்யப்பட்டுள்ளன. டாக்டர்கள், இமாம்கள் உள்ளிட்ட பலர் கைது செய்யப்பட்டுள்ளனர். இந்த சதி ஆகஸ்ட் 2025ல் தொடங்கி, டிசம்பர் 6 (பாப்ரி மசூதி இடிப்பு நாள்) வரை 6-7 இடங்களில் குண்டுவெடிப்புகளை திட்டமிட்டிருந்தது.

பிரதமர் நரேந்திர மோடி தலைமையில் நடந்த மத்திய அமைச்சரவை கூட்டம், இந்த சம்பவத்துக்கு கண்டனம் தெரிவித்து, விசாரணையை விரைவுபடுத்த உத்தரவிட்டுள்ளது. உயிரிழந்தவர்களின் குடும்பங்களுக்கு ரூ.10 லட்சம் நிதி உதவி அறிவிக்கப்பட்டுள்ளது. நாட்டின் முக்கிய இடங்களில் பாதுகாப்பு பலப்படுத்தப்பட்டுள்ளது. அமெரிக்காவின் இந்த ஆதரவு, இந்தியாவின் பயங்கரவாத எதிர்ப்பு போருக்கு வலிமை சேர்க்கிறது.

இதையும் படிங்க: பயங்கரவாத அமைப்பில் சேர்ந்த உமர் மனைவி!! இந்தியாவுக்கு எதிராக மீண்டும் சதிவலை?!