நீலகிரி மாவட்டத்தில் பெய்து வரும் மிக கனமழையால் மரங்கள் சாலைகளில் விழுவதுடன், பல்வேறு இடங்களில் மண்சரிவுகளும் ஏற்பட்டு போக்குவரத்து பாதிக்கப்பட்டுள்ளது. இதையடுத்து, மலைப்பாதைகளில் பயணம் செய்வோர் மிகுந்த எச்சரிக்கையுடன் இருக்க வேண்டும் என மாவட்ட ஆட்சியர் லட்சுமி பவ்யா அறிவுறுத்தியுள்ளார். மேலும், அரசு பேருந்துகள் உள்ளிட்ட அனைத்து வாகனப் போக்குவரத்தும் மாலை 6 மணி முதல் காலை 7 மணி வரை நிறுத்தப்படும் என்றும் அறிவித்துள்ளார்.
நீலகிரி மாவட்டத்தில் கனமழை காரணமாக சாலைகளில் மரங்கள் விழுதல், மண்சரிவு, பாறைகள் சரிந்து விழுதல் போன்ற பாதிப்புகள் ஏற்படும் அபாயம் நிலவுகிறது. இதனால், மேட்டுப்பாளையத்திலிருந்து குன்னூர் மற்றும் கோத்தகிரி வழியாக ஊட்டிக்குச் செல்லும் பொதுமக்கள் மலைப்பாதைகளைத் தவிர்க்குமாறு மாவட்ட நிர்வாகம் அறிவுறுத்தியுள்ளது.
சுற்றுலாப் பயணிகளுக்கு எச்சரிக்கை
நீலகிரிக்கு வரும் சுற்றுலாப் பயணிகள் மற்றும் பொதுமக்கள் நீர்வீழ்ச்சிகள், ஏரிகள் உள்ளிட்ட நீர்நிலைகளுக்குச் செல்ல வேண்டாம் என அறிவுறுத்தப்பட்டுள்ளது. கனமழையின்போது திடீர் வெள்ளப்பெருக்கு ஏற்படுவதற்கான வாய்ப்பு இருப்பதால், நீர்நிலைகளின் அருகே செல்வதைத் தவிர்க்க வேண்டும்.
இதையும் படிங்க: உதகை மண்சரிவில் ஓட்டுநர் பலி!! அதிர்ஷ்டவசமாக உயிர்த் தப்பிய 50 பயணிகள்! நடத்துனரின் அதிர்ச்சி வாக்குமூலம்!
மண்சரிவு ஏற்படக்கூடிய பகுதிகள், மரங்கள் விழும் அபாயம் உள்ள இடங்கள் மற்றும் பாறைகள் சரிந்து விழக்கூடிய மலைப்பாதைகளில் மக்கள் எச்சரிக்கையுடன் இருக்க வேண்டும். மாவட்ட நிர்வாகம் வெளியிடும் அதிகாரப்பூர்வ அறிவுறுத்தல்களைப் பின்பற்ற வேண்டும் என்றும் கேட்டுக்கொள்ளப்பட்டுள்ளது.
அத்தியாவசியத் தேவைகளைத் தவிர்த்து பொதுமக்கள் வெளியே செல்வதையும், சுற்றுலாத் தலங்களுக்குச் செல்வதையும் தவிர்க்க வேண்டும். வாகனங்களை மரங்களின் அடியில் நிறுத்தக்கூடாது என்றும் அறிவுறுத்தப்பட்டுள்ளது. மழை பெய்யும்போது மின்கம்பங்கள் மற்றும் மின்கம்பிகளைத் தொடக்கூடாது எனவும் எச்சரிக்கப்பட்டுள்ளது.
இரவு நேரப் போக்குவரத்துக்கு கட்டுப்பாடு
மாவட்ட ஆட்சியர் அறிவிப்பின்படி, அரசு பேருந்துகள் உட்பட அனைத்து வாகனங்களின் போக்குவரத்தும் மாலை 6 மணி முதல் மறுநாள் காலை 7 மணி வரை நிறுத்தப்படும். வடகிழக்குப் பருவமழையை எதிர்கொள்ள மாவட்ட நிர்வாகம் தேவையான முன்னெச்சரிக்கை நடவடிக்கைகளை மேற்கொண்டு வருவதாகவும், பொதுமக்கள் அச்சமடையத் தேவையில்லை என்றும் ஆட்சியர் தெரிவித்துள்ளார்.
அவசர உதவி எண்கள்
மழை மற்றும் இயற்கை இடர்பாடுகளால் பாதிப்பு ஏற்பட்டால், நீலகிரி மாவட்ட அவசரகாலக் கட்டுப்பாட்டு மையத்தின் கட்டணமில்லா எண் 1077 அல்லது 0423-2450034, 0423-2450035 ஆகிய எண்களைத் தொடர்புகொண்டு தகவல் தெரிவிக்கலாம்.
ஊட்டிக்கு 0423-24455772, குன்னூருக்கு 0423-2206002, கூடலூருக்கு 04262-261296, குந்தாவுக்கு 0423-2508123, பந்தலூருக்கு 04262-220734 ஆகிய எண்களிலும் தொடர்புகொள்ளலாம்.
கனமழை நீடிக்கும் நிலையில், பயணத்தைத் திட்டமிடுவோர் போக்குவரத்து நிலவரம் மற்றும் மாவட்ட நிர்வாகத்தின் சமீபத்திய அறிவிப்புகளை உறுதிப்படுத்திக்கொண்டு செயல்படுவது அவசியம்.
இதையும் படிங்க: உதகைக்கு வராதீங்க! பேய் மழையில் திக்குமுக்காடும் நீலகிரி! சுற்றுலாப் பயணிகளுக்கு மாவட்ட நிர்வாகம் வார்னிங்!