இந்திய பிரதமர் நரேந்திர மோடி தனது செசல்ஸ் பயணத்தின் போது, அந்நாட்டு தலைநகர் விக்டோரியாவில் அமைந்துள்ள அருள்மிகு நவசக்தி விநாயகர் கோயிலுக்கு சென்று சிறப்பு தரிசனம் செய்தார். கோயிலுக்கு வருகை தந்த பிரதமர் மோடிக்கு பூரண கும்ப மரியாதையுடன் உற்சாக வரவேற்பு அளிக்கப்பட்டது. இந்த நிகழ்வில் செசல்ஸ் வாழ் இந்தியர்கள், குறிப்பாக தமிழர்கள், பெருமளவில் பங்கேற்று பிரதமரை வரவேற்றனர்.
விக்டோரியா நகரின் முக்கிய அடையாளங்களில் ஒன்றாக விளங்கும் நவசக்தி விநாயகர் கோயில், செசல்ஸில் உள்ள ஒரே இந்து ஆலயமாக அறியப்படுகிறது. தமிழர்களின் முயற்சியால் உருவாக்கப்பட்ட இந்த கோயில், பல ஆண்டுகளாக அந்நாட்டில் வாழும் இந்திய சமூகத்தின் ஆன்மிக மையமாக செயல்பட்டு வருகிறது. தென்னிந்திய திராவிடக் கட்டிடக்கலை பாணியில் அமைந்துள்ள இந்த ஆலயம், செசல்ஸ் நாட்டிற்கு வரும் இந்திய தலைவர்கள் மற்றும் சுற்றுலா பயணிகளின் கவனத்தையும் ஈர்த்து வருகிறது.
கோயிலுக்குள் சென்ற பிரதமர் மோடி, விநாயகப் பெருமானை தரிசித்து சிறப்பு வழிபாடு மேற்கொண்டார். பின்னர் கோயில் நிர்வாகிகள் மற்றும் பக்தர்களை சந்தித்து அவர்களுடன் கலந்துரையாடினார். தமிழர்களின் கலாச்சாரம் மற்றும் ஆன்மிக பாரம்பரியத்தை வெளிநாட்டிலும் பாதுகாத்து வரும் சமூகத்தினரின் பணியை அவர் பாராட்டியதாக தகவல்கள் தெரிவிக்கின்றன.
இதையும் படிங்க: இந்தியா உலகிற்கு முன்மாதிரி: சீஷெல்ஸ் நாட்டின் உயரிய விருது பெற்ற பிரதமர் மோடிக்கு அமித் ஷா வாழ்த்து!
இந்த நிகழ்வு இந்தியா – செசல்ஸ் உறவுகளிலும் முக்கியத்துவம் வாய்ந்ததாக பார்க்கப்படுகிறது. இரு நாடுகளுக்கும் இடையிலான நட்பு, கலாச்சார உறவு மற்றும் இந்திய வம்சாவளியினரின் பங்களிப்பு ஆகியவற்றை மேலும் வலுப்படுத்தும் நிகழ்வாக இது அமைந்துள்ளதாக அரசியல் மற்றும் தூதரக வட்டாரங்கள் கருதுகின்றன.
பிரதமர் மோடியின் கோயில் தரிசன புகைப்படங்கள் மற்றும் வீடியோக்கள் சமூக வலைதளங்களில் வேகமாக பரவி வருகின்றன. குறிப்பாக, தமிழர்கள் கட்டிய விநாயகர் கோயிலில் பிரதமருக்கு அளிக்கப்பட்ட பூரண கும்ப மரியாதை பலரது கவனத்தை ஈர்த்துள்ளது. இதன் மூலம் செசல்ஸ் நாட்டில் வாழும் தமிழ் சமூகத்தின் கலாச்சார அடையாளமும், இந்திய பாரம்பரியத்தின் தாக்கமும் மீண்டும் உலக அரங்கில் பேசுபொருளாகியுள்ளது.
இதையும் படிங்க: நாளை செஷல்ஸ் செல்கிறார் பிரதமர் மோடி..!! அதிபர் பேட்ரிக் உடன் முக்கிய சந்திப்பு..!!