மத்திய உள்துறை அமைச்சகத்தின் உத்தரவின்படி, நாடு முழுவதும் உள்ள ஆளுநர் இல்லங்களான ராஜ்பவன் மற்றும் ராஜ் நிவாஸ்களை லோக் பவன் மற்றும் லோக் நிவாஸ் என மாற்ற வேண்டும் என்ற அறிவிப்பு வெளியாகியுள்ளது. இதனைச் சுட்டிக்காட்டி, தமிழ்நாடு முதலமைச்சர் மு.க.ஸ்டாலின் கடும் விமர்சனம் செய்துள்ளார். பெயர் மாற்றத்தைவிட சிந்தனை மாற்றமே தேவை என்று அவர் வலியுறுத்தியுள்ளார். 

மத்திய அரசின் இந்த உத்தரவு, பிரதமர் நரேந்திர மோடியின் விக்சித் பாரத் இலக்கை நோக்கிய பொதுமக்கள் பங்கேற்பை உறுதிப்படுத்தும் வகையில் வெளியிடப்பட்டுள்ளது. கொலோனியல் சகாப்தத்தின் எச்சமான 'ராஜ்' என்ற சொல்லை அகற்றி, மக்கள் சார்ந்த அணுகுமுறையை ஊக்குவிப்பதே இதன் நோக்கம் என மத்திய உள்துறை அமைச்சகம் தெரிவித்துள்ளது.

கடந்த 2024 ஆகஸ்ட் மாதம், டெல்லியில் குடியரசுத் தலைவர் மாளிகையில் நடைபெற்ற ஆளுநர்கள் மாநாட்டில், தமிழ்நாடு ஆளுநர் ஆர்.என். ரவி, நாடு முழுவதும் உள்ள ராஜ் பவன்களின் பெயரை 'மக்கள் பவன்' என்று மாற்ற வேண்டும் எனக் கோரிக்கை விடுத்திருந்தார். தற்போது இதற்கு மத்திய உள்துறை அமைச்சகம் ஒப்புதல் அளித்துள்ளது. மேற்கு வங்கத்தில் ஆளுநர் சி.வி.ஆனந்த போஸ் இந்த உத்தரவை உடனடியாக அமல்படுத்தி, கொல்கத்தாவில் உள்ள ராஜ்பவனை லோக் பவன் என மாற்றியுள்ளார். இது ஆளுநர் இல்லத்தை மக்களுக்கு திறந்த வீடாக மாற்றும் முயற்சியின் தொடர்ச்சி எனக் கூறப்படுகிறது. 

இதையும் படிங்க: பீகார் தேர்தல் முடிவுகள்: அனைவருக்குமான பாடம்..!! முதல்வர் ஸ்டாலின் சொல்வது என்ன..??

இந்நிலையில் தமிழ்நாட்டில் இந்த மாற்றத்துக்கு முதலமைச்சர் ஸ்டாலின் கடும் எதிர்ப்பு தெரிவித்துள்ளார். தனது சமூக வலைதளப் பக்கத்தில், "பெயர் மாற்றத்தைவிடச் சிந்தனை மாற்றமே தேவை! சட்டமன்றம் = மக்கள் மன்றம்! சட்டமன்றத்தை மதிக்காதவர்கள், “மக்கள் மாளிகை” எனப் பெயர் மாற்றுவது கண் துடைப்பா? மக்களாட்சித் தத்துவத்தின் கண்களில் மண்ணைத் தூவுவதற்கா?" என்று கேள்வி எழுப்பியுள்ளார்.

மக்களால் தேர்ந்தெடுக்கப்பட்ட அரசுகளையும், சட்டமன்றங்களையும் மதிக்காதவர்கள் இத்தகைய பெயர் மாற்றங்களைச் செய்வது வெறும் போலித்தனம் என்று அவர் குற்றம்சாட்டியுள்ளார். சிந்தனை மற்றும் செயல்பாடுகளில் மாற்றம் இல்லையெனில், இத்தகைய பெயர் மாற்றங்கள் தேவையற்றவை என்றும் அவர் வலியுறுத்தியுள்ளார்.

தமிழ்நாட்டில் ஆளுநர் ஆர்.என்.ரவி மற்றும் முதலமைச்சர் ஸ்டாலின் இடையே ஏற்கனவே பல்வேறு விவகாரங்களில் மோதல் நீடித்து வருகிறது. சமீபத்தில், ஆளுநர் ரவி, தமிழ்நாட்டை 'எக்ஸ்ட்ரீமிஸ்ட்' எனக் குறிப்பிட்டதாக ஸ்டாலின் விமர்சித்திருந்தார். இந்நிலையில், இந்த பெயர் மாற்ற உத்தரவு புதிய சர்ச்சையை ஏற்படுத்தியுள்ளது. மத்திய அரசு இதன்மூலம் கொலோனியல் எச்சங்களை அகற்றுவதாகக் கூறினாலும், எதிர்க்கட்சிகள் இதை அரசியல் உள்நோக்கம் கொண்டதாகக் கருதுகின்றன.

இதுவரை தமிழ்நாட்டில் ராஜ்பவன் பெயர் மாற்றம் அமல்படுத்தப்படவில்லை என்று தகவல்கள் தெரிவிக்கின்றன. ஆனால், இந்த விவகாரம் மேலும் உரசல்களை ஏற்படுத்தலாம் என அரசியல் வட்டாரங்கள் கருதுகின்றன. மக்களாட்சியின் அடிப்படை தத்துவங்களை மதிப்பது மட்டுமே உண்மையான மாற்றம் என்பது ஸ்டாலினின் கருத்து, இந்த விவாதத்தை மேலும் ஆழமாக்கியுள்ளது.

இதையும் படிங்க: இலங்கைக்கு துணை நிற்போம்..!! உதவிக்கரம் நீட்ட தமிழக அரசு தயார்..!! முதல்வர் ஸ்டாலின் உறுதி..!!