தென்கொரிய இளைஞர்கள் ஜப்பானை நோக்கி வேலை தேடி பெருமளவில் குடியேறும் போக்கு தற்போது வேகமாக வளர்ந்து வருகிறது. சொந்த நாட்டில் தகுதிக்கேற்ற தொடக்க நிலை வேலைவாய்ப்புகள் கிடைக்காததால் பலர் அண்டை நாட்டிற்குச் செல்லத் தள்ளப்படுகின்றனர்.

தென்கொரியாவில் இளைஞர்களுக்கான வேலையின்மை விகிதம் ஜூன் 2026-இல் 7 சதவீதமாக உயர்ந்துள்ளது. பெரிய நிறுவனங்கள் அனுபவமுள்ளவர்களை விரும்பி நியமிப்பதும், வயதான ஊழியர்கள் நீண்ட காலம் பணியில் இருப்பதும் இளைஞர்களுக்கு வாய்ப்புகளை குறைத்துள்ளன. பல பட்டதாரிகள் ஒரு ஆண்டுக்கும் மேலாக வேலை தேடியும் கிடைக்காமல் அவதிப்படுகின்றனர்.

இதற்கு நேர்மாறாக ஜப்பான் தீவிர தொழிலாளர் பற்றாக்குறையை எதிர்கொள்கிறது. வயதான மக்கள் தொகை மற்றும் குறைந்த பிறப்பு விகிதம் காரணமாக நிறுவனங்கள் புதிய பட்டதாரிகளை நிரப்ப முடியாமல் திணறுகின்றன. ஜப்பானின் ஒட்டுமொத்த வேலையின்மை விகிதம் வெறும் 2.5 சதவீதமாக உள்ளது. இதனால் ஜப்பானிய நிறுவனங்கள் தென்கொரிய இளைஞர்களை ஆர்வத்துடன் வரவேற்கின்றன.

இதையும் படிங்க: "ஜப்பானை உலுக்கிய 7.1 ரிக்டர் நிலநடுக்கம்.. கட்டிடங்கள் சேதம், 1 மீட்டர் உயரத்திற்குச் சுனாமி எச்சரிக்கை!

சியோலில் இந்த ஆண்டு மட்டும் குறைந்தது மூன்று ஜப்பான் சார்ந்த வேலைவாய்ப்பு முகாம்கள் நடத்தப்பட்டுள்ளன. கேனான் இமேஜிங் சிஸ்டம்ஸ், அஸ்பில் போன்ற நிறுவனங்கள் நேரடியாக பேட்டி எடுத்துள்ளன. தொழில்நுட்பம், தகவல் தொழில்நுட்பம், பொறியியல், சில்லறை வணிகம், விளையாட்டு மேம்பாடு உள்ளிட்ட துறைகளில் வாய்ப்புகள் அதிகம். முன்னனுபவம் இல்லாத புதிய பட்டதாரிகளுக்கு முழுமையான பயிற்சி அளித்து பணியமர்த்த ஜப்பானிய நிறுவனங்கள் தயாராக உள்ளன.

கடந்த 2025-இல் அரசு ஆதரவு திட்டங்கள் மூலம் 2,257 தென்கொரிய இளைஞர்கள் ஜப்பானில் வேலை பெற்றுள்ளனர். இது முந்தைய ஆண்டை விட 47 சதவீதம் அதிகம். இதனால் ஜப்பான் தென்கொரிய இளைஞர்களின் வெளிநாட்டு வேலைவாய்ப்புக்கு முதன்மை இடமாக மாறியுள்ளது. தற்போது ஜப்பானில் சுமார் 80,000-க்கும் மேற்பட்ட தென்கொரியர்கள் தொழில்முறை பணிகளில் ஈடுபட்டுள்ளனர்.

மொழித் திறன், கல்வித் தரம், பண்பாட்டு ஒற்றுமை ஆகியவற்றை ஜப்பானிய நிறுவனங்கள் மதிக்கின்றன. இதனால் இரு நாடுகளின் தொழிலாளர் சந்தைகளும் ஒருவகையில் நன்மை பெறுகின்றன. தென்கொரிய இளைஞர்களுக்கு புதிய வாய்ப்பும், ஜப்பானுக்கு தேவையான திறனும் கிடைக்கும் இந்த போக்கு தொடர வாய்ப்புள்ளது. 

இதையும் படிங்க: "பட்ஜெட்டிற்கு பயந்த TVK"..! ஜனநாயக படுகொலை... உதய் கைதுக்கு துரைமுருகன் கண்டனம்..!!