அமெரிக்க அதிபர் டொனால்டு டிரம்பின் ஒவ்வொரு சமூக ஊடகப் பதிவும் உலகப் பங்குச் சந்தைகளில் புயலை ஏற்படுத்தும் சக்தி கொண்டது. இந்த நிலையில், அவரது ட்ரூத் சோஷியல் தளத்தின் உரிமையாளரான டிரம்ப் மீடியா அண்ட் டெக்னாலஜி குழுமம் (TMTG), பெரும் முதலீட்டாளர்கள் மற்றும் உயர் அதிர்வெண் வர்த்தக நிறுவனங்களுக்கு மில்லி விநாடி வேகத்தில் அவரது பதிவுகளை வழங்கும் ‘ட்ரூத் ஏபிஐ’ சேவையை அறிமுகப்படுத்தியுள்ளது. இந்த சேவைக்கு மாதம் ஒரு கோடி ரூபாய் வரை கட்டணம் வசூலிக்க திட்டமிடப்பட்டுள்ளது. மூன்றாண்டு ஒப்பந்தத்தில் சேர்ந்தால் மாதம் சுமார் 60 லட்சம் ரூபாய் வரை தள்ளுபடி அளிக்கப்படும் எனக் கூறப்படுகிறது.
டிரம்ப் 2020 தேர்தலுக்கு முன்பு எக்ஸ் தளத்தில் இருந்து தடை செய்யப்பட்டதைத் தொடர்ந்து, 2022-ல் தனது சொந்த தளமான ட்ரூத் சோஷியலைத் தொடங்கினார். இன்று இது அவரது முக்கிய தகவல் தொடர்பு சேனலாக மாறியுள்ளது. அவரது பதிவுகள் பெரும்பாலும் வர்த்தக கொள்கைகள், வரிகள், சர்வதேச உறவுகள் போன்றவற்றைத் தொடுகின்றன. உதாரணமாக, சில நாடுகளுக்கு விதிக்கப்பட்ட வரிகளைத் தற்காலிகமாக நிறுத்தி வைக்கும் முடிவை அறிவித்தபோது, “இது பங்குகள் வாங்க சிறந்த நேரம்” எனக் குறிப்பிட்டார். அந்தப் பதிவை உடனடியாகப் பயன்படுத்திய முதலீட்டாளர்கள் பெரும் லாபம் ஈட்டினர்.
மற்றொரு சம்பவத்தில், ஈரானுடன் பதற்றம் நிலவியபோது “ஈரானுடன் ஆக்கப்பூர்வமான உரையாடல்கள் நடைபெற்று வருகின்றன” என டிரம்ப் பதிவிட்டார். இதனால் சர்வதேச கச்சா எண்ணெய் விலை கணிசமாகக் குறைந்தது. எண்ணெய் சார்ந்த நிறுவனங்களின் பங்குகள் ஏற்றம் கண்டன. இத்தகைய பதிவுகள் நிமிடங்களில் பல பில்லியன் டாலர் மதிப்புள்ள சந்தை நகர்வுகளை ஏற்படுத்துகின்றன. எனவே, மில்லி விநாடிகளில் தகவலைப் பெறுவது உயர் அதிர்வெண் வர்த்தகர்களுக்கு (HFT) உயிர்-மரண பிரச்னையாக மாறியுள்ளது.
இதையும் படிங்க: உலகக் கோப்பை கால்பந்து இறுதிப் போட்டியில் டிரம்ப்..!! பரபரப்பை ஏற்றும் வரலாற்று நிகழ்வு..!!
ட்ரூத் ஏபிஐ சேவை ஆகஸ்ட் 1 முதல் செயல்படத் தொடங்கும். இது டிரம்ப் உள்ளிட்ட 10 முக்கிய கணக்குகளின் பதிவுகளை 24 மணி நேரமும், மில்லி விநாடி வேகத்தில் வழங்கும். 2022 முதலான வரலாற்று ஆவணங்களும் இதில் அடங்கும். இதன் மூலம் TMTG புதிய வருவாய் ஆதாரத்தை உருவாக்குகிறது. ஏற்கெனவே சில நிறுவனங்கள் சந்தா செலுத்தியுள்ளதாக நிறுவனம் தெரிவித்துள்ளது.
இந்த நடவடிக்கைக்கு ஜனநாயகக் கட்சியினர் கடும் எதிர்ப்பு தெரிவித்துள்ளனர். அதிபரின் பதிவுகளுக்கு முன்னுரிமை அளிப்பது சந்தை சமத்துவத்தை பாதிக்கும், நலன் முரண்பாடு ஏற்படுத்தும் என அவர்கள் விமர்சிக்கின்றனர். டிரம்ப் TMTG-யில் கணிசமான பங்குகளை வைத்துள்ள நிலையில், இந்த சேவை அவருக்கு நேரடி நிதி லாபத்தைத் தரும்.
வர்த்தக உலகில் தகவல் வேகமே எல்லாம். டிரம்பின் பதிவுகளை முன்னதாகப் பெறும் சக்தி வாய்ந்த முதலீட்டாளர்களுக்கு இது பெரும் போட்டி வாய்ப்பை அளிக்கும். ஆனால் சாதாரண முதலீட்டாளர்கள் பின்தங்கும் அபாயமும் உள்ளது. ட்ரூத் சோஷியலின் இந்த புதிய வியாபார மாதிரி, சமூக ஊடக உலகில் தகவல் வணிகமயமாக்கலின் புதிய அத்தியாயத்தைத் தொடங்கியுள்ளது.
இதையும் படிங்க: இந்தியாவுக்கு மகிழ்ச்சி தரும் அமெரிக்க அறிவிப்பு.. ரஷிய எண்ணெய் வரி 500%-இலிருந்து 100% ஆகக் குறைப்பு..!!