மேற்காசியாவில் பதற்றம் மேலும் தீவிரமடைந்துள்ள நிலையில், முக்கியமான கடல் வழித்தடமான ஹார்முஸ் ஜலசந்தி (Strait of Hormuz) பகுதியில் அமெரிக்க ராணுவம் கடும் கண்காணிப்பை மேற்கொண்டுள்ளது. கடந்த எட்டு நாட்களில் மட்டும் 27 கப்பல்களை திருப்பி அனுப்பியதாகவும், ஒரு கப்பலை நேரடியாக சுட்டுப் பிடித்ததாகவும் தகவல்கள் வெளியாகியுள்ளன.

ஈரான் (Iran) மற்றும் அமெரிக்கா (United States) ஆகிய நாடுகளுக்கு இடையே சமீபத்தில் ஏற்பட்ட மோதலுக்கு பின், இந்த நடவடிக்கைகள் மேற்கொள்ளப்பட்டுள்ளன. உலகின் மிக முக்கியமான எண்ணெய் போக்குவரத்து பாதையாக கருதப்படும் ஹார்முஸ் ஜலசந்தி தற்போது பாதுகாப்பு வளையத்துக்குள் கொண்டு வரப்பட்டுள்ளது. இதன் மூலம் ஈரானுடன் தொடர்புடைய கப்பல்களின் இயக்கத்தை கட்டுப்படுத்த அமெரிக்கா முயற்சி செய்து வருகிறது.

அமெரிக்க ராணுவம் வெளியிட்ட தகவலின்படி, கடந்த 13ஆம் தேதி முதல் அமலுக்கு வந்த இந்த கட்டுப்பாடுகளின் கீழ், ஈரான் துறைமுகங்களுக்கு செல்லும் அல்லது அங்கிருந்து புறப்படும் கப்பல்களுக்கு தடைகள் விதிக்கப்பட்டுள்ளன.

இதையும் படிங்க: பிரதமர் மோடிக்கு இரவில் போன் போட்ட ட்ரம்ப்!! 40 நிமிடங்கள் நீடித்த பேச்சு!! மேற்காசிய போர் பதற்றம் எதிரொலி!

இதன் காரணமாக, ஈரான் தொடர்புடைய 27 கப்பல்கள் திருப்பி அனுப்பப்பட்டதாக கூறப்படுகிறது. இந்த நடவடிக்கை சர்வதேச வர்த்தகத்திலும் தாக்கத்தை ஏற்படுத்தும் என நிபுணர்கள் எச்சரிக்கின்றனர்.

மேலும், ஓமன் (Gulf of Oman) பகுதியில் ஈரான் கொடியுடன் சென்ற “தவுஸ்கா” என்ற கப்பல் சந்தேகத்தின் பேரில் தடுத்து நிறுத்தப்பட்டது. அந்த கப்பலை 'யு.எஸ்.எஸ். ஸ்ப்ரூவான்ஸ்'  (USS Spruance) என்ற அமெரிக்க கடற்படை போர்க்கப்பல் மடக்கிப் பிடித்ததாக தெரிவிக்கப்பட்டுள்ளது. இந்த சம்பவம் கடல் பாதுகாப்பு நடவடிக்கைகள் இன்னும் தீவிரப்படுத்தப்பட்டுள்ளதை காட்டுகிறது.

இந்த நடவடிக்கைகள் உலகளாவிய வர்த்தகம் மற்றும் எரிசக்தி விநியோகத்தில் பாதிப்பை ஏற்படுத்தக்கூடும் என்ற அச்சம் எழுந்துள்ளது. குறிப்பாக, எண்ணெய் விலைகள் உயரக்கூடும் என்ற கவலைவும் நிலவுகிறது. ஹார்முஸ் ஜலசந்தி வழியாக உலகின் பெரும்பாலான எண்ணெய் கப்பல்கள் செல்லும் நிலையில், இங்கு உருவாகும் எந்த பதற்றமும் உலக பொருளாதாரத்தில் தாக்கத்தை ஏற்படுத்தும்.

இதற்கிடையில், இந்த நிலைமை மேலும் மோசமடையுமா அல்லது இரு நாடுகளும் பேச்சுவார்த்தை மூலம் தீர்வு காணுமா என்பது சர்வதேச சமூகத்தின் கவனத்தை ஈர்த்துள்ளது.

இதையும் படிங்க: எங்கள் விவகாரங்களில் தலையிட வேண்டாம்!! அமெரிக்காவுக்கு சீனா நேரடி வார்னிங்!!