அமெரிக்க தேர்தலில் இந்திய வம்சாவளி விவேக் ராமசுவாமிக்கு அதிர்ச்சி தோல்வி! கவர்னர் கனவு தகர்ந்தது!

அமெரிக்க இடைக்காலத் தேர்தலில் ஓஹியோ மாகாண ஆளுநர் பதவிக்குப் போட்டியிட்ட இந்திய வம்சாவளியைச் சேர்ந்த தொழிலதிபர் விவேக் ராமசுவாமி தோல்வியைச் சந்தித்துள்ளார். குடியரசுக் கட்சி சார்பில் களமிறங்கிய அவரை எதிர்த்துப் போட்டியிட்ட ஜனநாயகக் கட்சியின் ஏமி ஆக்டன் வெற்றி பெற்று ஆளுநர் பதவியைக் கைப்பற்றியுள்ளார்.

39 வயதான விவேக் ராமசுவாமி, அமெரிக்க அரசியலில் கவனம் பெற்ற இந்திய வம்சாவளியினர் ஆவார். கடந்த ஆண்டு நடைபெற்ற குடியரசுக் கட்சியின் அதிபர் வேட்பாளர் தேர்விலும் அவர் போட்டியிட்டார். பின்னர் டொனால்ட் டிரம்ப் குடியரசுக் கட்சியின் அதிபர் வேட்பாளராக அறிவிக்கப்பட்டு வெற்றி பெற்றார்.

டிரம்ப் தலைமையிலான நிர்வாகத்தில் அரசின் செயல்திறனை மேம்படுத்துவதற்காக உருவாக்கப்பட்ட அரசுத் திறன் துறைக்கு எலான் மஸ்க்குடன் இணைந்து விவேக் ராமசுவாமி தலைமை வகிப்பார் என்றும் ஆரம்பத்தில் அறிவிக்கப்பட்டது. இதன் மூலம் அமெரிக்க அரசியல் வட்டாரத்தில் அவர் கூடுதல் கவனம் பெற்றார்.

இதையும் படிங்க: நான் போட்டியிட்டிருந்தால் இமாலய வெற்றி பெற்றிருப்போம்! தேர்தல் தோல்விக்கு பின் அதிபர் ட்ரம்ப் சமாளிப்பு!

இந்தச் சூழலில், ஓஹியோ மாகாண ஆளுநர் தேர்தலில் குடியரசுக் கட்சியின் வேட்பாளராகப் போட்டியிட அவர் களமிறங்கினார். தேர்தல் முடிவுகள் வெளியானபோது ஜனநாயகக் கட்சியின் ஏமி ஆக்டன் அவரைத் தோற்கடித்து வெற்றி பெற்றார். இதனால் ஆளுநராகும் விவேக் ராமசுவாமியின் முயற்சி தோல்வியில் முடிந்தது.

தேர்தல் தோல்விக்குப் பிறகு செய்தியாளர்களைச் சந்தித்த விவேக் ராமசுவாமி, தனது அரசியல் பயணம் குறித்து நம்பிக்கையுடன் பேசினார்.

அப்போது, “சில விஷயங்கள் ஒரு குறிப்பிட்ட காரணத்துக்காகவே நடைபெறுகின்றன என்று நான் நம்புகிறேன். கடவுளுக்கு ஒரு திட்டம் இருக்கிறது; நாம் அவருடைய கருவிகள் மட்டுமே. நமது மாகாணத்துக்கும் நாட்டுக்கும் எதிர்காலத்தில் மிகச் சிறந்த நாட்கள் காத்திருக்கின்றன என்ற நம்பிக்கை எனக்கு தொடர்ந்து இருக்கிறது. மனித வரலாற்றிலேயே அமெரிக்காதான் மிகச் சிறந்த நாடு” என்று தெரிவித்தார்.

டிரம்ப் தலைமையிலான குடியரசுக் கட்சிக்கும் பின்னடைவு!

இதற்கிடையே, அமெரிக்க இடைக்காலத் தேர்தலில் அதிபர் டொனால்ட் டிரம்ப் தலைமையிலான குடியரசுக் கட்சி பல்வேறு இடங்களில் பின்னடைவைச் சந்தித்துள்ளது. செனட் சபையில் பெரும்பான்மையை இழந்துள்ளதுடன், பிரதிநிதிகள் சபைத் தேர்தலிலும் கடுமையான சவாலை எதிர்கொண்டுள்ளது.

ஓஹியோ ஆளுநர் தேர்தலில் விவேக் ராமசுவாமியின் தோல்வியும், நாடாளுமன்றத் தேர்தல்களில் குடியரசுக் கட்சியின் பின்னடைவும் அமெரிக்க அரசியலில் முக்கியத் திருப்பமாக அமைந்துள்ளன.

இதையும் படிங்க: அமெரிக்காவின் ரகசிய ராணுவ தாக்குதல்! ஈரானின் குஷ்ஷூம் தீவில் மோதல்! மேற்காசியாவில் மீண்டும் பதற்றம்!