தமிழக அரசியல் வட்டாரத்தில் சமீப காலமாக பெரும் பரபரப்பை ஏற்படுத்திய நிகழ்வுகளில் ஒன்று, பாரதிய ஜனதா கட்சியின் முன்னாள் மாநிலத் தலைவர் கே. அண்ணாமலையின் விலகல். ஜூன் மாதத் தொடக்கத்தில் கட்சியிலிருந்து விலகிய அவர், ‘வி தி லீடர்ஸ்’ (We The Leaders) என்ற புதிய மக்கள் இயக்கத்தைத் தொடங்கினார். இதுவரை சுமார் 19 லட்சத்து 50 ஆயிரத்துக்கும் மேற்பட்டோர் இந்த அமைப்பில் உறுப்பினர்களாக இணைந்துள்ளனர். 

அண்ணாமலை, இதை விரைவில் முழுமையான அரசியல் கட்சியாக மாற்றி, வருங்காலத் தேர்தல்களில் போட்டியிடும் என அறிவித்திருப்பதால், பாஜகவின் உள்ளூர் நிர்வாகிகள் பலர் தங்கள் பதவிகளை ராஜினாமா செய்து அவருடன் இணைந்தனர். அண்ணாமலை தற்போது பெரும்பாலும் அமைதியாகவே இருக்கிறார். ஜூலை 12 அன்று பொள்ளாச்சியில் போதைப்பொருள் எதிர்ப்பு மாநாடு நடத்தியதைத் தவிர, முக்கியமாக எக்ஸ் தளத்தில் மட்டுமே தனது கருத்துகளைப் பதிவிட்டு வருகிறார். இதனால் ஆதரவாளர்கள் அவரது அடுத்த அரசியல் அறிவிப்பை எதிர்பார்த்துக் காத்திருக்கின்றனர்.

இந்தச் சூழலில் தான், தமிழக பாஜக மாநிலத் தலைவர் நயினார் நாகேந்திரன் அமைதியாக ஒரு முக்கிய நடவடிக்கையை மேற்கொண்டார். திருநெல்வேலி மாவட்டத்தைச் சேர்ந்த 25 முக்கிய நிர்வாகிகளை மீண்டும் கட்சியில் இணைத்துள்ளார். இவர்கள் அண்ணாமலை விலகிய பிறகு ‘வி தி லீடர்ஸ்’ அமைப்பில் இணைந்தவர்கள். நயினார் நாகேந்திரனின் இல்லத்தில் அவர்கள் சந்தித்து, பாஜகவிற்குத் திரும்பினர்.

இதையும் படிங்க: "48 மணி நேரத்திற்குள் நெல் மூட்டைகளை மாற்றாவிட்டால் மாபெரும் போராட்டம்!" - பாஜக தலைவர் எச்சரிக்கை!

இவர்களில் மாவட்ட ஓபிசி பிரிவு பொதுச் செயலாளர் வெங்கடேஷ், புரோட்டோகால் பிரிவு செயலாளர்கள் பேச்சிமுத்து மற்றும் கோவிந்த ராஜன், என்ஜிஓ பிரிவு செயலாளர் பட்டு ராஜா, இளைஞர் அணி மற்றும் ஊடகப் பிரிவு நிர்வாகிகள், பூத் தலைவர்கள் உள்ளிட்டோர் அடங்குவர். நயினார் நாகேந்திரன் தனது எக்ஸ் பக்கத்தில் இவர்களை வரவேற்று, பிரதமர் நரேந்திர மோடியின் தலைமையில் பொதுப் பணிக்குத் தொடர்ந்து உழைக்க வாழ்த்தியுள்ளார்.

இந்த மீண்டும் இணைப்பு, சட்டசபைத் தேர்தல் சவால்களுக்கு மத்தியில் நயினார் நாகேந்திரனுக்கு வலு சேர்க்கும் நடவடிக்கையாகப் பார்க்கப்படுகிறது. அதேநேரம், புதிய கட்சி உருவாக்க முனைப்பில் உள்ள அண்ணாமலைக்கு இது சிறிய பின்னடைவாகவே கருதப்படுகிறது. தமிழக பாஜகவின் உள் அமைப்பை நிலைநிறுத்தும் முயற்சியாக இது அமைந்துள்ளது.

இதையும் படிங்க: தொகுதி மறுவரையறைக்கு எதிர்ப்பு! பிரதமர் மோடியின் படம் பொறித்த பலூன்களை உடைத்து காங்கிரஸ் போராட்டம்!