கடந்த ஆண்டு நடந்த அமெரிக்க அதிபர் தேர்தலில் குடியரசு கட்சி வேட்பாளராக போட்டியிட்ட டொனால்டு டிரம்பிற்கு பொருள் உதவியும், பிரசார உதவியும் செய்தவர் உலகின் நம்பர் ஒன் பணக்காரர் எலான் மஸ்க். தேர்தலில் வெற்றி பெற்ற டிரம்ப் அதிபராகி, எலான் மஸ்க்-ஐ தனது நிர்வாகத்துக்குள் கொண்டு வந்து முக்கிய பதவி கொடுத்து அழகு பார்த்தார்.

கடந்த மே மாதம் வரை எலான் மஸ்க் அந்தப் பதவியில் இருந்தார். அதிபர் டிரம்ப் "Big Beautiful Bill" வரி வெட்டு மசோதாவை அறிவித்ததை எலான் மஸ்க் ஏற்க மறுத்தார். அதனால் பதவியில் இருந்து ராஜினாமா செய்தார்.
 
இந்த விவகாரம் தொடர்பாக இருவருக்கும் காரசார வார்த்தைப் போர் நடந்தது. ஒருவரை ஒருவர் வசைபாடினர். டிரம்ப்பின் இந்த மசோதாவை பைத்தியக்காரத்தனமானது. அமெரிக்க அதிபர் ஒரு முட்டாள், அவரது செயல்பாடுகள் அமெரிக்கா்களுக்கு அழிவை கொடுக்கும் என எலான் மஸ்க் தெரிவித்தார்.  பதிலுக்கு டிரம்ப்பும், மானம் கெட்டவர் மஸ்க் என விமர்சித்தார்.

ஒரு கட்டத்தில், எப்ஸ்டீன் என்ற பாலியல் மற்றும் மனிதக் கடத்தல் குற்றவாளியின் ஃபைலில் ட்ரம்ப் பெயர் உள்ளது. அதனால் தான், அந்த ஃபைல் வெளியிடப்படவில்லை என்றெல்லாம் எலான் மஸ்க் ட்ரம்பை கடுமையாக சாடியிருந்தார். இதற்கு பதில் அளித்த டிரம்ப், எலான் மஸ்க் சுயநினைவை இழந்துவிட்டார் என்றும், அவருடன் தன்னால் பேச முடியாது என்றும் தெரிவித்தார்.

இதையும் படிங்க: எலான் மஸ்க்-க்கு வச்சாங்க ஆப்பு! ஸ்பேஸ் எக்ஸ் நிறுவனத்திற்கு எதிராக திரும்பும் மெக்சிகோ..!

இருவரும் மீண்டும் சேர வாய்ப்பில்லை என்றே அரசியல் வட்டாரங்களில் பேசப்பட்டன. எலான் மஸ்க் தனிக் கட்சி துவங்குவார் எனவும் கூறினார்கள். ஆனால் சிறுது நாளிலேயே எலான் மஸ்க் தனது கருத்துக்கு வருத்தம் தெரிவித்தார்.

இதற்கிடையே டிரம்ப் கொண்டு வந்த மசோதா செனட் சபையில் கடும் எதிர்ப்புகளுக்கு இடையில் நிறைவேறியது. அடுத்து பிரதிநிதிகள் சபையில் மசோதா மீது வாக்கெடுப்பு நடக்க உள்ளது. எலான் மஸ்க்-உடனான இணக்கத்தைக் கெடுத்த இந்த மசோதா செனட் சபையில் நிறைவேறியிருப்பதற்கு டிரம்ப் மகிழ்ச்சி தெரிவித்துள்ளார்.  அதே சமயம் எலான் மஸ்க்கையும் அவர் புகழ்ந்திருக்கிறார். எலான் மஸ்க் குறித்து அவர் கூறியது

எலான் மஸ்க் மிக சிறந்தவர். அவரிடம் நான் அதிகம் பேசியதில்லை. ஆனால் அவர் எப்போதும் சிறப்பாக செயல்படுவார். அவர் ஒரு புத்திசாலி.  அதிபர் தேர்தலின் போது என்னுடன் பிரசாரத்திலும் பங்கேற்றார்.  

மின்சார வாகனம் தொடர்பான பிரச்னையில் அவர் சற்று கோபத்தில் இருந்தார்.  அது பொருத்தம் இல்லாதது என நினைக்கிறேன்.  எல்லோரும் மின்சார வாகனம் வைத்திருக்க வேண்டும் என நான் விரும்பவில்லை என்று டிரம்ப் கூறினார். டிரம்ப்பின் இந்த கருத்து இருவருக்குமான உறவில் இருந்த இடைவெளியைக் குறைத்திருக்கிறது .

இதையும் படிங்க: 2025-ல் இது 3வது தோல்வி.. வெடித்து சிதறிய ஸ்பேஸ் எக்ஸ் ராக்கெட்.. சொதப்பும் திட்டங்களால் எலான் மஸ்க் அப்செட்..!