டெல்லி: குற்றவாளிகளை எளிதில் பிடிக்கவும், வழக்குகளுக்கு விரைவில் தீர்வு காணவும் தேசிய தானியங்கி கைரேகை அடையாள அமைப்பை (NAFIS) முழுமையாகப் பயன்படுத்த வேண்டும் என மத்திய உள்துறை அமைச்சர் அமித் ஷா வலியுறுத்தியுள்ளார்.

டெல்லியில் நடைபெற்ற அனைத்திந்திய கைரேகை மாநாட்டில் உரையாற்றிய அவர், “குற்ற வழக்குகளில் கைரேகை பதிவுகள் மிகச் சிறந்த ஆதாரமாக விளங்குகின்றன. குற்றவாளிகளைத் தண்டிப்பதிலும், அறிவியல் பூர்வமான ஆதாரங்களைச் சேகரிப்பதிலும் கைரேகை முக்கியப் பங்கு வகிக்கிறது” என்றார்.

தேசிய தானியங்கி கைரேகை அடையாள அமைப்பு தற்போது வெறும் 10 சதவீதம் மட்டுமே பயன்படுத்தப்படுவதாகச் சுட்டிக்காட்டிய அமித் ஷா, “குற்றச் சம்பவங்கள் நடக்கும் ஒவ்வொரு இடத்திலிருந்தும் கைரேகைகளைச் சேகரித்து இந்த அமைப்பில் பதிவு செய்ய வேண்டும். இதன் மூலம் குற்றவாளிகளை விரைவில் அடையாளம் காண முடியும்” என்று தெரிவித்தார்.

இதையும் படிங்க: அண்ணாமலைக்கு ஆப்பு வைத்த அமித்ஷா! ரஜினிகாந்த் ஆதரவை பெற நயினார் நாகேந்திரன் முயற்சி?!

“குற்றவாளிகளைத் தப்பிக்க விடக்கூடாது. தேசிய தானியங்கி கைரேகை அமைப்பு உள்ளிட்ட நவீன தொழில்நுட்பங்களைப் பயன்படுத்தி குற்றங்களைக் கட்டுப்படுத்த வேண்டும்” என அவர் வலியுறுத்தினார். மேலும், நீதித்துறையின் செயல்பாட்டை விரைவுபடுத்த புதிய சட்டங்களில் தேவையான அம்சங்கள் இணைக்கப்பட்டுள்ளதாகவும், மூன்று ஆண்டுகளுக்குள் குற்றவாளிகளுக்கு தண்டனை பெற்றுத் தருவதை உறுதி செய்ய வேண்டும் என்றும் அமித் ஷா கூறினார்.

கைரேகைத் தொழில்நுட்பம் குற்ற விசாரணையில் புரட்சியை ஏற்படுத்தும் என்பதை அவர் சுட்டிக்காட்டினார். தற்போது குறைவாகப் பயன்படுத்தப்படும் NAFIS-ஐ நாடு முழுவதும் அதிக அளவில் ஒருங்கிணைத்து செயல்படுத்தினால், குற்ற விகிதத்தை கணிசமாகக் குறைக்க முடியும் என்பது அவரது வாதம்.

இந்த மாநாட்டில் பல்வேறு மாநிலங்களைச் சேர்ந்த காவல்துறை அதிகாரிகள் கலந்துகொண்டனர். கைரேகை தொழில்நுட்பத்தை மேம்படுத்துவதற்கான பயிற்சி மற்றும் விழிப்புணர்வு நிகழ்ச்சிகளும் இந்த மாநாட்டில் நடைபெற்றன.

குற்றங்களுக்கு எதிரான போராட்டத்தில் அறிவியல் தொழில்நுட்பத்தை அதிகம் பயன்படுத்த வேண்டும் என அமித் ஷா விடுத்துள்ள இந்த அழைப்பு, நாடு முழுவதும் வரவேற்பைப் பெற்றுள்ளது. 

இதையும் படிங்க: திமுகவும், தவெகவும் தான் நம்ம கொள்கை எதிரிகள்!! தமிழக பாஜகவினருக்கு அமித்ஷா அட்வைஸ்!