மேற்காசிய நாடுகளில் நிலவி வரும் போர் பதற்றம் உலக பொருளாதாரத்தில் பல்வேறு தாக்கங்களை ஏற்படுத்தி வருகிறது. குறிப்பாக, சர்வதேச சந்தையில் கச்சா எண்ணெய் விலை தொடர்ந்து உயர்ந்து வருவதால் விமானத் துறையும் கடுமையாக பாதிக்கப்பட்டுள்ளது. கச்சா எண்ணெய் விலை உயர்வின் நேரடி விளைவாக விமான எரிபொருளான ஏவியேஷன் டர்பைன் எரிபொருள் (ATF) விலையும் கணிசமாக அதிகரித்துள்ளது.

இதனுடன், போர் சூழ்நிலையால் சில நாடுகளின் வான்வெளிகள் கட்டுப்படுத்தப்பட்டுள்ளதால், பல சர்வதேச மற்றும் உள்நாட்டு விமானங்கள் மாற்றுப் பாதைகளில் இயக்கப்பட வேண்டிய நிலை ஏற்பட்டுள்ளது. இதன் காரணமாக விமானங்கள் வழக்கத்தை விட நீண்ட தூரம் பயணிக்க வேண்டியிருப்பதுடன், கூடுதல் எரிபொருள் செலவு மற்றும் இயக்கச் செலவுகளும் அதிகரித்துள்ளன.

இந்த சூழலில், அதிகரித்து வரும் செலவுகளை சமாளிக்க சில விமான நிறுவனங்கள் தங்களது சேவைகளின் எண்ணிக்கையை குறைக்க வேண்டிய கட்டாயம் ஏற்பட்டுள்ளதாக அண்மையில் அறிவித்திருந்தன. மேலும், பயணக் கட்டணங்கள் உயரக்கூடும் என்ற அச்சமும் பயணிகள் மத்தியில் நிலவியது.

இதையும் படிங்க: எபோலா நோய் பரவல் எதிரொலி..!! மாநிலங்களுக்கு பறந்த உத்தரவு.. மத்திய அரசு அதிரடி..!!

இந்நிலையில், விமானப் போக்குவரத்து துறையின் செயல்பாடுகள் பாதிக்கப்படாமல் இருக்க மத்திய அரசு முக்கிய நடவடிக்கையை மேற்கொண்டுள்ளது. பிரதமர் நரேந்திர மோடி தலைமையில் இன்று டெல்லியில் நடைபெற்ற மத்திய அமைச்சரவைக் கூட்டத்தில், விமான எரிபொருள் விலை உயர்வால் ஏற்பட்டுள்ள நிதிச் சுமையை குறைக்கும் வகையில் ரூ.10 ஆயிரம் கோடி ஒதுக்க முடிவு செய்யப்பட்டது.

இந்த நிதி உதவி மூலம் விமான நிறுவனங்களுக்கு ஏற்படும் கூடுதல் செலவுகளை ஓரளவு ஈடுகட்ட முடியும் என்றும், பயணிகளுக்கு ஏற்படக்கூடிய கட்டண உயர்வை கட்டுப்படுத்த உதவும் என்றும் அரசு வட்டாரங்கள் தெரிவித்துள்ளன. மேலும், விமான சேவைகளின் எண்ணிக்கை குறையாமல் வழக்கம்போல இயக்கப்படுவதற்கும் இந்த நடவடிக்கை துணைபுரியும் என எதிர்பார்க்கப்படுகிறது.

மத்திய அரசின் இந்த முடிவு விமானத் துறைக்கு நம்பிக்கையளிப்பதாகவும், தற்போதைய உலகளாவிய நெருக்கடியின் தாக்கத்தை சமாளிப்பதில் முக்கிய பங்காற்றும் என்றும் விமானத் துறை நிபுணர்கள் கருத்து தெரிவித்துள்ளனர்.

இதையும் படிங்க: மாநிலங்களுக்கு ரூ.90 ஆயிரம் கோடி வட்டியில்லா கடன்: மத்திய அரசு அதிரடி..!! உள்கட்டமைப்பு திட்டங்கள் புதிய உத்வேகம்..!!