டெல்லியில் CJP (கரப்பான்பூச்சி ஜனதா கட்சி) அமைப்பைச் சேர்ந்த இளைஞர்கள் மற்றும் மாணவர்கள் நடத்திய நீட் எதிர்ப்புப் போராட்டத்திற்கு ஆதரவு தெரிவிக்கச் சென்ற மக்களவை எதிர்க்கட்சித் தலைவர் ராகுல் காந்தி கைது செய்யப்பட்டதைக் கண்டித்து, சென்னை சைதாப்பேட்டையில் தமிழ்நாடு காங்கிரஸ் கமிட்டி சார்பில் பிரம்மாண்ட சாலை மறியல் போராட்டம் நடைபெற்றது.

சென்னை சைதாப்பேட்டை பனகல் மாளிகை அருகே நடைபெற்ற இந்த கண்டன ஆர்ப்பாட்டம் மற்றும் சாலை மறியல் போராட்டத்திற்குத் தமிழ்நாடு காங்கிரஸ் கமிட்டியின் முன்னாள் மாநிலத் தலைவர் கே.வி. தங்கபாலு தலைமை தாங்கினார். இதில் உயர்கல்வித் துறை அமைச்சர் விஸ்வநாதன் உள்ளிட்ட காங்கிரஸ் மற்றும் கூட்டணிக் கட்சியின் முக்கிய நிர்வாகிகள், தொண்டர்கள் திரளாகக் கலந்துகொண்டு மத்திய அரசுக்கு எதிராகக் கடுமையான முழக்கங்களை எழுப்பினர்.

நீட் (NEET) தேர்வு முறைகேடுகள் மற்றும் கல்வித் துறையில் நிலவும் குளறுபடிகளுக்கு எதிராக டெல்லி ஜந்தர் மந்தரில் CJP (Cockroach Janta Party) அமைப்பினர் தீவிரப் போராட்டத்தை ஒருங்கிணைத்து நடத்தினர். அந்த அமைப்பின் போராட்டத்திற்கு நேரடியாகச் சென்று ஆதரவு தெரிவித்த ராகுல் காந்தி, அவர்கள் மீது நடத்தப்பட்ட அடக்குமுறைக்கு விளக்கம் கேட்டுப் பிரதமர் இல்லம் நோக்கிப் பேரணியாகச் சென்றபோது டெல்லி காவல்துறையினரால் அதிரடியாகக் கைது செய்யப்பட்டார். இக்கைதைக் கண்டித்தே தற்போது தமிழகம் முழுவதும் காங்கிரஸ் கட்சியினர் வீதியில் இறங்கிப் போராடி வருகின்றனர்.

இதையும் படிங்க: பிரதமர் இல்லம் முற்றுகை! ராகுல் காந்தி, பிரியங்கா காந்தி டெல்லியில் கைது!

சைதாப்பேட்டை போராட்டத்தில் செய்தியாளர்களைச் சந்தித்த காங்கிரஸ் மூத்த தலைவர் கே.வி. தங்கபாலு அளித்த பேட்டியில் நீட் தேர்வு முறைகேடுகள் மூலமாக ஏழை, எளிய மாணவர்களுக்குத் தொடர்ச்சியாக மாபெரும் அநீதி இழைக்கப்பட்டு வருகிறது. CJP போராட்டத்திற்குச் சென்று நியாயமான முறையில் குரல் கொடுத்ததற்காக ராகுல் காந்தியைக் கைது செய்திருப்பதை ஏற்றுக்கொள்ள முடியாது.

மக்களின் உரிமைகளுக்காகக் களத்தில் நின்று போராடக்கூடிய ஒரே தலைவராக இன்றைக்கு ராகுல் காந்தி விளங்கி வருகிறார். ஜனநாயக நாட்டில் ஆளும் அரசாங்கம் எதிர்க்கட்சிகளின் குரலுக்கு மதிப்பளிக்க வேண்டும். அதை விடுத்துக் காவல்துறையைக் கொண்டு ஒடுக்க நினைக்கும் நரேந்திர மோடி தலைமையிலான அரசு விரைவில் வீழும்.

சைதாப்பேட்டை பனகல் மாளிகை சந்திப்பில் நடைபெற்ற இந்த அதிரடிச் சாலை மறியலால் அண்ணா சாலையில் சுமார் ஒரு மணி நேரத்திற்கும் மேலாகப் போக்குவரத்து கடுமையாகப் பாதிக்கப்பட்டது. சம்பவ இடத்தில் அசம்பாவிதங்கள் ஏதும் நடக்காமல் இருக்கப் பெருமளவில் காவல்துறையினர் குவிக்கப்பட்டுப் பாதுகாப்புப் பணியில் ஈடுபட்டனர்.

இதையும் படிங்க: டெல்லி தடியடியை கண்டித்து சென்னையில் CJP ஆர்ப்பாட்டம்! பனகல் மாளிகை அருகே மத்திய அரசுக்கு எதிராக முழக்கம்!