அமலாக்கத்துறை (என்ஃபோர்ஸ்மென்ட் டைரக்டரேட் - ED) அதிகாரிகள், கேரள முன்னாள் முதல்வர் பினராயி விஜயனின் திருவனந்தபுரம் இல்லம் உட்பட மாநிலம் முழுவதும் 12 இடங்களில் தீவிர சோதனை நடத்தி வருகின்றனர். பணப்பரிமாற்ற மோசடி வழக்கு தொடர்பாக இந்த அதிரடி நடவடிக்கை மேற்கொள்ளப்பட்டுள்ளது.

2018-19ஆம் ஆண்டு பினராயி விஜயன் முதல்வராக இருந்தபோது, கொச்சின் மினரல்ஸ் என்ற நிறுவனம் அவரது மகள் வீணா விஜயனின் 'எக்ஸாலாஜிக் சொல்யூஷன்ஸ்' என்ற நிறுவனத்துக்கு சுமார் 1.72 கோடி ரூபாய் பணம் செலுத்தியதாகக் குற்றச்சாட்டு எழுந்துள்ளது. 

இந்தப் பணம் சட்டவிரோதமாகக் கைமாறியதாகவும், எந்தவித சேவையும் வழங்கப்படாத நிலையில் இந்த பரிவர்த்தனை நடைபெற்றதாகவும் அமலாக்கத்துறை சந்தேகிக்கிறது. இந்த விவகாரம் பெரும் பரபரப்பை ஏற்படுத்தியுள்ளது.

இதையும் படிங்க: முதல்வர் விஜய் பாணியை பின்பற்றும் கேரளா முதலமைச்சர்!! கடுமையாக விமர்சித்துக் கொண்ட நிலையில் சந்திப்பு!

கடந்த 2024ஆம் ஆண்டு பணமோசடி தடுப்புச் சட்டம் (PMLA) அடிப்படையில் அமலாக்கத்துறை வழக்குப் பதிவு செய்து விசாரணையைத் தொடங்கியது. இதன் தொடர்ச்சியாகவே இன்று அதிரடி சோதனைகள் நடைபெற்று வருகின்றன. 
திருவனந்தபுரத்தில் உள்ள பினராயி விஜயனின் இல்லம், அவரது உறவினர்கள் மற்றும் தொடர்புடைய இடங்கள் உள்ளிட்ட 12 இடங்களில் ED அதிகாரிகள் சோதனை வேட்டையில் ஈடுபட்டுள்ளனர். ஆவணங்கள், டிஜிட்டல் சாதனங்கள் உள்ளிட்டவற்றைப் பறிமுதல் செய்யும் பணி தீவிரமாக நடைபெற்று வருவதாகத் தகவல்கள் வெளியாகியுள்ளன.

இந்தச் சோதனை கேரள அரசியலில் பெரும் அதிர்வலைகளை ஏற்படுத்தியுள்ளது. சிபிஐ(எம்) தரப்பில் இதனை அரசியல் பழிவாங்கல் என்று விமர்சனம் செய்யும் வாய்ப்பும் உள்ளது. மறுபுறம், எதிர்க்கட்சிகள் இந்த வழக்கைப் பயன்படுத்தி பினராயி விஜயன் மீது தொடர்ச்சியான தாக்குதலைத் தொடுக்கும் என எதிர்பார்க்கப்படுகிறது. 

கொச்சின் மினரல்ஸ் நிறுவனம் மற்றும் எக்ஸாலாஜிக் சொல்யூஷன்ஸ் இடையேயான பணப் பரிவர்த்தனை குறித்து விரிவான விசாரணை நடைபெற்று வருகிறது. இந்த வழக்கில் இதுவரை பல முக்கிய நபர்கள் விசாரணைக்கு அழைக்கப்பட்டுள்ளனர். ED அதிகாரிகள் பல மணி நேரங்களாக சோதனையில் ஈடுபட்டுள்ளதால், இந்த விவகாரம் மேலும் பரபரப்பை ஏற்படுத்தும் என்பதில் சந்தேகமில்லை.

கேரள அரசியலில் முக்கிய புள்ளியான பினராயி விஜயனுக்கு இந்தச் சோதனை பெரும் சவாலாக அமையும் என அரசியல் பார்வையாளர்கள் கருதுகின்றனர். வழக்கின் முழு விவரங்களும் விரைவில் வெளியாகும் என எதிர்பார்க்கப்படுகிறது. 

இதையும் படிங்க: பல கோடி ரூபாய் வங்கி மோசடி! சட்டவிரோத பணப்பரிமாற்றம்! சென்னையில் அமலாக்கத்துறை அதிரடி சோதனை!