ஜெய்ப்பூர்: அமெரிக்க வெளியுறவு செயலாளர் மார்கோ ரூபியோ, ஈரான் மீதான பதற்றம் தொடரும் நிலையில் ஹார்முஸ் ஜலசந்தி திறக்கப்பட வேண்டும் என்று உறுதியாகத் தெரிவித்துள்ளார். “அது ஒரு வழியில் இல்லையென்றால் மற்றொரு வழியில் திறக்கப்படும்” என்ற அவரது பேச்சு உலக அளவில் பெரும் கவனத்தை ஈர்த்துள்ளது.

3 நாள் இந்தியப் பயணத்தின் ஒரு பகுதியாக தனது மனைவியுடன் ராஜஸ்தான் ஜெய்ப்பூர் வந்துள்ள ரூபியோ, அங்கு செய்தியாளர்களிடம் பேசுகையில் இந்த எச்சரிக்கையை விடுத்தார். ஹார்முஸ் ஜலசந்தி முடக்கத்தால் உலக எண்ணெய் வரத்து பாதிக்கப்பட்டுள்ளது. இந்தியா உள்ளிட்ட பல நாடுகள் எரிபொருள் தட்டுப்பாடு மற்றும் விலை உயர்வால் கடும் நெருக்கடியை எதிர்கொண்டுள்ளன. இந்த நிலை நீடித்தால் உலகப் பொருளாதாரம் பெரும் சரிவை சந்திக்கும் என்ற அச்சம் நிலவுகிறது.

கத்தார் தலைநகர் தோஹாவில் அமெரிக்கா-ஈரான் பிரதிநிதிகள் இடையே அமைதி ஒப்பந்தம் தொடர்பான பேச்சுவார்த்தைகள் தொடர்ந்து நடைபெற்று வருகின்றன. ஆனால் முன்னேற்றம் மெதுவாகவே உள்ளது. இந்நிலையில், ஈரானின் தெற்குப் பகுதியில் உள்ள பந்தர் அபாஸ் நகருக்கு அருகே அமெரிக்க ராணுவம் வான்வழித் தாக்குதல் நடத்தியது பேச்சுவார்த்தையில் தொய்வை ஏற்படுத்தியுள்ளது.

இதையும் படிங்க: அமெரிக்கா - ஈரான் போர்நிறுத்தம் கானல்நீர்?!! நம்பிக்கை இழந்த உலக நாடுகள்!! நீடிக்கும் முரண்பாடு!

ரூபியோ மேலும் கூறியதாவது, “தோஹாவில் முக்கிய விவாதங்கள் நடைபெற்று வருகின்றன. முன்மொழிவுகளை இறுதி செய்ய இரு தரப்பும் தீவிர ஆலோசனை நடத்தி வருகின்றன. இன்னும் சில நாட்கள் ஆகலாம். அதிபர் டிரம்ப் ஒரு நல்ல ஒப்பந்தத்தை மட்டுமே விரும்புகிறார். எந்த ஒப்பந்தமும் அல்ல” என்றார்.

ஹார்முஸ் ஜலசந்தி திறக்கப்பட வேண்டும் என்ற ரூபியோவின் கருத்தும், பந்தர் அபாஸில் அமெரிக்க தாக்குதலும் ஒன்றோடொன்று தொடர்புடையவை என வல்லுநர்கள் கருதுகின்றனர். பந்தர் அபாஸ் ஈரான் கடற்படை மற்றும் விமானப்படைக்கு முக்கிய தளமாகும்.

உலக நாடுகள் தற்போது தோஹா பேச்சுகளின் அடுத்தகட்ட முடிவுகளை ஆவலுடன் எதிர்பார்த்துள்ளன. ஹார்முஸ் ஜலசந்தி திறக்கப்படாவிட்டால் எண்ணெய் விலை மேலும் உயரும் என்பதால், இந்தியா உள்ளிட்ட இறக்குமதி சார்ந்த நாடுகள் கடும் பாதிப்பை சந்திக்கும் அபாயம் உள்ளது. அமெரிக்கா பேச்சு வழியாகவோ அல்லது வேறு வழிகளிலோ இந்தப் பிரச்னைக்கு தீர்வு காண முயற்சிப்பதாக ரூபியோவின் பேச்சு தெளிவுபடுத்துகிறது.

இதையும் படிங்க: ஹார்முஸ் நீரிணையே எங்க கண்ட்ரோல்ல தான் இருக்கு!! ஈரான் ஜெயிக்காது! அடித்து சொல்லும் அதிபர் ட்ரம்ப்!