"1999-ஆம் ஆண்டு கார்கில் போரின் போது வீரமரணம் அடைந்த தனது சொந்த நாட்டு ராணுவ வீரர்களின் உடல்களைக் கூட ஏற்றுக்கொள்ள மனமில்லாமல் நிராகரித்த வரலாற்றுத் துரோகத்தைச் செய்த பாகிஸ்தான், இன்று சர்வதேச அரங்கில் நின்று நம்பிக்கை, மத சுதந்திரம் மற்றும் நல்லடக்கம் பற்றிப் பேசுவது விந்தையானது மற்றும் வெட்கக்கேடானது" என்று ஐக்கிய நாடுகள் சபைக்கான (UN) இந்தியாவின் நிரந்தரத் தூதரகத்தின் முதல் செயலாளர் பாவிகா மங்கலானந்தன் மிகக் காரசாரமாகப் பதிலடி கொடுத்துள்ளார்.

ஐக்கிய நாடுகள் சபையின் கூட்டத்தொடரில் மனித உரிமைகள், சகிப்புத்தன்மை மற்றும் மத சுதந்திரம் தொடர்பான விவாதங்கள் நடைபெற்று வந்தன. அப்போது வழக்கம் போலத் தனது சர்வதேச மேடை நாடகத்தை அரங்கேற்றிய பாகிஸ்தான் பிரதிநிதி, இந்தியாவுக்கு எதிராகவும், இந்தியாவில் நிலவும் மத நல்லிணக்கம் மற்றும் உள்நாட்டு விவகாரங்கள் குறித்தும் அடிப்படை ஆதாரமற்ற அவதூறுகளையும் விஷமத்தனமான பொய்களையும் அள்ளி வீசினார்.

இதையும் படிங்க: திடீரென இடிந்து விழுந்த பள்ளியின் மேற்கூரை..!! 28 மாணவர்கள் பரிதாப பலி..!! பாக்.-ல் சோக சம்பவம்..!!

பாகிஸ்தானின் இந்த விஷமப் பிரச்சாரத்திற்குத் தனது 'பதிலடி கொடுக்கும் உரிமை' (Right of Reply) வாயிலாக மேடையேறிய இந்திய இளம் தூதரக அதிகாரியான பாவிகா மங்கலானந்தன், வரலாற்று உண்மைகளை ஆதாரங்களுடன் எடுத்துரைத்துப் பாகிஸ்தானின் போலி முகத்தை சர்வதேச நாடுகள் முன்னிலையில் சுக்குநூறாக உடைத்தெறிந்தார்.

 "1999-ஆம் ஆண்டு கார்கில் போரைத் திட்டமிட்டுத் தொடங்கிய பாகிஸ்தான், அப்போரில் உயிரிழந்த தங்களது சொந்த நாட்டு ராணுவ வீரர்களின் உடல்களைக் கூட 'இவர்கள் எங்கள் வீரர்கள் இல்லை' என்று கூறி ஏற்றுக்கொள்ள மறுத்துக் கைவிட்டது. சொந்த நாட்டு ராணுவ வீரர்களின் உடல்களை உரிய மரியாதையுடன் நல்லடக்கம் செய்யக் கூடத் துப்பில்லாத ஒரு நாடு, இன்று ஐ.நா. போன்ற உயரிய உலக மன்றத்தில் நின்றுகொண்டு நம்பிக்கை, மத சுதந்திரம், கண்ணியம் மற்றும் புனிதமான நல்லடக்கம் பற்றி வாய் கூசாமல் பேசுகிறது."

"பயங்கரவாதத்தை அரசு பயங்கரவாதமாக ஏற்றுக்கொண்டு, சிறுபான்மையினரைத் தொடர்ந்து ஒடுக்கி வரும் ஒரு நாடு, ஜனநாயகத்தின் தொட்டிலாகவும் அனைத்து மதங்களையும் போற்றிப் பாதுகாக்கும் உலகின் மிகப்பெரிய ஜனநாயக நாடான இந்தியாவிற்கு மத சுதந்திரம் குறித்தும் சகிப்புத்தன்மை குறித்தும் வகுப்பு எடுக்க வேண்டிய எந்த அவசியமும் இல்லை."

உலகளாவிய பயங்கரவாதத்தின் புகலிடமாக விளங்கும் பாகிஸ்தான், தனது உள்நாட்டுத் தோல்விகளை மறைக்க சர்வதேச மன்றங்களைத் தவறாகப் பயன்படுத்துவதை இனியாவது நிறுத்திக் கொள்ள வேண்டும் என்று அவர் மிகக் காட்டமாக எச்சரித்தார்.

ஐக்கிய நாடுகள் சபையின் பொது விவாத மேடையில் பாகிஸ்தானின் உண்மை வரலாற்றையும் அவர்களின் மனிதாபிமானமற்ற போக்கையும் இந்திய இளம் தூதர் பாவிகா மங்கலானந்தன் வெளிச்சம் போட்டுக் காட்டிய விதம், உலக நாட்டுப் பிரதிநிதிகளிடையே பெரும் கவனத்தைப் பெற்றதுடன், இந்தியத் தரப்பின் வாதத்திற்குப் பரவலான பாராட்டுகளையும் பெற்றுத் தந்துள்ளது.

இதையும் படிங்க: பாக்.-ன் 22% தண்ணீர் தட்டுப்பாட்டுக்கு இந்தியா காரணமா..?? வெளிச்சத்திற்கு வந்த உண்மை..!! அறிக்கை சொல்வது என்ன?