பெரம்பலூர் மாவட்டத்தில் பால் உற்பத்தியாளர்கள் கூட்டுறவு சங்கங்களின் செயல்பாடுகளை நேரில் ஆய்வு செய்த தமிழகப் பால்வளத்துறை அமைச்சர் விஜயலட்சுமி, தனியார் நிறுவனங்களுக்கும் கூட்டுறவு சங்கங்களுக்கும் இடையே நிலவும் பால் கொள்முதல் விலை வித்தியாசத்தைக் கட்டுப்படுத்த ஒழுங்குமுறை ஆணையம் அமைக்கப்படும் என்று திட்டவட்டமாக அறிவித்துள்ளார்; மேலும், அரியலூர் மற்றும் பெரம்பலூர் மாவட்டங்களைச் சேர்ந்த 16 ஆயிரத்திற்கும் மேற்பட்ட பால் உற்பத்தியாளர்களுக்கு ரூ.6.89 கோடி மதிப்பிலான பல்வேறு அரசு நலத்திட்ட உதவிகளையும் அவர் வாரி வழங்கியுள்ளார்.

பெரம்பலூர் மாவட்டம் ஆலத்தூர் வட்டத்திற்கு உட்பட்ட சிறுவயலூர் பால் உற்பத்தியாளர்கள் கூட்டுறவு சங்கம், நாட்டார்மங்கலம் பால் உற்பத்தியாளர்கள் கூட்டுறவு சங்கம், பால் குளிரூட்டும் மையம் மற்றும் பாடாலூர் திருவளக்குறிச்சியில் இயங்கி வரும் அதிநவீனப் பால் பண்ணை மற்றும் பால் பவுடர் தயாரிப்பு நிலையம் ஆகிய இடங்களுக்கு அமைச்சர் விஜயலட்சுமி இன்று நேரில் சென்று விரிவான கள ஆய்வுகளை மேற்கொண்டார். அப்போது, பாடாலூரில் புதிதாகக் கட்டமைக்கப்பட்டு வரும் பால் பவுடர் தயாரிக்கும் தொழிற்சாலைப் பணிகளை எவ்விதத் தாமதமுமின்றி உடனடியாகப் பயன்பாட்டிற்கு முடிக்க வேண்டும் என்று அதிகாரிகளுக்குக் கண்டிப்புடன் அறிவுறுத்தினார்.

இதனைத் தொடர்ந்து, பெரம்பலூர் மாவட்ட ஆட்சியர் அலுவலகக் கூட்டரங்கில் அரியலூர் மற்றும் பெரம்பலூர் மாவட்டங்களைச் சேர்ந்த பால் உற்பத்தியாளர்களுக்கு அரசு நலத்திட்ட உதவிகள் வழங்கும் விழா வெகு விமரிசையாக நடைபெற்றது. இவ்விழாவில் பங்கேற்ற அமைச்சர் விஜயலட்சுமி, பால் உற்பத்தியாளர்களுக்கான ஊக்கத்தொகை, ஆவின் நிறுவன சிறு பால்பண்ணை கடன், தவணைக் கடன், தாட்கோ கடன் மற்றும் கறவை மாடு பராமரிப்புக் கடன் என மொத்தம் 43 பால் உற்பத்தியாளர்கள் கூட்டுறவு சங்கங்களைச் சேர்ந்த 16,350 பயனாளிகளுக்கு ரூ.6 கோடியே 89 லட்சத்து 96 ஆயிரத்து 288 மதிப்பிலான நலத்திட்ட உதவிகளை வழங்கிச் சிறப்புரையாற்றினார்.

இதையும் படிங்க: சிக்கலில் சி.டி.ஆர்... செம்ம டென்ஷனில் விஜய்... மக்களிடம் டோட்டலாக டேமேஜ் ஆன தவெக இமேஜ்...!

அப்போது மேடையில் பேசிய அமைச்சர் நான் கள ஆய்வுக்குச் சென்ற இடங்களில் எல்லாம் பால் உற்பத்தியாளர்களும் பொதுமக்களும் தற்போதைய ஆட்சி ஒரு பொற்கால ஆட்சியாக நடைபெற்று வருவதாகவும், மாண்புமிகு முதலமைச்சர் விஜய் அவர்கள் அடித்தட்டு மக்களின் அனைத்துத் தேவைகளையும் உடனுக்குடன் நிறைவேற்றி வருவதாகவும் மனதாரத் தெரிவித்தனர். பால் உற்பத்தியாளர்கள் முன்வைத்துள்ள சிறு சிறு நியாயமான கோரிக்கைகளும் போர்க்கால அடிப்படையில் விரைந்து தீர்த்து வைக்கப்படும். மேலும், தனியார் பால் பண்ணைகளுக்கும் அரசு கூட்டுறவுச் சங்கங்களுக்கும் இடையே கொள்முதல் விலையில் உள்ள வித்தியாசத்தைக் கட்டுக்குள் கொண்டுவரத் தனி ஒழுங்குமுறை ஆணையம் அமைக்கப்படும் என்று உறுதிபடத் தெரிவித்தார்.

விழா நிறைவில் செய்தியாளர்களிடம் பேசிய அமைச்சர் விஜயலட்சுமி, "எல்-நினோ தாக்கத்தால் பால் உற்பத்தியாளர்களுக்கு ஏற்படும் பாதிப்புகளைத் தவிர்க்க மத்திய அரசு வழங்கும் தீவன மானியம் பெரும்பாலான மாவட்டங்களுக்கு ஏற்கனவே வழங்கப்பட்டுவிட்டது. விடுபட்ட மாவட்டங்களுக்கும் உடனடியாக விடுவிக்கப்படும். அதேபோல், கூட்டுறவு சங்கங்களில் பால் பரிசோதனை செய்யாமல் தோராயமாக விலை நிர்ணயிப்பதாக வரும் புகார்கள் மீது தீவிர விசாரணை நடத்தப்பட்டு உரிய நடவடிக்கை எடுக்கப்படும் என்று விளக்கமளித்தார்.

இந்நிகழ்வில் பெரம்பலூர் மாவட்ட ஆட்சியர் அப்துல் ராசிக், பெரம்பலூர் சட்டமன்ற உறுப்பினர் சிவக்குமார் மற்றும் ஆவின் நிறுவன உயர் அதிகாரிகள், கூட்டுறவுத் துறை அலுவலர்கள், பால் உற்பத்தியாளர் சங்க நிர்வாகிகள், பயனாளிகள் எனப் பெரும் திரளானோர் கலந்துகொண்டனர்.

இதையும் படிங்க: தவெக நிர்வாகி வீட்டில் போதைப்பொருள் சோதனை.! மெத்தபெட்டமைன் கடத்தல் புகாரில் அதிரடி.!