திருச்சி: 2029-ம் ஆண்டு நடைபெறும் மக்களவைத் தேர்தலில் ராகுல் காந்திதான் பிரதமர் வேட்பாளராக முன்னிறுத்தப்படுவார் என்று தமிழக உயர்கல்வித்துறை அமைச்சர் விஸ்வநாதன் தெரிவித்துள்ளார். திருச்சி விமான நிலையத்தில் செய்தியாளர்களிடம் பேசிய அவர், தமிழக வெற்றி கழக அரசு 5 ஆண்டுகளும் தொடர்ந்து சிறப்பாக செயல்படும் என்றும் உறுதியாக கூறினார்.

தமிழக வெற்றி கழக தலைவர் மற்றும் முதலமைச்சர் ஜோசப் விஜய் தலைமையிலான அரசு தனது முழுமையான ஆட்சிக்காலத்தை நிறைவு செய்யும் என அமைச்சர் தெரிவித்தார். காங்கிரஸ் கட்சியைச் சேர்ந்த 5 சட்டமன்ற உறுப்பினர்களும் அரசுக்கு முழுமையான ஆதரவை வழங்குவதாகவும், ராகுல் காந்தியின் ஆசியுடன் இந்த ஆதரவு தொடரும் என்றும் அவர் கூறினார்.

மக்களுக்கான பல்வேறு நலத்திட்டங்களை முதலமைச்சர் விஜய் தொடர்ந்து அறிவிப்பார் என்றும், அரசு 5 ஆண்டுகள் தொடர்வதில் எந்த சந்தேகமும் தேவையில்லை என்றும் அமைச்சர் குறிப்பிட்டார்.

இதையும் படிங்க: பருவமழை மழை வருவதற்கு முன்பே முதல்வர் விஜய் அதிரடி! தமிழக அரசின் மாஸ்டர் பிளான்!

பத்திரப்பதிவுத்துறையில் பணியாற்றும் ஊழியர்களுக்கு நீண்ட காலமாக சம்பளம் வழங்கப்படவில்லை என்ற புகார் குறித்தும் அமைச்சர் பேசினார். இந்த விவகாரம் தொடர்பாக சம்பந்தப்பட்ட துறை அமைச்சருடன் சட்டமன்றத்தில் பேசி உரிய தீர்வு காண நடவடிக்கை எடுக்கப்படும் என்றார்.

சட்டமன்றம் என்பது மக்களின் பிரச்சினைகளை விவாதிக்கும் ஜனநாயக மன்றம் என்றும், மக்கள் சார்ந்த பிரச்சினைகளும் அரசியல் விவகாரங்களும் அங்கு விவாதிக்கப்படுவது இயல்பானது என்றும் விஸ்வநாதன் தெரிவித்தார். அதே நேரத்தில், சட்டமன்றத்தின் கண்ணியம், மரபு மற்றும் மாண்புகள் தொடர்ந்து பாதுகாக்கப்பட வேண்டும் என்றும் அவர் வலியுறுத்தினார்.

அரசின் கொள்கை விளக்கக் குறிப்பில் பெரியார் மற்றும் அம்பேத்கர் பெயர்கள் இடம்பெறாதது குறித்த கேள்விக்கு பதிலளித்த அமைச்சர், தவெகவின் கொள்கைத் தலைவர்களில் பெரியார், அம்பேத்கர் மற்றும் காமராஜர் ஆகியோர் இடம்பெற்றுள்ளதாக கூறினார். சிறிய விவாதங்களை பெரிதுபடுத்தாமல், விரிவான கருத்துகளையும் விவாதங்களையும் முன்னெடுப்பதே நல்லது என்றும் தெரிவித்தார்.

உயர்கல்வித்துறையின் திட்டங்கள் குறித்தும் அவர் விளக்கம் அளித்தார். உதவிப் பேராசிரியர்களுக்கான பணி முன்னேற்றத் திட்டத்தில் நீண்ட காலமாக நிலவி வந்த பிரச்சினைகளுக்கு தீர்வு காணப்பட்டுள்ளதாக கூறிய அவர், உயர்கல்வித்துறைக்கு மாதந்தோறும் ரூ.19 கோடி வீதம் நிதி ஒதுக்கப்பட்டு வருவதாக தெரிவித்தார். மேலும், கௌரவ விரிவுரையாளர்களுக்கான ஊதிய உயர்வு உள்ளிட்ட நடவடிக்கைகள் மேற்கொள்ளப்பட்டுள்ளதாகவும் கூறினார்.

உயர்கல்வித்துறையில் சுமார் 8,000 ஆசிரியர் பணியிடங்கள் காலியாக இருப்பதாகவும், 2,703 ஆசிரியர் பணியிடங்களுக்கான தேர்வு நடவடிக்கைகள் முடிவடைந்து முடிவுகள் விரைவில் வெளியாகும் என்றும் அமைச்சர் தெரிவித்தார். தொடர்ந்து சுமார் 6,000 பேராசிரியர் பணியிடங்களுக்கான தேர்வுகள் மூன்று கட்டங்களாக நடத்தப்படும் என்றும் அவர் கூறினார்.

இதற்கிடையே, தேசிய அரசியல் குறித்துப் பேசிய அமைச்சர் விஸ்வநாதன், காங்கிரஸ் கட்சியின் முன்னாள் தலைவரும் மக்களவை எதிர்க்கட்சித் தலைவருமான ராகுல் காந்திதான் தங்களது பிரதமர் வேட்பாளர் என்று தெரிவித்தார். 2029-ல் ராகுல் காந்தி பிரதமராக வேண்டும் என்பதில் தாங்கள் ஒற்றுமையாக இருப்பதாகவும், அதற்காக ஒரே குரலில் செயல்படுவோம் என்றும் அவர் கூறினார்.

மேலும், பாஜக ஆட்சியின் மீது மக்கள் அதிருப்தியில் இருப்பதாகவும், மோடி அரசின் செயல்பாடுகளால் மக்கள் ஏமாற்றம் அடைந்துள்ளதாகவும் அமைச்சர் விமர்சித்தார். 2029-ம் ஆண்டு தேர்தலை முன்னிட்டு ராகுல் காந்தியை பிரதமர் வேட்பாளராக முன்னிறுத்தும் அவரது பேச்சு தமிழக அரசியலில் தற்போது கவனம் பெற்றுள்ளது.

இதையும் படிங்க: முதல்வர் விஜய் ஆட்சியிலும் இதே கதையா? பணியிடமாற்றத்தை ரத்து செய்ய மேல்மட்டத்தில் ‘பேரம்’?!